Comme leres fossiers que l’on prent en emblée ;
Et ta moillier sera honis et vergondée.
Perçoivre te fera com as male pensée
Et la grant traïson qu’as envers lui menée,
Quant, por l’amor Doon de Nantueil la contrée,
Weus movoir guerre à roi de la terre honorée.
Ja le chaça il fors de la suie contrée ;
En la terre de Puille fuï à recelée ;
Or en weus tu avoir autre tele sodée.
Foi que doi le mien pere à le chiere membrée,
Poi s’en faut ne t’oci à m’espée acérée. »
Tost et isnellement mist la main à l’espée ;
Savaris de Tolouse li a ens reboutée.
Comme li dus le vit, s’a la chiere crolée ;
Il a juré sa fame que il a tant amée,[1]
Que mar se le pensa, folie fist provée,
Ne mar avoit tendue sa main envers s’espée.
Grant ire ot li dus Bues, quant il ot et entent
Que Charles li manda .i. si fier mandement
Et que Loihiers le vost ocirre si briement ;
A grant honte le tint et à despitement.
Il a dit à Loihier : « Vos parles sotement ;
Que par l’ame de moi, se je à Deu la rent,
Molt s’en faut petitet k’orendroit ne vos pent.
Ne feroie por Charle la monte d’un besant.
Quant prist guerre à Doon par son entiscement,
Il le vint aseoir sens nul detriement ;
A lui se combati sous Nantueil voirement.
Là le vainqui li rois, jel sai à escient,
Mais ce fu par l’esfors d’une paiene gent
Qui tornerent en fuie com traïtor pullent.
Dex ! tant home i ot mort et ocis et sanglant,
L’emperere de Rome en fu lies et joiant ;
Se il l’en fist fuïr par son esforcement,
Il est or revenus ; à Deu merci en rent.
Tot malgré Charlemaigne cui la corone apent,
Avons fait entre nos .i. tel afaitement ;
- ↑ 545 B C Il en a juré l’ame de sa mere onorée.
