The Banks O' Doon (2nd version)

From Wikisource
Jump to: navigation, search
The Banks O' Doon
by Robert Burns
This is the second of three versions of The Banks O' Doon published by Burns, all in 1791.

Ye flowery banks o' bonie Doon,
How can ye blume sae fair?
How can ye chant, ye little birds,
And I sae fu' o care!
Thou'll break my heart, thou bonie bird,
That sings upon the bough!
Thou minds me o' the happy days
When my fause Luve was true.
Thou'll break my heart, thou bonie bird,
That sings beside thy mate;
For sae I sat, and sae I sang,
And wist na o' my fate.

Aft hae I rov'd by bonie Doon,
To see the woodbine twine;
And ilka bird sang o' its Luve,
And sae did I o' mine.
Wi' lightsome heart I pu'd a rose,
Upon its thorny tree;
But my fause Luver staw my rose,
And left the thorn wi' me.
Wi' lightsome heart I pu'd a rose,
Upon a morn in June;
And sae I flourished on the morn,
And sae was pu'd or noon.

This work was published before January 1, 1923, and is in the public domain worldwide because the author died at least 100 years ago.