Lanquan lo temps renovelha

Jaufré Rudel

Der Troubadour Jaufre Rudel, sein Leben und seine Werke

A. Hettler, 1873 (p. 69-71).

Lanquan lo temps renovelha
e par la flors albespina,
ai talant d’un chant novelh,
e son florit l’albespi
[qu’ieu sai cum lo chans refri]
doussament per miei la bruelha,
lo rossinhols s’esbaudeja.

E quan lo boscs reverdeja
nais fresca e vertz la fuelha,
adoncas ieu reverdei
de joi e florisc cum suelh,
ab lo dous chan del mati,
que fan d’amor li auzelh,

jauzens somon al aurelha.

E pus l’us l’autre s’enselha,
el par ves sa par s’aizina,
de no8 es dregz, que s’enselh
quascus d’atretal aizi
ab fin’ amor ses erguelh,
qu’ieu conoso assatz e vey,
pus la malvestatz s’orguelha
qu’amors non deu far enveja.
 
Jois ab amar cabaleja,
es veston d’una despuelha,
e cui que desabalei,
d’escassedat mi despuelh ;
amors si senh ab joi fi,
e jois fa d’amor capdelh,
e malvestatz, que no fina,
baissa pretz el descapdelha.

Cortezament assembelha
amors vera e s’afina,
que de joi fa son sembelh,
per qu’ieu plus ves lieis acli,
e malvestatz dezacuelh
pretz, que no sap on s’estei,
per qu’ieu laus, jovens acuelha
amor et ab lieis esteja.

Aissi voluda e guerreja
mal lo ben, que dieus lur tuelha,
als avars, qui ieu guerrei,
mais no val re so quels tuelh,
ans porta jovens tapi
s’amors noi fai son apelh
tota joja s’atapina
c’uns no vol pretz ni l’apelha.
 
Res el mon non es plus belha
d’amor veraja vezina,
ni re non tenc mai per belh
nim vol aver a vezi
ves nulha part on reduelh,
qu’ieu puesca trobar mersei,

rics malvatz gara e rodelha,
et amors ri e merseja.
 
Sobrels melhors senhoreja
mos chans, en qua ! guizam vuelha,
els motz laissans senhorei
eis sai dir aissi cum vuelh ;
e vec vos del vers la fi,
qu’en Grimoartz vos espelh,
qu’ab joi lo las e l’afina,
sis qui bei chant nil espelha.