Hand-book of Volapük/Abraham e Bäledan

by Charles E. Sprague

Parable; translated by Schleyer. ABRAHAM E BÄLEDAN.

Abraham äsiedom vöno len yan teneda oma, valädöl (segun kösöm omik) foginelis al lotadön omis. Ädalogom bäledani blegöl oki su staf e kömöl al omi. Bäled e töbs ifenoms omi.

Abraham älasumom omi fleno; äbegom omi siadönok, ävatükom futis oma, ed äblinom flukis e vati flifik. Ab logöl das bäledan äfidom ed ädlinom nes sagön pleki, äsäkom ome kikod no äleplekom Godi süla. Bäledan ägepükom das äleplekom te Fili e das no äsevom godi votik.

Abraham äzunom sovemo demü gesag at das äjokom bäledani mofü tened.

Ven at igolom, God ävokom Abrahami ed äsäkom ome kiöp foginel äbinom. Ägesagom: „ejokob omi mofü tened, bi no leplekom oli.“ God äsagom täno ome: „esufob omi du yels tum do änestimom obi; ed ol no-li äkanol sufön omi du neit bal ven no ätupom oli?“

Na Abraham ililom vödis at, ägevokom bäledani, älinkipom omi lotado ed ägivom ome tidamis sapik.

Dunolöd id also e pomesedol fa God Abrahama.