N salut
N salut.
Cialëde tanc che ncuei s' à abinà ntëur
A nosc Seniëur Pluvan per i fé drët unëur,
N unëur che l s' à tan bën merità
Do vint ani de cura y dut chël che l à fà.
Perdona, sce ncuei ie te dé dl tu;
Crëme, chësc vën de cuer mo tan plu,
L ne ie per mela crianza,
Ses bën, nëus poec on chësta usanza.
Bele da jëunn nosc cumpani ieste stat,
Po ti studi cun flais este fat,
Po cun gran zelo ieste stat nosc caplan,
Po nosc curat y śën d' Urtijëi l prim pluvan.
Tu dires: “M' ëis fat for mé bel sul mus,
Ma do l spinel truepa mueies y ferdrus”;
Son danz puera jënt, perdonenes mefun
A mi, a Tone, a Śepl y a Stefun.
Tu t' es ncurà de nosc bën spirituel
Y suvënz nce per tanc dl bën materiel:
Tan de pueresc y descunsulei che t' es judà,
Y de mantenì la pesc t' es daniëura purvà.
La curtina y la dlieja es judà a ngrandì,
Acioche stajons n vita y do mort plu saurì,
Per la scoles y tan d' autra cosses truep es fà
Da vint ani y plu, per nosc bën es for laurà.
Cun tan de dutrines, perdiches, nsegnamënc
Che Tu t' es purvà, che restons biei valënc.
Ma tan suvënz ti amunizions à puech juà,
Y co t' arala pa po tl cuer muià!
Ma ch'l bel Die tën pa de dut cont
Y paia pa autramënter che chësc mond,
Y do la fadies y l lëur de chisc puec dis
De premio te donel pa l bel paravis.
Ma no mo prësc, mo giut muesses sté
Pra nëus y purvé de nes custemé;
Ulessan nce nëus lassù te fé cumpania,
Scebën che nosc merit sarà pitl o nia.
Y ie è mo na gauja de me ralegré,
Perchël ei nce purvà tan bel de cianté,
Percie ie é fat gor n bel vadani
A giapé ncuei n tel bon cumpani.
Śën ëssi pa mi pitla ciantia bën finà,
Medrë che la v' ëssa scusà y no stufà,
Po uei pa bën inò na urela bel chiet scuté,
Percie l ie pa bën n taicher per gherdëina a dihtené.