Four excellent songs (1)/Up and warn a' Willie

UP AND WARN A’, WILLIE.

⁠Up and warn a’ Wille,
⁠Warn, warn a’;
⁠To hear my canty Highland sang
⁠Relate the thing I saw, Wille.

When we gaed to the braes o’ Mar,
And to the weapon-shaw, Willie,
Wi’ true design to serve our king
⁠And banish Whigs awa’, Willie.
⁠Up and warn a’, Willie.
⁠Warn, warn a’;
For lords and lairds cam here bedeen,
⁠And wow but they were braw, Willie.

But when the standard was set up,
⁠Right fierce the wind did blaw, Willie;
The royal nit upon the tap
⁠Down to the ground did fa’, Willie,
⁠Up and warn a’ Willie,
⁠Warn, warn a’;
Then second sighted Sandy said,
⁠We’d do nae gude at a’, Willie.

But when the army joined at Perth,
⁠The bravest e’er ye saw, Willie,
We did na doubt the rogues to rout,
⁠Restore our king and a’, Willie,
⁠Up and warn a’ Willie.
⁠Warn, warn a’;
The pipers play’d frae right to left,
⁠O whirry Whigs awa’, Willie.

But when we marched to Sherramuir,
⁠And there the rebels saw, Willie;
Brave Argyle attacked our right,
⁠Our flank, and front and a’, Willie.
⁠Up and warn a’, Willie,
⁠Warn, warn a’;
Traitor Huntly soon gave way,
⁠Seaforth, St Clair and a’, Willie.

But brave Glengary on our right,
The rebel’s left did claw. Willie,
He their the greatest slaughter made,
⁠That ever Donald saw, Willie.
⁠Up and warn a’ Willie,
⁠Warn, warn a’;
And Whittam fyl’d his breeks for fear,
⁠And fast did rin awa, Willie.

For he called us a Highland mob,
⁠And swore he’d slay us a’ Willie;
But we chass’d him hack to Stirling brig,
⁠Dragoons and foot, and a’ Willie.
⁠Up and warn a’ Willie,
⁠Warn, warn a’;
At length we rallied on a hill,
⁠And briskly up did draw, Willie.

But when Argyle did view our line,
⁠And them in order saw, Willie,
He straight gaed to Dumblane again,
⁠And back his left did draw, Willie.
⁠Up and warn a’ Willie,
⁠Warn, warn a’;
Then we to Auchterarder march’d,
⁠To wait a better fa’, willie.

Now if ye speir wha wan the day,
⁠I've tell’d ye what I saw, willie,
We baith did fight and baith were beat,
⁠And baith did rin awa, willie.
⁠Up and warn a’ willie,
⁠Warn, warn a’;
For second sighted Sandy said
⁠We’d do nae good at a’, willie.