Dits de Watriquet de Couvin/Dis du Roi
Roys des Francs, haez les desroys;
regardez com li roys des roys
Jhesucrist, qui les siens avoie,
com de loins vous a mis a voie
de lui bien connoistre et amer.
En terre vous a fait clamer
roy de François la noble gent.
Certes, ci a don bel et gent;
en grant digneté parcreu
bien vous a de loing pourveu.
Moult li devez bien obeir:
encore vous puet il eschaïr
de li plus grant reaume assez;
c'est paradis qui a passez
touz les royaumes de cest monde.
Roys, vo vie doit estre monde
et nete de vilains pechiez,
et vos cors si bien entechiez
c'ons praigne a vous bonne essemplaire.
Si pourrés miex a tous ceus plaire
de qui vous estez roys clamez.
Bien doit de vous Diex estre amez
et bien part que il vous a chier
quant de si loins vous volt huchier
por les François metre en vo garde.
Gentilz roys, dont or prenez garde
a quelle heure a vous les livra:
ce fu au jour qu'il delivra
les siens de la paine d'enfer.
Le cuer aurés plus dur que fer
se vous a ce jour ne pensez
et la glosse n'en dispensez,
si com bon roys qui doit penser
de sa vie a droit dispenser.
Roys, au jour du bon venredi,
si voir comme je le vous di,
vous fist Dieus roys de tous les Frans,
or soiez dont courtois et frans,
justez, piex et misericors,
si com Diex fist, qui tout son cors
volt as felons juis livrer
por les siens d'enfer delivrer.
A cel jour furent delivrez
qu'il vous fist roy; donques livrez
vo cuer a oir et entendre
a quel fin la glosse veut tendre
du vendredi aprés complie,
que consommee et acomplie
fu de Dieu toute la promesse.
Cilz jours vous doit tenir en presse
le cuer que il ne se desvoie
a oeuvre ou mal son temps emploie.
Penssez de vostre regne acroistre:
vous devez miex les bons connoistre
assez c'uns nouviaus aprentis.
Roys, soiez donque ententilz
au pueple Dieu le souverain pere.
Gouvernez si que il li pere
et des tormens les rachetez
ou tant de cors et de chatez
sont de longue main enbatus,
car sur paine d'estre batus
les a Dieux en vos garde mis.
Desfendez les des annemis;
vous estez chiés et garde d'iaus.
Roys, cil anemi sont bediaus,
et prevos, serjans et baillis
dont vo pueples est malbaillis.
Tel gent sont du monde escilleur,
advocat et faus conseilleur;
chascuns i grape et arapine.
Et si a gent d'autre couvine
qui les ont navrez laidement.
Faites par vos gouvernement,
gentilz roys, qu'il soient sanez
et hors du meschief les planez.
Metez y I petit de paine;
Dieu vous en fist don et estraine
de son royaume a ce saint jour,
por ce qu'il veut que sans sejour
ses povres gens li delivrés
du meschief ou il sont livrés.
Si com a cel jour delivra
les bons quant à mort se livra,
faites qu'il en soient delivrés;
N'i espargniez ne mars ne livres
et les gardez d'estre essilliez,
gentilz roys, et si esveilliez
loyauté, droiture et raison.
Faites les en vostre maison
demourer avec charité
et si prenez a verité
conseil de vos bonnes paroles,
si que bien soit li sains empoles
emploiés dont vous estez oins.
Gentilz roys, or vous soit cilz poins
en vo cuer escrips et portrais,
car vous estez nez et estrais
touz de roys de IIII costez.
S'an doit de vous miex estre ostez
orgueil, qui ainz bons ne vot estre,
gentilz roys, et quant de tel estre
vous a Dieus pour soy esleu
de si loing c'om n'a pas veu
que se soit euvre naturee,
aiez vostre escuree
des mauvés, si nul en y a,
car, quant Diex a vous otroya
la couronne de ces François,
bien vous avoit monstré ançois
qu'il est puissant d'un autre metre
quant il s'en voudra entremetre,
se justement ne's gouvernez,
et a ce garde ne prenez
que vostre vie a droit lignie
soit selonc la noble lignie
dont estrais estez et venus.
Et quant des grans et des menus
vous a Diex fait en terre chief,
se vous voulez venir a chief
du royaume a droit maintenir,
le conseil vous convient tenir
qui bons est, biaus et loyaus
des IIII vertus principaus,
seur toutes de plus grant arroy,
qu'Aristotes escrit au roy
Alixandre qu'il fust vestus
et aournez de ces vertus
qui sur toutes ont grant renon.
La premiere sagesce a non,
qui par le vrai entendement
gouverne l'omme sagement
si que droiture en soi maintient.
Li autre, se bien m'en souvient,
est appelee a droit justice,
qui soi maismes et autre justice
et fait a chascun justement
raison juste; or orrez comment.
La tierce est appellee aprés,
qui bonne est de loing et de prés
et tost et tart, et main et tempre;
c'est la vertus qui miex atempre
fol hardement et couardisse.
Entre ces II raison l'a misse
por homme garder de dommage;
s'a non force de grant courage.
Moult est ceste vertus puissans
et bonne, car elle est croissans
a haute honneur de plus en plus:
a point oeuvre et nient a seurplus.
Bien scet contre vice estriver
et faire enprandre et achever
sans paour tout seurement
quan c'om puet par vrai hardement
et a juste cause entreprendre,
et fait fol hardement reprendre
et a mesure ramener.
Bon fait a tel point assener
a haute honneur et a bien faire.
Ceste vertus doit tres bien plaire
a tous les princes de haut pris
que il soient duit et apris
de couardisse desdaingnier.
Elle sait les poins enseignier,
c'on ne doit douter nulle enprisse
qui par raison doit estre enprisse.
Ceste vertus doit a tous plaire.
Et la quarte est de tel afaire,
de tel nature et de tel fait
que riens encontre Dieu ne fait.
C'est atemperance la senee,
qui n'est pas en lieu assenee,
qui entechiez soit de lait visce.
Ceulz fait amer le Dieu service
qui l'ainment de cuer et honneurent
et o lui main et soir demeurent;
et certes a bonne heure vit
son regne qui demeure et vit
en atemperance qui mesure
toute riens a juste mesure
et fait nature en homme vivre.
Roys, ces IIII vertus vous livre
pour gouverner vous et les vostres.
Si com Dieu fist de IIII apostres
IIII benois evangelistres,
souverains tesmoins et menistres
de nostre foy a maintenir,
fais ces IIII vertus tenir
sur toutes a plus souverainnes
et les meilleurs et plus hautaignes
por bien gouverner en tout tans:
bonnes vous sont et proufitans
et ont a tous autres esté.
Or vous en ay amonnesté
pour ce que miex vous en soveingne
et que tous jours a l'ueil vous veingne
que vous tant ne quant n'estrivez
a atemprance, mais vivés
par son conseil et par son los.
Seur toute rien je le vous los
et me batez s'il vous em poise,
car elle tout compasse et poisse
quanqu'il faut par nature au cors.
Se vous estez de ces acors
et vous vueilliés son conseil croire,
le mangier a point et le boire
vous aprendra bien a usser
et touz outrages refusser
vous fera de charniex delis.
Atemprance est la fleur de liz
et rose de toute vertus.
Gentilz rois, soiez ent vestus
et de lui si apris et duis
que de tous vos autres deduis
prenez par atemprance a point,
ne ne metez vostre cuer point
outre raison aprés ces chaces
n'a ces rivieres, car les traces
perent a ceus trop malement
qui en pranent l'esbatement
sans atemprance, outre mesure.
Et mains li cors du prince en dure
quant il en use du seurfait.
Et vous savez qu'il ne sont fait
au monde pour autre achoison
que pour la recreacion
du cors quant il en est mestiers.
Por el n'est fait cilz biax mestiers
c'om en praigne par atemperance
et a point, et j'ai esperance
qui ainsi user en voudroit
lui et autrui miex en pourroit
gouverner bien et a point.
Gentilz rois, dont prenez l'a point.
En atemprance vous tenez;
justice et force maintenez,
et courage et sagesce a droit.
Il vous est mestier orendroit
d'estre bons trop plus c'onques mais/
Vostre royaume est I droit mais
et avril sus touz ceulz du monde
et cilz ou plus d'onneur habonde
et que Diex miex vous ainmera
ne nulz fors lui ne clamera
seur vous poesté ne hausage.
Gentilz roys, dont faites que sage:
metez paine d'estre aournez
de ces vertus et vous tenez
nuit et jour si a Dieu servir,
que le don puissiez deservir
en cest royaume terien
d'estre roys ou celestien
avec ces sains en paradis.
Gentilz roys, pour vous est diz
et rimés cilz enseignemens:
Dieus doint que vos commancemens
vous atraie a la bonne fin.
Ditez ent amen de cuer fin.
Explicit le dit du roy.