The Book of Scottish Song/Och, hey, Johnnie lad

by Robert Tannahill

Och, hey, Johnnie lad.

[Tannahill.]

Och, hey! Johnnie lad,
⁠Ye're no sae kind's ye should ha'e been;
Och, hey! Johnnie lad,
⁠Ye didna keep your tryst yestreen.
I waited lang beside the wood,
⁠Sae wae and weary a' my lane,
Och, hey! Johnnie lad,
⁠Ye're no sae kind's ye should ha'e been.

I looked by the whinny knowe,
⁠I looked by the firs sae green,
I looked owre the spunkie howe,
⁠And aye I thought ye wad ha'e been.
The ne'er a supper cross'd my craig,
⁠The ne'er a sleep has closed my een,
Och, hey! Johnnie lad,
⁠Ye're no sae kind's ye should ha'e been.

Gin ye were waiting by the wood,
⁠Then I was waiting by the thorn,
I thought it was the place we set,
⁠And waited maist till dawning morn.
Sae be na vex'd, my bonnie lassie,
⁠Let my waiting stand for thine,
We'll awa' to Craigton shaw,
⁠And seek the joys we tint yestreen.

---