Alysoun

Bytuene Mershe and Averil
When spray biginneth to springe,
The lutel foul hath hire wyl
  On hyre lud to synge:
Ich libbe in love-longinge
For semlokest of alle thynge,
He may me blisse bringe,
  Ich am in hire baundoun.
An hendy hap ichabbe y-hent,
Ichot from hevene it is me sent,
From alle wymmen my love is lent
  And lyht on Alysoun.

On heu hire her is fayr ynoh,
  Hire brow broune, hir eye blake;
With lossum chere he on me loh;
  With middel smal and wel y-make;
Bote he me wolle to hire take
For to buen hir owen make,
Long to lyven ichulle forsake
  And feye fallen adoun.
An hendy hap ichabbe y-hent,
Ichot from hevene it is me sent,
From alle wymmen my love is lent
  And lyht on Alysoun.

Nihtes when I wende and wake,
  For-thi myn wonges waxeth won,
Levedi, al for thine sake
  Longinge is y-lent me on.
In world nis non so wyter mon
That al hire bounté telle con;
Hire swyre is whittore than the swon,
  And feyrest may in toune.
An hendy hap ichabbe y-hent,
Ichot from hevene it is me sent,
From alle wymmen my love is lent
  And lyht on Alysoun.

Ich am for wowyng al for-wake,
  Wery so water in wore;
Lest eny reve me my make
  Ichabbe y-yerned yore.
Betere is tholien whyle sore
Then mournen evermore.
Geynest under gore,
  Herkne to my roun.
An hendy hap ichabbe y-hent,
Ichot from hevene it is me sent,
From alle wymmen my love is lent
  And lyht on Alysoun.