MATTHEW.
CHAPTIR ANE.
The Forebears and Nativitie o’ Christ.
THE buik o’ the generation o' Jesus the Christ, Dauvid’s son, the son o’ Ab’ram.
2. Ab’ram begat Isaac; and Isaac begat Jaucob ; and Jaucob begat Judah and his brethren.
3. And Judah begat Pharez and Zarah o’ Tamar; and Pharez begat Esrom; and Esrom begat Aram.
4. And Aram begat Aminadab ; and Aminadab begat Naasson ; and Naasson begat Salmon.
5. And Salmon begat Boaz, o' Rahab ; and Boaz begat Obed, o’Ruth ; and Obed begat Jesse.
6. And Jesse begat Dauvid the king ; and Dauvid the king begat Solomon, o’ her wha was Uriah’s.
7. And Solomon begat Rehoboam ; and Rehoboam begat Abijah ; and Abijah begat Asa.
8. And Asa begat Jehosaphat; and Jehosaphat begat Jehoram ; and Jehoram begat Uzziah.
9. And Uzziah begat Jotham ; and Jotham begat Ahaz ; and Ahaz begat Hezekiah.
10. And Hezekiah begat Manasseh ; and Manasseh begat Amon ; and Amon begat Josiah.
11. And Josiah begat Jehoiachin and his brethren, nar-haun the time they war carry’t awa’ to Babylon.
12. And eftir they cam to Babylon, Jehoiachin begat Salathiel; and Salathiel begat Zerubbabel.
13. And Zerubbabel begat Abiud ; and Abiud begat Eliakim ; and Eliakim begat Azor.
14. And Azor begat Sadoc; and Sadoc begat Achim; and Achim begat Eliud.
15. And Eliud begat Eleazar ; and Eleazar begat Matthan ; and Matthan begat Jaucob.
16. And Jaucob begat Joseph, Mary’s husband, o’ wham was born Jesus, wha is ca’d "The Christ."
17. Sae a’ the generations frae Ab’ram to Dauvid are fowrteen generations ; and frae Dauvid to the takin awa’ to Babylon fowrteen generations; and frae the takin awa’ to Babylon to Christ fowrteen generations.
18. Noo the nativitie o’ Jesus Christ was thisgate : whan his mither Mary was mairry't till Joseph, ’or they cam thegither, she was fund wi’
bairn o' the Holie Spirit.
19. Than her guidman, Joseph, bein an upricht man, and no desirin her name soud be i’the mooth o’ the public, was ettlin to pit her awa’ hidlins.
20. But as he had thir thinhs in his mind, see! an Angel o’ the Lord appearit till him by a dream, sayin, "Joseph, son o’ Dauvid, binna feared to tak till ye yere wife, Mary; for that whilk is begotten in her is by the Holie Spirit.
21. "And she sal bring forth a son, and ye shall ca’ his name JESUS ; for he sal[1] save his folk frae their sins.”
22. Noo, a' this was dune, that it might come to pass what was said by the Lord throwe the prophet,
23. "Tak tent! a maiden sal be wi' bairn, and sal bring forth a son ; and they wull ca’ his name Emmanuel," whilk is, translatit, "God wi' us."
24. See Joseph, comin oot o’ his sleep, did as the Angel had bidden him, and took till him his wife.
25. And leev’d in continence wi' her till she had brocht forth her first-born son ; and ca’d his name Jesus.
- ↑ V. 21. The dourness o’ the Jews, and e'en o’ his ain kith accordin to the flesh, was unco strange. The Angel to Joseph, (and Simeon and Anna,) said naething o’ his bein a great conqueror, but aye to be a blessin to the warld ; and yet they wad has it that he sould be a conquerin King like Dauvid.
