The Merry Muses of Caledonia/I am a Bard

From Wikisource
Jump to: navigation, search

I AM A BARD.

Tune—"For a' that, and a' that.

This is the song of "the wight o' Homer's craft" in the "Jolly Beggars."

I am a bard of no regard
 Wi' gentle folks, and a' that;
But Homer-like, the glowrin' byke,
 Frae town to town I draw that.

 For a' that, and a' that,
 And twice as muckle's a' that;
 I've lost but ane, I've twa behin'—
 I've wives eneugh for a' that.

I never drank the Muses' stank,
 Castalia's burn, and a' that;
But there it streams, and richly reams,
 My Helicon I ca' that.

For a' that, &c. 


Great love I bear to a' the fair,
 Their humble slave, and a' that;
But lordly will, I hold it still
 A mortal sin to thraw that.

For a' that, &c. 


In raptures sweet, this hour we meet,
 Wi' mutual love, and a' that;
But for how lang the flie may stang,
 Let inclination law that.

For a' that, &c. 


Their tricks and craft have put me daft.
 They've ta'en me in, and a' that;
But clear your decks, and here's—"The Sex!"
 I like the jads for a' that.

 For a' that, and a' that,
 And twice as muckle's a' that;
 My dearest bluid to do them gude.
 They're welcome till't for a' that.