(prononçaedje espontané)
Dinltins, mafwè, on djouwéve ås cwåtes come ça, ossu bén e plin après-nonne, cwand i gn aveut rén a fé. On s’ rashonnéve deus troes copins eshonne, ubén del famile. Et… on djouwéve ås cwåtes.
Mins il avént invité ene Lidjeuse ki rivneut tchaeke anêye. Et elle esteut avou zels, mins ele ni cnoxheut nén, leye, les rizêyes do viyaedje et tot ça, hin. Infén !
Et i djouwèt ene pårt, deus pårts. Et i gn a m’ grand-mere ki dit : « Alez, asteure, hin, on va magnî ene galete ; dj’ a fwait des galetes. » Et do cafè et infén... Ey ele mete li tåve.
A ç’ moumint la, gn a onk ki s’ leve et ki dit ‒ come on dit todi avår la cwand on a håsse di s’ aler soladjî (d’ aler pixhî) : « Ebén mi, dji va låtchî l’ polén. »
Et l’ Lidjeuse si leve ossu, leye. « Ebén, mi, dji va vey li ptit polén da Djôzef, la » dit-st ele. (riyaedjes)
Li riscrijhaedje Rantoele eploye sacwants mots pus tipikes (après-nonne, soladjî)