Die Schedelsche Weltchronik (deutsch):168

167 <<<Vorheriges Blatt	Die Schedelsche Weltchronik    Blatt CLXVIII	Nächstes Blatt>>> 169
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

CLXVII verso:

Das sechst alter

Jar der werlt. vi^m. iij.  Jar christi. viij^c. iiij.^[1]

Leo der dritt wardt zu babst erkorn. der was ein hohgelert man vnd von iugent auff in kirchlicher gaistlicher zucht also erzogen vnd vnderwysen. das er wol wirdig was fu^er andere erhebt zewerden. Er was ein keu^eseher. gantzmu^etiger. zu^echtiger. wolgesprecher man vnd ein solcher liebhaber gelerter lewt das er sie von allen o^ertern mit belonungen zu ime zohe. vnd sich in irer gemainschaft vnnd beywesen wunderperlicher weiß erlu^estiget. Er was zeleren. zepredigen. die krancken zebesuchen vnd almu^osen zegeben hohgeflißen. Vnd nach dem er zwayer briester streflichs leben beredet het vnd sie ine darumb auß rachsule vbels beru^echtigten wardt er auff ein zeit in einer letaney vnd procession auß listiger verwarttung derselben briester verzugkt. gefangen. seins babstlichen geschmu^ocks vnd auch seiner zungen vnnd gesihts berawbt. vnd in sant erasmus closter in hu^ot gehalten, vnd ime doch (als bibliothecarius bezeu^egt) die rede vnd das gesihte auß go^ettlicher gnade widergegeben, vnd dar nach durch beystand eins getrewen schlafkamrers in sant peters kirchen gefu^eert vnd darzu Vinisigius der spoletanisch hertzog vmb hilff angeru^eefft. Aber Leo enthieltt sich wenig tag alda. sunder zohe zu ko^enig Carolo in sachsen. vnd darnach auß vermanung desselben ko^enigs wider gein rom. dem gieng die ro^emisch pfafheit vnd volck verr entgegen. Nachfolgend kom auch

Carolus gein rom. daselbst wardt er mit grosser glori. ere vnd freu^ed vomm babst vnd menigclichen empfangen. Vnlang darnach beru^effet der ko^enig die pfafheit vnd das volck in sant peters kirchen. daselbst hielt der babst auff eim predigstu^ol das euangelium christi. vnnd schwu^or darauff das er aller beschuldigter ding vnschuldig wer. vnnd solchs geschahe amm dreyzehenden tag des monats decembris nach cristi gepurt achthundert iar. vnd an dem heilligen weyhennacht tag darnach wardt von Leone den babst Carolus zu ro^emischem kaiser gekro^ent. vnd pipinum seinen sun zu eim ko^enig welschs lands gesalbet. zu letst hat diser leo ein weyts spital bey sannt Peter vom grunnd auff gepawet. vnnd starb im. xxi. iar seins babstthumbs.

Comet erschine in dem iar darinn der vorgenant babst Leo starb. der dann (als ettlich maynen ein anzaigung solchs iamers was.

Jar der werlt. vi^m. xiij.  Jar Christi. viij^c. xiiij.^[2]

Stephanus der vierdt ein ro^emer zohe in dem dritten moitat seins babstthumbs zu kaiser Lubwigen in galliam in die statt aureliam. Dem schicket er Thedolphum den bischoff daselbst mitsambt der pafheit erlich entgegen. Er empfienge ine auch selbs pers^enlich mit großer wirdigkeit vnd ereerbiettung. Diser Stepbanus was von edeln eltern geeporn vnd solcher schriftlicher weißheit vnnd gantzmu^eetigkeit das er von menigclichem heillig geachtet wardt. Vnd als sie sagen so hat er den benanten ludwig gesalbet vnd gekro^enet vnd ist nach mancherlay hanndlungen. die sie von befridung welschs lands miteinander hetten wider gein rom gezogen. mit ime ein creu^etz groß weerds vnd großer ko^estlichkeit daselbsthin bringende. die Ludwig von seinem gu^ot sant Petern schencket. vnd diser heilligst Stephanus starb in dem sibenden monat seins babsttbumbs.

Pascalis ein ro^emer wardt on einichen des kaisers gewalt zu babst erkorn. darumb alßpald er das babstthumb empfieng do schicket er zu kaiser Ludwigen sein bottschafter. die die schuld diser sachen auff die pfafheit vnd volck werffen solten als ob er von inen bezwungen worden weer das babsttbumb anzenemen. des was Ludwig begnu^egig. vond sprach das dem volck vnnd der pfafheit irer o^ebernn satzung vnd ordnung zehalten weren. aber sie sollen sich hinfu^ero hu^eetten die maiestat zeuerletzen. Disen Pascalem setzet babst Stephanus dieweil er noch lebet von seyner tugent vnd lere wegen vber sant Stephans des martrers closter. vnnd er hat ettliche gepew der gotzhewßer auffgericht. erettliche vernewet. vnd ettlicher heilligen leichnam an erlichere ort bestattet. Vnd ist zu lest im fibenden iar. dritten monat am. xvij. tag seins babstthumbs gestorben. vnd der stu^ol ru^oet deßmals vier tag.

CLXVIII recto:

Blat CLXVIII

der werlt

Carolus mit dem zu^onamen der gross von seiner fu^ertreffenlichen verdienstnus. sunders glawbens vnd freyheit wegen ob allen cristen dann nach dem er seinem vetterlichen ko^enigreich nit allain in gallia. amm rein. amm meer vnnd in teu^etschem lannd an der Thonaw vnd Sala dem fluss. auch aquitaniam. vasconiam vnd schier gantz hispaniam vnd in welschem land die longobardischen gegent mit macht vnd kraft zugefu^eegt. sunder auch sachsen land. das nit ein kleiner teil teu^etscher nation ist. vnd bede pannoniam vnnd ihenßhalb der thonaw daciam. histriam. vnd das gantz liburnisch ko^enigreich. auch alle barbarische vo^elcker in teu^etschem lannd zwischen der thonaw. dem meer vnd rheyn wonende. eins teyls mit waffen. vnnd eins teils mit gu^ottat in seinen gewalt gebracht hat. so hat er ime mit solchen reichthu^emern vnd mit also fu^ertreffenlich geu^ebten tathen disen namen vnd ru^om. nit allain in gallia sunder durch alle werlt auß erkriegt. vnd in dem iar vnßers hails achthundert vnd eins. in dem fu^enften iar Leonis des babsts (nach dem als constantinus der groß rom verließ vnd in den aufgang gein constantinopel zohe vnd das ro^emisch kaiserthumb. iij^c. xxx. iar imm niderganng nach Augustulo feyret) hat diser Carolus mit seiner tugent vnd kraft das kaiserthumb wider in den nidergang gebracht. vnd den namen vnnd wirdigkeit eins kaisers mit willen vnd frolockung des ro^emischen volcks empfangen. vnd also. xiiij. iar als kaiser geherrschet. vnd darnach in gedechtnus seiner erlangten kaiserlichen wirdigkeit die statt Florentz (die ettwen zumm merern tail von den gothis zerru^edet wardt) in iren vorigen stand gesetzt vnd allen adel durch die nahendgelegnen stettlein schlo^eßer vnd marckt zerstrewet wider in dieselben statt gefu^eert. mit newen zynnen eingefangen vnd mit gotzhewßern gezieret Diser Carolus was gerader person. prayter prust vnd achßeln grosser frischer awgen. ein wenig echebter nasen. vnnd wolgestaldts scho^ens munds. heller stymm vnd in allem seinem wandel vnd bewegnus des leibs erberer vnd tapfferer sitten vnnd geperde. langs parts. gesunder complex vnnd nach gallischem sitten zu iagung des willprets geflißen. vermainende ime solchs zu gesuntheit des leibs dienstlich zesein. Man sagt auch das er in baden vnd natu^erlich warmen wassern viel ergetzlichkeit vnnd erlu^estigung gesucht. vnd deßhalb in der statt ach do des reichs vnd sein ko^enigclicher stu^ol was mit großer kost vnd darlegung ein kirchen der heilligen iunckfrawen Marie gepawt. vnd darein das schwais tu^och vnd der seligsten Marie hembd geschickt. Zusambt seinen ko^enigclichen tugenten wz er wolgesprech vnd redper vnd gu^oter kunst vnderrichtet vnd gelert. Er hett bey vil weibern scho^ene kinder. vnd sunder bey Hildegarde seinem gemahel. Carolum Pipinum Ludwicum. vnd mer to^echter. Die su^en befalhe er hohgelertten lewten sie schriftlicher kunst vnd weißheit zeunderrichten. Aber die to^echter auff das sie von mu^essigkeit nit treg wu^erden tet er des wolwercks gewonen. Als aber Carolus yetzo mit alter beladen vnd Pipinus sein sun der ko^enig welschs lands zu Mayland gestorben was do hat er Ludwigen seinen iungern sun zu eim ko^enig aquitanie vnd zu einem nachkomen des kaiserthumbs vnd Bernhardum sein einiklein zu einem ko^enig welschs lands geordnet. vnd ime befolhen das er demselben Ludwigen in allen dingen gehorsam erscheynen solt. Diser Carolus hat seinen nachkomen nit allain das frantzosisch ko^enigreich sunder auch den namen der kaiser bestenndigt. Als er zu iungst von Ach auß auff das waydwerck oder geiagde gezogen wz do kom er mit eim fieber vnd schmertzen der seytten wider haym. vnd starb imm. lxxij. iar seins alters. imm. xlvij. iar seins regiments. vnd in dem. viij^c. vnd. xv. iar der gepurt christi. vnnd ligt zu Ach begraben. Drey iar vor seinem tod machet er ein testament vnd ordnung zegeben. zwen tayl den hawbtbischoffen zu stewr an die kirchen vnd zu hilff den armen, vnnd den drittayl seinen kindern vnd enicklein. nach gepu^erlicher anzal ir yedes. Vnder andern schetzen waren vorhanden drey silberin tisch. vnd ein fast großer guldiner tisch, auff der einem was entworffen die gleichnus der statt constantinopel. den schicket er sant peters kirchen zu rom. Auff dem andern die gleichnus der statt rom. den vermaynet er der kirchen zu rauanna. Der dritt begriffe die beschreibung dess gantzen vmbkrays. Denselben vnd auch den gulden tisch ließer er seinen su^enen.

Diser zeit hat ein iud in Syria zu schmah den christen das pild christi mit einer lantzen durchstochen. vnd ist alßpald ymmerdar plu^ot herauß gefloßen. do erschracke der iud des wunderperlichen dings vnnd hielt ein gefeß fu^er die wunden vnd fieng das plu^ot darein. von dem warden vil menschen gesund. vnd mer iuden zumm cristenlichen glawben bekert. Dasselb plu^ot wardt darnach gein mantua gebracht. daselbst ist es von manigfeltiger da bey beschehner wunderzaichen wegen in großem weerde vnd ru^om gehalten. Als Carolus die ding ho^eret do schribe er dem babst Leoni ine der ding zeberichten. demnach zohe babst leo gein Mantua beweret das plu^ot vnd kom zu carolo vnnd vnderrichtet ine erfarner warheit solcher wunderperlicher ding.

---

1. 6003. Jahr der Welt, 804 n. Chr.
2. 6013. Jahr der Welt, 814 n. Chr.