Hand-book of Volapük/35
LILÄDAM[edit]
1.
BISIEDAL GARFIELD.
Dun balid söla Garfield, bisiedal de Tats pebalöl na finam cälama oma as bisiedal Pübliga legletik et, äbinom kidön moti e jimateli omik len stunam e betikälam de cifals gletik e pop nenumlik läna et, kels äbinoms plisenik zäle eit.
Kikod edunom atosi? Ibo mote oma edebom sibini, nulüdi e dadukami, kels eblinoms ome diniti mayedikün fataläna omik; ed in jimatel oma ituvom jikopaneli fiedik, divodik, fägik e stimlik in lefulön debis jimatelik e domik!
O net läbik! Ol labedöl regalis aistümöl ed aistimöl tugi e fetanis famülik!
Joseph Holden (nelijel).
2.
KON
Läd nelijik polöl dogi smalik in lams ofik, lüodof äl valadasäl stajena de Lyon.
Pecälel sembal leloda stopom ofi e sagom:
,,Läd, no kanol bekipön dogi olik ko ol.''
,,Desibob bekipön omi ko ob.''
,,Atos binos nemögik. Dogs binoms papolöl delidü tävels e paninkiköl in lelodavab patik.''
,,No oninkikol obiki!''
,,Oninkikob oliki i: sesum nonik sibinom.''
,,Osiadob omi in tävasak obik.''
,,Atos binos nemögik.''
,,Esiadob egelo omi in sak obik in Nelij.''
,,In Flent, mutol konfidön dogi olik pecäleles leloda e pelön poli.''
,,No opelob. Lüvob dogi ole.''
,,Benüno, Läd.''
Läd mürof setis anik zunik e givof dogi pecälele. At summon nimi ab gegivom omi foviko, zenodü smils bösetik tävelas. Dog päfulom ko stol!
Guigues (flentel).
3.
NAPOLEONA POKAGLOK.
Napoleon äbinom son lavogela Bonaparte baonik ab no liegik. Nag ilefulom studis omik su jul militik in Paris, päcälom as liötan känemik. In tim ot älemom oke, de fenigs pespalöl pokagloki silefik, cinüfadi badik e nedelidik, kel äskanom omi levemo in vigs balid. Ven mon ädefom liötane pöfik kelos ofen äzitos, äpanom gloki oma.
In balmil jöltum päsevokom as limep flentik. Id as lelimep, kel rigetom divis valik yulopik äipolom pokagloki bäledatik. In pug de Marengo, Napoleon äsäkom düke de Montebello, kel ästadom lä om, düp kimid äbinos. ,,Pokaglok oba takom denu,'' fovom Napoleon smülöl ed äjonom su eti: ,,Luglok vetik et eikopanom obi su lifaveg oba; sikod oiledivob omi.'' Vo päikonsefom in famül Napoleonas as meb kostik len fatasked legletik.
Äkopanom Napoleoni balid al Elba ed al St. Helena, e ven ädeilom in balmil jöltum telsebal ägelütom gloki sone oma balsebal-yelik kel äblibom in Schönbrunn nilü Wien, ledom omika fatela Franz I de Löstakin.
<a NAME="p066"></a>Pos kela deil ägekömom al famüli; e ven Napoleon kilid pävikodom lä Sedan, äpolom pokagloki bäledatik; kopanom omi al Chislehurst; kilna sukom Napoleone votik al läni foginik. Jilimep Eugènie, jiviudel limepa flentik lätik äkonsefom pokagloki plo son ofa Louis, as pul penemöl ,,Lulu.'' Napoleon folid ädeilom nog yunik, fagik de fatän omik li foetäbs Fikopa sulüdik.
Id om äpolom gloki; ab jonels äjonoms suno düpi lätik oma. Fun omik pätuvom peseklotöl. Bo polom eiti nu Zulu sembal as deki su blöt blonik oma. Ko Napoleon lätik pölüdomok pokaglok.
Vomül de Keiser (jinedänel).
4.
JOHANN MARTIN SCHLEYER.
| Pämotom in Oberlauda, in Badän, e labom nu lifayelis lulsemäl. Estudom pükis plu ka luls. Äpübom balidna in yel 1879 volapüki omik, kel nu pasevom e pagebom su vol lölikMödikna iblüfon datikön püki valemik u bevünetik, e blüfs et pämekoms fa mens sapik ed estudik; ab blüfam nonik pliasumom in gebi plägik. Datikel döla at legletik emelidom läsevami e danöfi menada valik, ab lifom nu in Konstanz de bäledamon smalik pagetöl as pädel glüga romik katolik. No-li binos blig e gälod volapükeles yufön omi? |
