Young Lochinvar (1)/Blythe Was She

From Wikisource
Jump to navigation Jump to search


Blythe, blythe and merry was she,
Blythe was she but and ben:
Blythe by the banks of Earn,
And blythe in Glenturin glen.

By Ochtertyre grows the aik,
On Yarrow braes the birken shaw;
But Phemie was a bonnier lass,
Than braes o’ Yarrow ever saw.
Blythe, &c.

Her looks were like a flower in May,
Her smile was like a simmer morn;
She tripped by the banks'o’ Earn,
As light’s a bird upon a thorn.
Blythe, &c.

Her bonnie face it was as meek,
As onie lamb upon the lea:
The ev’ning sun was ne’er sae sweet,
As was the blink o’ Phemie’s e’e.
Blythe, &c.

The Highland hills I’ve wander’d wide,
And o’er the Lowlands I hae been;
But Phemie was the blythest lass,
That ever trod the dewy green.
Blythe, &c.

This work was published before January 1, 1925, and is in the public domain worldwide because the author died at least 100 years ago.