Beowulf (Harrison and Sharp)

From Wikisource
Jump to: navigation, search
For other versions of this work, see Beowulf.

I. BĒOWULF:

AN ANGLO-SAXON POEM.

II. THE FIGHT AT FINNSBURH:

A FRAGMENT.

WITH TEXT AND GLOSSARY ON THE

BASIS OF M. HEYNE.

EDITED, CORRECTED, AND ENLARGED, BY

JAMES A. HARRISON, LL.D., LITT. D.,

PROFESSOR OF ENGLISH AND MODERN LANGUAGES, WASHINGTON AND LEE UNIVERSITY,

AND

ROBERT SHARP (PH.D. LIPS.), PROFESSOR OF GREEK AND ENGLISH, TULANE UNIVERSITY OF LOUISIANA.

FOURTH EDITION. REVISED, WITH NOTES.

GINN & COMPANY BOSTON-NEW YORK-CHICAGO-LONDON

Entered according to Act of Congress in the year 1883, by JAMES ALBERT HARRISON AND ROBERT SHARP in the Office of the Librarian of Congress, at Washington.

DEDICATED

TO

PROFESSOR F. A. MARCH, OF LAFAYETTE COLLEGE, PA.,

AND

FREDERICK J. FURNIVALL, ESQ. FOUNDER OF THE "NEW SHAKSPERE SOCIETY," THE "CHAUCER SOCIETY," ETC., ETC.


First page of the manuscript

Contents

BĒOWULF.[edit]

THE PASSING OF SCYLD.[edit]

Hwæt! Wē Gār‐Dena in geār‐dagum
þēod‐cyninga þrym gefrūnon,
hū þā æðelingas ellen fremedon.
Oft Scyld Scēfing sceaðena þrēatum,
monegum mǣgðum meodo‐setla oftēah.
Egsode eorl, syððan ǣrest wearð
fēa‐sceaft funden: hē þæs frōfre gebād,
wēox under wolcnum, weorð‐myndum ðāh,
oð þæt him ǣghwylc þāra ymb‐sittendra
ofer hron‐rāde hȳran scolde,  10
gomban gyldan: þæt wæs gōd cyning!
þǣm eafera wæs æfter cenned
geong in geardum, þone god sende
folce tō frōfre; fyren‐þearfe ongeat,
þæt hīe ǣr drugon aldor‐lēase
lange hwīle. Him þæs līf‐frēa,
wuldres wealdend, worold‐āre forgeaf;
Bēowulf wæs brēme (blǣd wīde sprang),
Scyldes eafera Scede‐landum in.
Swā sceal geong guma, gōde gewyrcean,  20
fromum feoh‐giftum on fæder wine,
þæt hine on ylde eft gewunigen
wil‐gesīðas, þonne wīg cume,
lēode gelǣsten: lof‐dǣdum sceal
in mǣgða gehwǣre man geþēon.
Him þā Scyld gewāt tō gescæp‐hwīle
fela‐hrōr fēran on frēan wǣre;
hī hyne þā ætbǣron tō brimes faroðe.
swǣse gesīðas, swā hē selfa bæd,
þenden wordum wēold wine Scyldinga,  30
lēof land‐fruma lange āhte.
Þǣr æt hȳðe stōd hringed‐stefna,
īsig and ūtfūs, æðelinges fær;
ā‐lēdon þā lēofne þēoden,
bēaga bryttan on bearm scipes,
mǣrne be mæste. Þǣr wæs mādma fela,
of feor‐wegum frætwa gelǣded:
ne hȳrde ic cȳmlīcor cēol gegyrwan
hilde‐wǣpnum and heaðo‐wǣdum,
billum and byrnum; him on bearme læg  40
mādma mænigo, þā him mid scoldon
on flōdes ǣht feor gewītan.
Nalas hī hine lǣssan lācum tēodan,
þēod‐gestrēonum, þonne þā dydon,
þē hine æt frumsceafte forð onsendon
ǣnne ofer ȳðe umbor wesende:
þā gȳt hīe him āsetton segen gyldenne
hēah ofer hēafod, lēton holm beran,
gēafon on gār‐secg: him wæs geōmor sefa,
murnende mōd. Men ne cunnon  50
secgan tō soðe sele‐rǣdende,
hæleð under heofenum, hwā þǣm hlæste onfēng.

THE HALL HEOROT.[edit]

Þā wæs on burgum Bēowulf Scyldinga,
lēof lēod‐cyning, longe þrāge
folcum gefrǣge (fæder ellor hwearf,
aldor of earde), oð þæt him eft onwōc
hēah Healfdene; hēold þenden lifde,
gamol and gūð‐rēow, glæde Scyldingas.
Þǣm fēower bearn forð‐gerīmed
in worold wōcun, weoroda rǣswan,  60
Heorogār and Hrōðgār and Hālga til;
hȳrde ic, þat Elan cwēn Ongenþēowes wæs
Heaðoscilfinges heals‐gebedde.
Þā wæs Hrōðgāre here‐spēd gyfen,
wīges weorð‐mynd, þæt him his wine‐māgas
georne hȳrdon, oð þæt sēo geogoð gewēox,
mago‐driht micel. Him on mōd bearn,
þæt heal‐reced hātan wolde,
medo‐ærn micel men gewyrcean,
þone yldo bearn ǣfre gefrūnon,  70
and þǣr on innan eall gedǣlan
geongum and ealdum, swylc him god sealde,
būton folc‐scare and feorum gumena.
Þā ic wīde gefrægn weorc gebannan
manigre mǣgðe geond þisne middan‐geard,
folc‐stede frætwan. Him on fyrste gelomp
ǣdre mid yldum, þæt hit wearð eal gearo,
heal‐ærna mǣst; scōp him Heort naman,
sē þe his wordes geweald wīde hæfde.
Hē bēot ne ālēh, bēagas dǣlde,  80
sinc æt symle. Sele hlīfade
hēah and horn‐gēap: heaðo‐wylma bād,
lāðan līges; ne wæs hit lenge þā gēn
þæt se ecg‐hete āðum‐swerian
æfter wæl‐nīðe wæcnan scolde.
Þā se ellen‐gǣst earfoðlīce
þrāge geþolode, sē þe in þȳstrum bād,
þæt hē dōgora gehwām drēam gehȳrde
hlūdne in healle; þǣr wæs hearpan swēg,
swutol sang scopes. Sægde sē þe cūðe  90
frum‐sceaft fīra feorran reccan,
cwæð þæt se ælmihtiga eorðan worhte,
wlite‐beorhtne wang, swā wæter bebūgeð,
gesette sige‐hrēðig sunnan and mōnan
lēoman tō lēohte land‐būendum,
and gefrætwade foldan scēatas
leomum and lēafum; līf ēac gesceōp
cynna gehwylcum, þāra þe cwice hwyrfað.
Swā þā driht‐guman drēamum lifdon
ēadiglīce, oð þæt ān ongan  100
fyrene fremman, fēond on helle:
wæs se grimma gæst Grendel hāten,
mǣre mearc‐stapa, sē þe mōras hēold,
fen and fæsten; fīfel‐cynnes eard
won‐sǣlig wer weardode hwīle,
siððan him scyppend forscrifen hæfde.
In Caines cynne þone cwealm gewræc,
ēce drihten, þæs þe hē Ābel slōg;
ne gefeah hē þǣre fǣhðe, ac hē hine feor forwræc,
metod for þȳ māne man‐cynne fram.  110
Þanon untȳdras ealle onwōcon,
eotenas and ylfe and orcnēas,
swylce gīgantas, þā wið gode wunnon
lange þrāge; hē him þæs lēan forgeald.

GRENDEL'S VISITS.[edit]

Gewāt þā nēosian, syððan niht becōm,
hēan hūses, hū hit Hring‐Dene
æfter bēor‐þege gebūn hæfdon.
Fand þā þǣr inne æðelinga gedriht
swefan æfter symble; sorge ne cūðon,
won‐sceaft wera. Wiht unhǣlo  120
grim and grǣdig gearo sōna wæs,
rēoc and rēðe, and on ræste genam
þrītig þegna: þanon eft gewāt
hūðe hrēmig tō hām faran,
mid þǣre wæl‐fylle wīca nēosan.
Þā wæs on ūhtan mid ǣr‐dæge
Grendles gūð‐cræft gumum undyrne:
þā wæs æfter wiste wōp up āhafen,
micel morgen‐swēg. Mǣre þēoden,
æðeling ǣr‐gōd, unblīðe sæt,  130
þolode þrȳð‐swȳð, þegn‐sorge drēah,
syððan hīe þæs lāðan lāst scēawedon,
wergan gāstes; wæs þæt gewin tō strang,
lāð and longsum. Næs hit lengra fyrst,
ac ymb āne niht eft gefremede
morð‐beala māre and nō mearn fore
fǣhðe and fyrene; wæs tō fæst on þām.
Þā wæs ēað‐fynde, þē him elles hwǣr
gerūmlīcor ræste sōhte,
bed æfter būrum, þā him gebēacnod wæs,  140
gesægd sōðlīce sweotolan tācne
heal‐þegnes hete; hēold hine syððan
fyr and fæstor, sē þǣm fēonde ætwand.
Swā rīxode and wið rihte wan
āna wið eallum, oð þæt īdel stōd
hūsa sēlest. Wæs sēo hwīl micel:
twelf wintra tīd torn geþolode
wine Scyldinga, wēana gehwelcne,
sīdra sorga; forþām syððan wearð
ylda bearnum undyrne cūð,  150
gyddum geōmore, þætte Grendel wan,
hwīle wið Hrōðgār;‐‐ hete‐nīðas wæg,
fyrene and fǣhðe fela missēra,
singāle sæce, sibbe ne wolde
wið manna hwone mægenes Deniga
feorh‐bealo feorran, fēo þingian,
nē þǣr nǣnig witena wēnan þorfte
beorhtre bōte tō banan folmum;
atol ǣglǣca ēhtende wæs,
deorc dēað‐scūa duguðe and geogoðe  160
seomade and syrede. Sin‐nihte hēold
mistige mōras; men ne cunnon,
hwyder hel‐rūnan hwyrftum scrīðað.
Swā fela fyrena fēond man‐cynnes,
atol ān‐gengea, oft gefremede
heardra hȳnða; Heorot eardode,
sinc‐fāge sel sweartum nihtum
(nō hē þone gif‐stōl grētan mōste,
māððum for metode, nē his myne wisse);
þæt wæs wrǣc micel wine Scyldinga,  170
mōdes brecða. Monig‐oft gesæt
rīce tō rūne; rǣd eahtedon,
hwæt swīð‐ferhðum sēlest wǣre
wið fǣr‐gryrum tō gefremmanne.
Hwīlum hīe gehēton æt hærg‐trafum
wīg‐weorðunga, wordum bǣdon,
þæt him gāst‐bona gēoce gefremede
wið þēod‐þrēaum. Swylc wæs þēaw hyra,
hǣðenra hyht; helle gemundon
in mōd‐sefan, metod hīe ne cūðon,  180
dǣda dēmend, ne wiston hīe drihten god,
nē hīe hūru heofena helm herian ne cūðon,
wuldres waldend. Wā bið þǣm þe sceal
þurh slīðne nīð sāwle bescūfan
in fȳres fæðm, frōfre ne wēnan,
wihte gewendan; wēl bið þǣm þe mōt
æfter dēað‐dæge drihten sēcean
and tō fæder fæðmum freoðo wilnian.

HYGELAC'S THANE.[edit]

Swā þā mǣl‐ceare maga Healfdenes
singāla sēað; ne mihte snotor hæleð  190
wēan onwendan: wæs þæt gewin tō swȳð,
lāð and longsum, þē on þā lēode becōm,
nȳd‐wracu nīð‐grim, niht‐bealwa mǣst.
Þæt fram hām gefrægn Higelāces þegn,
gōd mid Gēatum, Grendles dǣda:
sē wæs mon‐cynnes mægenes strengest
on þǣm dæge þysses līfes,
æðele and ēacen. Hēt him ȳð‐lidan
gōdne gegyrwan; cwæð hē gūð‐cyning
ofer swan‐rāde sēcean wolde,  200
mǣrne þēoden, þā him wæs manna þearf.
Þone sīð‐fæt him snotere ceorlas
lȳt‐hwōn lōgon, þēah hē him lēof wǣre;
hwetton higerōfne, hǣl scēawedon.
Hæfde se gōda Gēata lēoda
cempan gecorone, þāra þe hē cēnoste
findan mihte; fīftȳna sum
sund‐wudu sōhte; secg wīsade,
lagu‐cræftig mon, land‐gemyrcu.
Fyrst forð gewāt: flota wæs on ȳðum,  210
bāt under beorge. Beornas gearwe
on stefn stigon; strēamas wundon
sund wið sande; secgas bǣron
on bearm nacan beorhte frætwe,
gūð‐searo geatolīc; guman ūt scufon,
weras on wil‐sīð wudu bundenne.
Gewāt þā ofer wǣg‐holm winde gefȳsed
flota fāmig‐heals fugle gelīcost,
oð þæt ymb ān‐tīd ōðres dōgores
wunden‐stefna gewaden hæfde,  220
þæt þā līðende land gesāwon,
brim‐clifu blīcan, beorgas stēape,
sīde sǣ‐næssas: þā wæs sund liden,
eoletes æt ende. Þanon up hraðe
Wedera lēode on wang stigon,
sǣ‐wudu sǣldon (syrcan hrysedon,
gūð‐gewǣdo); gode þancedon,
þæs þe him ȳð‐lāde ēaðe wurdon.
Þā of wealle geseah weard Scildinga,
sē þe holm‐clifu healdan scolde,  230
beran ofer bolcan beorhte randas,
fyrd‐searu fūslīcu; hine fyrwyt bræc
mōd‐gehygdum, hwæt þā men wǣron.
Gewāt him þā tō waroðe wicge rīdan
þegn Hrōðgāres, þrymmum cwehte
mægen‐wudu mundum, meðel‐wordum frægn:
"Hwæt syndon gē searo‐hæbbendra
byrnum werede, þē þus brontne cēol
ofer lagu‐strǣte lǣdan cwōmon,
hider ofer holmas helmas bǣron?  240
Ic wæs ende‐sǣta, ǣg‐wearde hēold,
þæt on land Dena lāðra nǣnig
mid scip‐herge sceððan ne meahte.
Nō hēr cūðlīcor cuman ongunnon
lind‐hæbbende; nē gē lēafnes‐word
gūð‐fremmendra gearwe ne wisson,
māga gemēdu. Nǣfre ic māran geseah
eorla ofer eorðan, þonne is ēower sum,
secg on searwum; nis þæt seld‐guma
wǣpnum geweorðad, næfne him his wlite lēoge,  250
ǣnlīc an‐sȳn. Nū ic ēower sceal
frum‐cyn witan, ǣr gē fyr heonan
lēase scēaweras on land Dena
furður fēran. Nū gē feor‐būend,
mere‐līðende, mīnne gehȳrað
ān‐fealdne geþōht: ofost is sēlest
tō gecȳðanne, hwanan ēowre cyme syndon."

THE ERRAND.[edit]

Him se yldesta andswarode,
werodes wīsa, word‐hord onlēac:
"Wē synt gum‐cynnes Gēata lēode  260
and Higelāces heorð‐genēatas.
Wæs mīn fæder folcum gecȳðed,
æðele ord‐fruma Ecgþēow hāten;
gebād wintra worn, ǣr hē on weg hwurfe,
gamol of geardum; hine gearwe geman
witena wēl‐hwylc wīde geond eorðan.‐
Wē þurh holdne hige hlāford þinne,
sunu Healfdenes, sēcean cwōmon,
lēod‐gebyrgean: wes þū ūs lārena gōd!
Habbað wē tō þǣm mǣran micel ǣrende  270
Deniga frēan; ne sceal þǣr dyrne sum
wesan, þæs ic wēne. Þū wāst, gif hit is,
swā wē sōðlice secgan hȳrdon,
þæt mid Scyldingum sceaða ic nāt hwylc,
dēogol dǣd‐hata, deorcum nihtum
ēaweð þurh egsan uncūðne nīð,
hȳnðu and hrā‐fyl. Ic þæs Hrōðgār mæg
þurh rūmne sefan rǣd gelǣran,
hū hē frōd and gōd fēond oferswȳðeð,
gyf him ed‐wendan ǣfre scolde  280
bealuwa bisigu, bōt eft cuman
and þā cear‐wylmas cōlran wurðað;
oððe ā syððan earfoð‐þrāge,
þrēa‐nȳd þolað, þenden þǣr wunað
on hēah‐stede hūsa sēlest."
Weard maðelode, þǣr on wicge sæt
ombeht unforht: "Ǣghwæðres sceal
scearp scyld‐wiga gescād witan,
worda and worca, sē þe wēl þenceð.
Ic þæt gehȳre, þæt þis is hold weorod  290
frēan Scyldinga. Gewītað forð beran
wǣpen and gewǣdu, ic ēow wīsige:
swylce ic magu‐þegnas mīne hāte
wið fēonda gehwone flotan ēowerne,
nīw‐tyrwedne nacan on sande
ārum healdan, oð þæt eft byreð
ofer lagu‐strēamas lēofne mannan
wudu wunden‐hals tō Weder‐mearce.
Gūð‐fremmendra swylcum gifeðe bið,
þæt þone hilde‐rǣs hāl gedīgeð."  300
Gewiton him þā fēran (flota stille bād,
seomode on sāle sīd‐fæðmed scyp,
on ancre fæst); eofor‐līc scionon
ofer hlēor‐beran gehroden golde
fāh and fȳr‐heard, ferh wearde hēold.
Gūðmōde grummon, guman ōnetton,
sigon ætsomne, oð þæt hȳ sæl timbred
geatolīc and gold‐fāh ongytan mihton;
þæt wæs fore‐mǣrost fold‐būendum
receda under roderum, on þǣm se rīca bād;  310
līxte se lēoma ofer landa fela.
Him þā hilde‐dēor hof mōdigra
torht getǣhte, þæt hīe him tō mihton
gegnum gangan; gūð‐beorna sum
wicg gewende, word æfter cwæð:
"Mǣl is mē tō fēran; fæder alwalda
mid ār‐stafum ēowic gehealde
sīða gesunde! ic tō sǣ wille,
wið wrāð werod wearde healdan."

BĒOWULF'S SPEECH.[edit]

Strǣt wæs stān‐fāh, stīg wīsode  320
gumum ætgædere. Gūð‐byrne scān
heard hond‐locen, hring‐īren scīr
song in searwum, þā hīe tō sele furðum
in hyra gryre‐geatwum gangan cwōmon.
Setton sǣ‐mēðe sīde scyldas,
rondas regn‐hearde wið þæs recedes weal,
bugon þā tō bence; byrnan hringdon,
gūð‐searo gumena; gāras stōdon,
sǣ‐manna searo, samod ætgædere,
æsc‐holt ufan grǣg: wæs se īren‐þrēat  330
wǣpnum gewurðad. Þā þǣr wlonc hæleð
ōret‐mecgas æfter æðelum frægn:
"Hwanon ferigeað gē fǣtte scyldas,
grǣge syrcan and grīm‐helmas,
here‐sceafta hēap?‐‐ Ic eom Hrōðgāres
ār and ombiht. Ne seah ic el‐þēodige
þus manige men mōdiglīcran.
Wēn' ic þæt gē for wlenco, nalles for wræc‐sīðum,
ac for hige‐þrymmum Hrōðgār sōhton."
Him þā ellen‐rōf andswarode,  340
wlanc Wedera lēod word æfter spræc,
heard under helme: "Wē synt Higelāces
bēod‐genēatas; Bēowulf is mīn nama.
Wille ic āsecgan suna Healfdenes,
mǣrum þēodne mīn ǣrende,
aldre þīnum, gif hē ūs geunnan wile,
þæt wē hine swā gōdne grētan mōton."
Wulfgār maðelode (þæt wæs Wendla lēod,
wæs his mōd‐sefa manegum gecȳðed,
wīg and wīs‐dōm): "ic þæs wine Deniga,  350
frēan Scildinga frīnan wille,
bēaga bryttan, swā þū bēna eart,
þēoden mǣrne ymb þīnne sīð ;
and þē þā andsware ǣdre gecȳðan,
þē mē se gōda āgifan þenceð."
Hwearf þā hrædlīce, þǣr Hrōðgār sæt,
eald and unhār mid his eorla gedriht;
ēode ellen‐rōf, þæt hē for eaxlum gestōd
Deniga frēan, cūðe hē duguðe þēaw.
Wulfgār maðelode tō his wine‐drihtne:  360
"Hēr syndon geferede feorran cumene
ofer geofenes begang Gēata lēode:
þone yldestan ōret‐mecgas
Bēowulf nemnað. Hȳ bēnan synt,
þæt hīe, þēoden mīn, wið þē mōton
wordum wrixlan; nō þū him wearne getēoh,
þīnra gegn‐cwida glædnian, Hrōðgār!
Hȳ on wīg‐geatwum wyrðe þinceað
eorla geæhtlan; hūru se aldor dēah,
sē þǣm heaðo‐rincum hider wīsade."  370

HROTHGAR'S WELCOME.[edit]

Hrōðgār maðelode, helm Scyldinga:
"Ic hine cūðe cniht‐wesende.
Wæs his eald‐fæder Ecgþēo hāten,
þǣm tō hām forgeaf Hrēðel Gēata
āngan dōhtor; is his eafora nū
heard hēr cumen, sōhte holdne wine.
þonne sægdon þæt sǣ‐līðende,
þā þe gif‐sceattas Gēata fyredon
þyder tō þance, þæt hē þrīttiges
manna mægen‐cræft on his mund‐grīpe  380
heaðo‐rōf hæbbe. Hine hālig god
for ār‐stafum us onsende,
tō West‐Denum, þæs ic wēn hæbbe,
wið Grendles gryre: ic þǣm gōdan sceal
for his mōd‐þræce mādmas bēodan.
Bēo þū on ofeste, hāt hig in gān,
sēon sibbe‐gedriht samod ætgædere;
gesaga him ēac wordum, þæt hīe sint wil‐cuman
Deniga lēodum." Þā wið duru healle
Wulfgār ēode, word inne ābēad:  390
"Ēow hēt secgan sige‐drihten mīn,
aldor Ēast‐Dena, þæt hē ēower æðelu can
and gē him syndon ofer sǣ‐wylmas,
heard‐hicgende, hider wil‐cuman.
Nū gē mōton gangan in ēowrum guð‐geatawum,
under here‐grīman, Hrōðgār gesēon;
lǣtað hilde‐bord hēr onbidian,
wudu wæl‐sceaftas, worda geþinges."
Ārās þā se rīca, ymb hine rinc manig,
þrȳðlīc þegna hēap; sume þǣr bidon,  400
heaðo‐rēaf hēoldon, swā him se hearda bebēad.
Snyredon ætsomne, þā secg wīsode
under Heorotes hrōf; hyge‐rōf ēode,
heard under helme, þæt hē on heoðe gestōd.
Bēowulf maðelode (on him byrne scān,
searo‐net sēowed smiðes or‐þancum):
"Wes þū Hrōðgār hāl! ic eom Higelāces
mǣg and mago‐þegn; hæbbe ic mǣrða fela
ongunnen on geogoðe. Mē wearð Grendles þing
on mīnre ēðel‐tyrf undyrne cūð:  410
secgað sǣ‐līðend, þæt þes sele stande,
reced sēlesta, rinca gehwylcum
īdel and unnyt, siððan ǣfen‐lēoht
under heofenes hādor beholen weorðeð.
Þā mē þæt gelǣrdon lēode mīne,
þā sēlestan, snotere ceorlas,
þēoden Hrōðgār, þæt ic þē sōhte;
forþan hīe mægenes cræft mīnne cūðon:
selfe ofersāwon, þā ic of searwum cwōm,
fāh from fēondum, þǣr ic fīfe geband,  420
ȳðde eotena cyn, and on ȳðum slōg
niceras nihtes, nearo‐þearfe drēah,
wræc Wedera nīð (wēan āhsodon)
forgrand gramum; and nū wið Grendel sceal,
wið þām āglǣcan, āna gehegan
þing wið þyrse. Ic þē nū þā,
brego Beorht‐Dena, biddan wille,
eodor Scyldinga, ānre bēne;
þæt þū mē ne forwyrne, wīgendra hlēo,
frēo‐wine folca, nū ic þus feorran cōm,  430
þæt ic mōte āna and mīnra eorla gedryht,
þes hearda hēap, Heorot fǣlsian.
Hæbbe ic ēac geāhsod, þæt se ǣglǣca
for his won‐hȳdum wǣpna ne rēceð;
ic þæt þonne forhicge, swā mē Higelāc sīe,
mīn mon‐drihten, mōdes blīðe,
þæt ic sweord bere oððe sīdne scyld
geolo‐rand tō gūðe; ac ic mid grāpe sceal
fōn wið fēonde and ymb feorh sacan,
lāð wið lāðum; þǣr gelȳfan sceal  440
dryhtnes dōme sē þe hine dēað nimeð.
Wēn' ic þæt hē wille, gif hē wealdan mōt,
in þǣm gūð‐sele Gēatena lēode
etan unforhte, swā hē oft dyde
mægen Hrēðmanna. Nā þū mīnne þearft
hafalan hȳdan, ac hē mē habban wile
drēore fāhne, gif mec dēað nimeð;
byreð blōdig wæl, byrgean þenceð,
eteð ān‐genga unmurnlīce,
mearcað mōr‐hopu: nō þū ymb mīnes ne þearft  450
līces feorme leng sorgian.
Onsend Higelāce, gif mec hild nime,
beadu‐scrūda betst, þæt mīne brēost wereð,
hrægla sēlest; þæt is Hrēðlan lāf,
Wēlandes geweorc. Gǣð ā Wyrd swā hīo scel!"

HROTHGAR TELLS OF GRENDEL.[edit]

Hrōðgār maðelode, helm Scyldinga:
"for were‐fyhtum þū, wine mīn Bēowulf,
and for ār‐stafum ūsic sōhtest.
Geslōh þin fæder fǣhðe mǣste,
wearð hē Heaðolāfe tō hand‐bonan  460
mid Wilfingum; þā hine Wedera cyn
for here‐brōgan habban ne mihte.
Þanon hē gesōhte Sūð‐Dena folc
ofer ȳða gewealc, Ār‐Scyldinga;
þā ic furðum wēold folce Deninga,
and on geogoðe hēold gimme‐rīce
hord‐burh hæleða: þā wæs Heregār dēad,
mīn yldra mǣg unlifigende,
bearn Healfdenes. Sē wæs betera þonne ic!
Siððan þā fǣhðe fēo þingode;  470
sende ic Wylfingum ofer wæteres hrycg
ealde mādmas: hē mē āðas swōr.
Sorh is mē tō secganne on sefan mīnum
gumena ǣngum, hwæt mē Grendel hafað
hȳnðo on Heorote mid his hete‐þancum,
fǣr‐nīða gefremed. Is mīn flet‐werod,
wīg‐hēap gewanod; hīe Wyrd forswēop
on Grendles gryre. God ēaðe mæg
þone dol‐scaðan dǣda getwǣfan!
Ful oft gebēotedon bēore druncne  480
ofer ealo‐wǣge ōret‐mecgas,
þæt hīe in bēor‐sele bīdan woldon
Grendles gūðe mid gryrum ecga.
Þonne wæs þēos medo‐heal on morgen‐tīd,
driht‐sele drēor‐fāh, þonne dæg līxte,
eal benc‐þelu blōde bestȳmed,
heall heoru‐drēore: āhte ic holdra þȳ lǣs,
dēorre duguðe, þē þā dēað fornam.
Site nū tō symle and onsǣl meoto,
sige‐hrēð secgum, swā þīn sefa hwette!"  490
Þā wæs Gēat‐mæcgum geador ætsomne
on bēor‐sele benc gerȳmed;
þǣr swīð‐ferhðe sittan ēodon
þrȳðum dealle. Þegn nytte behēold,
sē þe on handa bær hroden ealo‐wǣge,
scencte scīr wered. Scop hwīlum sang
hādor on Heorote; þǣr wæs hæleða drēam,
duguð unlȳtel Dena and Wedera.

HUNFERTH OBJECTS TO BĒOWULF.[edit]

Unferð maðelode, Ecglāfes bearn,
þē æt fōtum sæt frēan Scyldinga;  500
onband beadu‐rūne (wæs him Bēowulfes sīð,
mōdges mere‐faran, micel æf‐þunca,
forþon þe hē ne ūðe, þæt ǣnig ōðer man
ǣfre mǣrða þon mā middan‐geardes
gehēdde under heofenum þonne hē sylfa):
"Eart þū sē Bēowulf, sē þe wið Brecan wunne,
on sīdne sǣ ymb sund flite,
þǣr git for wlence wada cunnedon
and for dol‐gilpe on dēop wæter
aldrum nēðdon? Nē inc ǣnig mon,  510
nē lēof nē lāð, belēan mihte
sorh‐fullne sīð; þā git on sund rēon,
þǣr git ēagor‐strēam earmum þehton,
mǣton mere‐strǣta, mundum brugdon,
glidon ofer gār‐secg; geofon ȳðum wēol,
wintres wylme. Git on wæteres ǣht
seofon niht swuncon; hē þē æt sunde oferflāt,
hæfde māre mægen. Þā hine on morgen‐tīd
on Heaðo‐rǣmas holm up ætbær,
þonon hē gesōhte swǣsne ēðel  520
lēof his lēodum lond Brondinga,
freoðo‐burh fægere, þǣr hē folc āhte,
burg and bēagas. Bēot eal wið þē
sunu Bēanstānes sōðe gelǣste.
Þonne wēne ic tō þē wyrsan geþinges,
þēah þū heaðo‐rǣsa gehwǣr dohte,
grimre gūðe, gif þū Grendles dearst
niht‐longne fyrst nēan bīdan!"
Bēowulf maðelode, bearn Ecgþēowes:
"Hwæt! þū worn fela, wine mīn Unferð,  530
bēore druncen ymb Brecan sprǣce,
sægdest from his sīðe! Sōð ic talige,
þæt ic mere‐strengo māran āhte,
earfeðo on ȳðum, þonne ǣnig ōðer man.
Wit þæt gecwǣdon cniht‐wesende
and gebēotedon (wǣron bēgen þā gīt
on geogoð‐feore) þæt wit on gār‐secg ūt
aldrum nēðdon; and þæt geæfndon swā.
Hæfdon swurd nacod, þā wit on sund rēon,
heard on handa, wit unc wið hron‐fixas  540
werian þōhton. Nō hē wiht fram mē
flōd‐ȳðum feor flēotan meahte,
hraðor on holme, nō ic fram him wolde.
Þā wit ætsomne on sǣ wǣron
fīf nihta fyrst, oð þæt unc flōd tōdrāf,
wado weallende, wedera cealdost,
nīpende niht and norðan wind
heaðo‐grim andhwearf; hrēo wǣron ȳða,
Wæs mere‐fixa mōd onhrēred:
þǣr mē wið lāðum līc‐syrce mīn,  550
heard hond‐locen, helpe gefremede;
beado‐hrægl brōden on brēostum læg,
golde gegyrwed. Mē tō grunde tēah
fāh fēond‐scaða, fæste hæfde
grim on grāpe: hwæðre mē gyfeðe wearð,
þæt ic āglǣcan orde gerǣhte,
hilde‐bille; heaðo‐rǣs fornam
mihtig mere‐dēor þurh mīne hand.

BĒOWULF'S CONTEST WITH BRECA.-THE FEAST.[edit]

Swā mec gelōme lāð‐getēonan
þrēatedon þearle. Ic him þēnode  560
dēoran sweorde, swā hit gedēfe wæs;
næs hīe þǣre fylle gefēan hæfdon,
mān‐fordǣdlan, þæt hīe mē þēgon,
symbel ymb‐sǣton sǣ‐grunde nēah,
ac on mergenne mēcum wunde
be ȳð‐lāfe uppe lǣgon,
sweordum āswefede, þæt syððan nā
ymb brontne ford brim‐līðende
lāde ne letton. Lēoht ēastan cōm,
beorht bēacen godes; brimu swaðredon,  570
þæt ic sǣ‐næssas gesēon mihte,
windige weallas. Wyrd oft nereð
unfǣgne eorl, ðonne his ellen dēah!
Hwæðere mē gesǣlde, þæt ic mid sweorde ofslōh
niceras nigene. Nō ic on niht gefrægn
under heofones hwealf heardran feohtan,
nē on ēg‐strēamum earmran mannan;
hwæðere ic fāra feng fēore gedīgde,
siðes wērig. Þā mec sǣ oðbær,
flōd æfter faroðe, on Finna land,  580
wadu weallendu. Nō ic wiht fram þē
swylcra searo‐nīða secgan hȳrde,
billa brōgan: Breca nǣfre gīt
æt heaðo‐lāce, nē gehwæðer incer
swā dēorlīce dǣd gefremede
fāgum sweordum . . . . . . .
. . . . . . . nō ic þæs gylpe;
þēah þū þīnum brōðrum tō banan wurde,
hēafod‐mǣgum; þæs þū in helle scealt
werhðo drēogan, þēah þīn wit duge,
Secge ic þē tō sōðe, sunu Ecglāfes,  590
þæt nǣfre Grendel swā fela gryra gefremede,
atol ǣglǣca ealdre þīnum,
hȳnðo on Heorote, gif þīn hige wǣre,
sefa swā searo‐grim, swā þū self talast.
Ac hē hafað onfunden, þæt hē þā fǣhðe ne þearf,
atole ecg‐þræce ēower lēode
swīðe onsittan, Sige‐Scyldinga;
nymeð nȳd‐bāde, nǣnegum ārað
lēode Deniga, ac hē on lust wīgeð,
swefeð ond sendeð, secce ne wēneð  600
tō Gār‐Denum. Ac him Gēata sceal
eafoð and ellen ungeāra nū
gūðe gebēodan. Gǣð eft sē þe mōt
tō medo mōdig, siððan morgen‐lēoht
ofer ylda bearn ōðres dōgores,
sunne swegl‐wered sūðan scīneð!"
Þā wæs on sālum sinces brytta
gamol‐feax and gūð‐rōf, gēoce gelȳfde
brego Beorht‐Dena; gehȳrde on Bēowulfe
folces hyrde fæst‐rǣdne geþōht.  610
Þǣr wæs hæleða hleahtor; hlyn swynsode,
word wǣron wynsume. Ēode Wealhþēow forð,
cwēn Hrōðgāres, cynna gemyndig,
grētte gold‐hroden guman on healle,
and þā frēolīc wīf ful gesealde
ǣrest Ēast‐Dena ēðel‐wearde,
bæd hine blīðne æt þǣre bēor‐þege,
lēodum lēofne; hē on lust geþeah
symbel and sele‐ful, sige‐rōf kyning.
Ymb‐ēode þā ides Helminga  620
duguðe and geogoðe dǣl ǣghwylcne;
sinc‐fato sealde, oð þæt sǣl ālamp,
þæt hīo Bēowulfe, bēag‐hroden cwēn,
mōde geþungen, medo‐ful ætbær;
grētte Gēata lēod, gode þancode
wīs‐fæst wordum, þæs þe hire se willa gelamp,
þæt hēo on ǣnigne eorl gelȳfde
fyrena frōfre. Hē þæt ful geþeah,
wæl‐rēow wiga æt Wealhþēon,
and þā gyddode gūðe gefȳsed,  630
Bēowulf maðelode, bearn Ecgþēowes:
"Ic þæt hogode, þā ic on holm gestāh,
sǣ‐bāt gesæt mid mīnra secga gedriht,
þæt ic ānunga ēowra lēoda
willan geworhte, oððe on wæl crunge,
fēond‐grāpum fæst. Ic gefremman sceal
eorlīc ellen, oððe ende‐dæg
on þisse meodu‐healle mīnne gebīdan."
Þām wīfe þā word wēl līcodon,
gilp‐cwide Gēates; ēode gold‐hroden  640
frēolīcu folc‐cwēn tō hire frēan sittan.
Þā wæs eft swā ǣr inne on healle
þrȳð‐word sprecen, þēod on sǣlum,
sige‐folca swēg, oð þæt semninga
sunu Healfdenes sēcean wolde
ǣfen‐ræste; wiste æt þǣm āhlǣcan
tō þǣm hēah‐sele hilde geþinged,
siððan hīe sunnan lēoht gesēon ne meahton,
oððe nīpende niht ofer ealle,
scadu‐helma gesceapu scrīðan cwōman,  650
wan under wolcnum. Werod eall ārās.
Grētte þā giddum guma ōðerne,
Hrōðgār Bēowulf, and him hǣl ābēad,
wīn‐ærnes geweald and þæt word ācwæð:
"Nǣfre ic ǣnegum men ǣr ālȳfde,
siððan ic hond and rond hebban mihte,
þrȳð‐ærn Dena būton þē nū þā.
Hafa nū and geheald hūsa sēlest;
gemyne mǣrðo, mægen‐ellen cȳð,
waca wið wrāðum! Ne bið þē wilna gād,  660
gif þū þæt ellen‐weorc aldre gedīgest."

THE WATCH FOR GRENDEL.[edit]

Þā him Hrōðgār gewāt mid his hæleða gedryht,
eodur Scyldinga ūt of healle;
wolde wīg‐fruma Wealhþēo sēcan,
cwēn tō gebeddan Hæfde kyninga wuldor
Grendle tō‐gēanes, swā guman gefrungon,
sele‐weard āseted, sundor‐nytte behēold
ymb aldor Dena, eoton weard ābēad;
hūru Gēata lēod georne truwode
mōdgan mægnes, metodes hyldo.  670
Þā hē him of dyde īsern‐byrnan,
helm of hafelan, sealde his hyrsted sweord,
īrena cyst ombiht‐þegne,
and gehealdan hēt hilde‐geatwe.
Gespræc þā se gōda gylp‐worda sum
Bēowulf Gēata, ǣr hē on bed stige:
"Nō ic mē an here‐wǣsmum hnāgran talige
gūð‐geweorca, þonne Grendel hine;
forþan ic hine sweorde swebban nelle,
aldre benēotan, þēah ic eal mǣge.  680
Nāt hē þāra gōda, þæt hē mē on‐gēan slēa,
rand gehēawe, þēah þe hē rōf sīe
nīð‐geweorca; ac wit on niht sculon
secge ofersittan, gif hē gesēcean dear
wīg ofer wǣpen, and siððan wītig god
on swā hwæðere hond hālig dryhten
mǣrðo dēme, swā him gemet þince."
Hylde hine þā heaðo‐dēor, hlēor‐bolster onfēng
eorles andwlitan; and hine ymb monig
snellīc sǣ‐rinc sele‐reste gebēah.  690
Nǣnig heora þōhte þæt hē þanon scolde
eft eard‐lufan ǣfre gesēcean,
folc oððe frēo‐burh, þǣr hē āfēded wæs,
ac hīe hæfdon gefrūnen, þæt hīe ǣr tō fela micles
in þǣm wīn‐sele wæl‐dēað fornam,
Denigea lēode. Ac him dryhten forgeaf
wīg‐spēda gewiofu, Wedera lēodum
frōfor and fultum, þæt hīe fēond heora
þurh ānes cræft ealle ofercōmon,
selfes mihtum: sōð is gecȳðed,  700
þæt mihtig god manna cynnes
wēold wīde‐ferhð. Cōm on wanre niht
scrīðan sceadu‐genga. Scēotend swǣfon,
þā þæt horn‐reced healdan scoldon,
ealle būton ānum. Þæt wæs yldum cūð,
þæt hīe ne mōste, þā metod nolde,
se syn‐scaða under sceadu bregdan;
ac hē wæccende wrāðum on andan
bād bolgen‐mōd beadwa geþinges.

GRENDEL'S RAID.[edit]

Þā cōm of mōre under mist‐hleoðum  710
Grendel gongan, godes yrre bær.
Mynte se mān‐scaða manna cynnes
sumne besyrwan in sele þām hēan;
wōd under wolcnum, tō þæs þe hē wīn‐reced,
gold‐sele gumena, gearwost wisse
fǣttum fāhne. Ne wæs þæt forma sīð,
þæt hē Hrōðgāres hām gesōhte:
nǣfre hē on aldor‐dagum ǣr nē siððan
heardran hæle, heal‐þegnas fand!
Cōm þā tō recede rinc sīðian  720
drēamum bedǣled. Duru sōna onarn
fȳr‐bendum fæst, syððan hē hire folmum hrān;
onbræd þā bealo‐hȳdig, þā hē ābolgen wæs,
recedes mūðan. Raðe æfter þon
on fāgne flōr fēond treddode,
ēode yrre‐mōd; him of ēagum stōd
līge gelīcost lēoht unfǣger.
Geseah hē in recede rinca manige,
swefan sibbe‐gedriht samod ætgædere,
mago‐rinca hēap: þā his mōd āhlōg,  730
mynte þæt hē gedǣlde, ǣr þon dæg cwōme,
atol āglǣca, ānra gehwylces
līf wið līce, þā him ālumpen wæs
wist‐fylle wēn. Ne wæs þæt wyrd þā gēn,
þæt hē mā mōste manna cynnes
þicgean ofer þā niht. Þrȳð‐swȳð behēold
mǣg Higelāces, hū se mān‐scaða
under fǣr‐gripum gefaran wolde.
Nē þæt se āglǣca yldan þōhte,
ac hē gefēng hraðe forman siðe  740
slǣpendne rinc, slāt unwearnum,
bāt bān‐locan, blōd ēdrum dranc,
syn‐snǣdum swealh: sōna hæfde
unlyfigendes eal gefeormod
fēt and folma. Forð nēar ætstōp,
nam þā mid handa hige‐þīhtigne
rinc on ræste; rǣhte ongēan
fēond mid folme, hē onfēng hraðe
inwit‐þancum and wið earm gesæt.
Sōna þæt onfunde fyrena hyrde,  750
þæt hē ne mētte middan‐geardes
eorðan scēata on elran men
mund‐gripe māran: hē on mōde wearð
forht on ferhðe, nō þȳ ǣr fram meahte;
hyge wæs him hin‐fūs, wolde on heolster flēon,
sēcan dēofla gedræg: ne wæs his drohtoð þǣr,
swylce hē on ealder‐dagum ǣr gemētte.
Gemunde þā se gōda mǣg Higelāces
ǣfen‐sprǣce, up‐lang āstōd
and him fæste wiðfēng. Fingras burston;  760
eoten wæs ūt‐weard, eorl furður stōp.
Mynte se mǣra, þǣr hē meahte swā,
wīdre gewindan and on weg þanon
flēon on fen‐hopu; wiste his fingra geweald
on grames grāpum. Þæt wæs gēocor sīð,
þæt se hearm‐scaða tō Heorute ātēah:
dryht‐sele dynede, Denum eallum wearð,
ceaster‐būendum, cēnra gehwylcum,
eorlum ealu‐scerwen. Yrre wǣron bēgen,
rēðe rēn‐weardas. Reced hlynsode;  770
þā wæs wundor micel, þæt se wīn‐sele
wiðhæfde heaðo‐dēorum, þæt hē on hrūsan ne fēol,
fǣger fold‐bold; ac hē þæs fæste wæs
innan and ūtan īren‐bendum
searo‐þoncum besmiðod. Þǣr fram sylle ābēag
medu‐benc monig mīne gefrǣge,
golde geregnad, þǣr þā graman wunnon;
þæs ne wēndon ǣr witan Scyldinga,
þæt hit ā mid gemete manna ǣnig
betlīc and bān‐fāg tōbrecan meahte,  780
listum tōlūcan, nymðe līges fæðm
swulge on swaðule. Swēg up āstāg
nīwe geneahhe; Norð‐Denum stōd
atelīc egesa ānra gehwylcum
þāra þe of wealle wōp gehȳrdon,
gryre‐lēoð galan godes andsacan,
sige‐lēasne sang, sār wānigean
helle hæftan. Hēold hine tō fæste
sē þe manna wæs mægene strengest
on þǣm dæge þysses līfes.  790

BĒOWULF TEARS OFF GRENDEL'S ARM.[edit]

Nolde eorla hlēo ǣnige þinga
þone cwealm‐cuman cwicne forlǣtan,
nē his līf‐dagas lēoda ǣnigum
nytte tealde. Þǣr genehost brægd
eorl Bēowulfes ealde lāfe,
wolde frēa‐drihtnes feorh ealgian
mǣres þēodnes, þǣr hīe meahton swā;
hīe þæt ne wiston, þā hīe gewin drugon,
heard‐hicgende hilde‐mecgas,
and on healfa gehwone hēawan þōhton,  800
sāwle sēcan, þæt þone syn‐scaðan
ǣnig ofer eorðan īrenna cyst,
gūð‐billa nān grētan nolde;
ac hē sige‐wǣpnum forsworen hæfde,
ecga gehwylcre. Scolde his aldor‐gedāl
on þǣm dæge þysses līfes
earmlīc wurðan and se ellor‐gāst
on fēonda geweald feor sīðian.
Þā þæt onfunde sē þe fela ǣror
mōdes myrðe manna cynne  810
fyrene gefremede (hē wæs fāg wið god)
þæt him se līc‐homa lǣstan nolde,
ac hine se mōdega mǣg Hygelāces
hæfde be honda; wæs gehwæðer ōðrum
lifigende lāð. Līc‐sār gebād
atol ǣglǣca, him on eaxle wearð
syn‐dolh sweotol, seonowe onsprungon
burston bān‐locan. Bēowulfe wearð
gūð‐hrēð gyfeðe; scolde Grendel þonan
feorh‐sēoc flēon under fen‐hleoðu,  820
sēcean wyn‐lēas wīc; wiste þē geornor,
þæt his aldres wæs ende gegongen,
dōgera dæg‐rīm. Denum eallum wearð
æfter þām wæl‐rǣse willa gelumpen.
Hæfde þā gefǣlsod, sē þe ǣr feorran cōm,
snotor and swȳð‐ferhð sele Hrōðgāres,
genered wið nīðe. Niht‐weorce gefeh,
ellen‐mǣrðum; hæfde Ēast‐Denum
Gēat‐mecga lēod gilp gelǣsted,
swylce oncȳððe ealle gebētte,  830
inwid‐sorge, þē hīe ǣr drugon
and for þrēa‐nȳdum þolian scoldon,
torn unlȳtel. Þæt wæs tācen sweotol,
syððan hilde‐dēor hond ālegde,
earm and eaxle (þǣr wæs eal geador
Grendles grāpe) under gēapne hrōf.

THE JOY AT HEOROT.[edit]

Þā wæs on morgen mīne gefrǣge
ymb þā gif‐healle gūð‐rinc monig:
fērdon folc‐togan feorran and nēan
geond wīd‐wegas wundor scēawian,  840
lāðes lāstas. Nō his līf‐gedāl
sārlīc þūhte secga ǣnegum,
þāra þe tīr‐lēases trode scēawode,
hū hē wērig‐mōd on weg þanon,
nīða ofercumen, on nicera mere
fǣge and geflȳmed feorh‐lāstas bær.
Þǣr wæs on blōde brim weallende,
atol ȳða geswing eal gemenged
hātan heolfre, heoro‐drēore wēol;
dēað‐fǣge dēog, siððan drēama lēas  850
in fen‐freoðo feorh ālegde
hǣðene sāwle, þǣr him hel onfēng.
Þanon eft gewiton eald‐gesīðas,
swylce geong manig of gomen‐wāðe,
fram mere mōdge, mēarum rīdan,
beornas on blancum. Þǣr wæs Bēowulfes
mǣrðo mǣned; monig oft gecwæð,
þætte sūð nē norð be sǣm tweonum
ofer eormen‐grund ōðer nǣnig
under swegles begong sēlra nǣre  860
rond‐hæbbendra, rīces wyrðra.
Nē hīe hūru wine‐drihten wiht ne lōgon,
glædne Hrōðgār, ac þæt wæs gōd cyning.
Hwīlum heaðo‐rōfe hlēapan lēton,
on geflīt faran fealwe mēaras,
þǣr him fold‐wegas fægere þūhton,
cystum cūðe; hwīlum cyninges þegn,
guma gilp‐hlæden gidda gemyndig,
sē þe eal‐fela eald‐gesegena
worn gemunde, word ōðer fand  870
sōðe gebunden: secg eft ongan
sīð Bēowulfes snyttrum styrian
and on spēd wrecan spel gerāde,
wordum wrixlan, wēl‐hwylc gecwæð,
þæt hē fram Sigemunde secgan hȳrde,
ellen‐dǣdum, uncūðes fela,
Wælsinges gewin, wīde sīðas,
þāra þe gumena bearn gearwe ne wiston,
fǣhðe and fyrene, būton Fitela mid hine,
þonne hē swylces hwæt secgan wolde  880
ēam his nefan, swā hīe ā wǣron
æt nīða gehwām nȳd‐gesteallan:
hæfdon eal‐fela eotena cynnes
sweordum gesǣged. Sigemunde gesprong
æfter dēað‐dæge dōm unlȳtel,
syððan wīges heard wyrm ācwealde,
hordes hyrde; hē under hārne stān,
æðelinges bearn, āna genēðde
frēcne dǣde; ne wæs him Fitela mid.
Hwæðre him gesǣlde, þæt þæt swurd þurhwōd  890
wrǣtlīcne wyrm, þæt hit on wealle ætstōd,
dryhtlīc īren; draca morðre swealt.
Hæfde āglǣca elne gegongen,
þæt hē bēah‐hordes brūcan mōste
selfes dōme: sǣ‐bāt gehlōd,
bær on bearm scipes beorhte frætwa,
Wælses eafera; wyrm hāt gemealt.
Sē wæs wreccena wīde mǣrost
ofer wer‐þēode, wīgendra hlēo
ellen‐dǣdum: hē þæs āron þāh.  900
Siððan Heremōdes hild sweðrode
eafoð and ellen. Hē mid eotenum wearð
on fēonda geweald forð forlācen,
snūde forsended. Hine sorh‐wylmas
lemede tō lange, hē his lēodum wearð,
eallum æðelingum tō aldor‐ceare;
swylce oft bemearn ǣrran mǣlum
swīð‐ferhðes sīð snotor ceorl monig,
sē þe him bealwa tō bōte gelȳfde,
þæt þæt þēodnes bearn geþēon scolde,  910
fæder‐æðelum onfōn, folc gehealdan,
hord and hlēo‐burh, hæleða rīce,
ēðel Scyldinga. Hē þǣr eallum wearð,
mǣg Higelāces manna cynne,
frēondum gefægra; hine fyren onwōd.
Hwīlum flītende fealwe strǣte
mēarum mǣton. Þā wæs morgen‐lēoht
scofen and scynded. Ēode scealc monig
swīð‐hicgende tō sele þām hēan,
searo‐wundor sēon, swylce self cyning,  920
of brȳd‐būre bēah‐horda weard,
tryddode tīr‐fæst getrume micle,
cystum gecȳðed, and his cwēn mid him
medo‐stīg gemæt mægða hōse.

HROTHGAR'S GRATULATION.[edit]

Hrōðgār maðelode (hē tō healle gēong,
stōd on stapole, geseah stēapne hrōf
golde fāhne and Grendles hond):
"þisse ansȳne al‐wealdan þanc
lungre gelimpe! Fela ic lāðes gebād,
grynna æt Grendle: ā mæg god wyrcan  930
wunder æfter wundre, wuldres hyrde!
Þæt wæs ungeāra, þæt ic ǣnigra mē
wēana ne wēnde tō wīdan feore
bōte gebīdan þonne blōde fāh
hūsa sēlest heoro‐drēorig stōd;
wēa wīd‐scofen witena gehwylcne
þāra þe ne wēndon, þæt hīe wīde‐ferhð
lēoda land‐geweorc lāðum beweredon
scuccum and scinnum. Nū scealc hafað
þurh drihtnes miht dǣd gefremede,  940
þē wē ealle ǣr ne meahton
snyttrum besyrwan. Hwæt! þæt secgan mæg
efne swā hwylc mægða, swā þone magan cende
æfter gum‐cynnum, gyf hēo gȳt lyfað,
þæt hyre eald‐metod ēste wǣre
bearn‐gebyrdo. Nū ic Bēowulf
þec, secg betsta, mē for sunu wylle
frēogan on ferhðe; heald forð tela
nīwe sibbe. Ne bið þē nǣnigra gād
worolde wilna, þē ic geweald hæbbe.  950
Ful‐oft ic for lǣssan lēan teohhode
hord‐weorðunge hnāhran rince,
sǣmran æt sæcce. Þū þē self hafast
dǣdum gefremed, þæt þīn dōm lyfað
āwa tō aldre. Alwalda þec
gōde forgylde, swā hē nū gȳt dyde!"
Bēowulf maðelode, bearn Ecgþēowes:
"Wē þæt ellen‐weorc ēstum miclum,
feohtan fremedon, frēcne genēðdon
eafoð uncūðes; ūðe ic swīðor,  960
þæt þū hinc selfne gesēon mōste,
fēond on frætewum fyl‐wērigne!
Ic hine hrædlīce heardan clammum
on wæl‐bedde wrīðan þōhte,
þæt hē for mund‐gripe mīnum scolde
licgean līf‐bysig, būtan his līc swice;
ic hine ne mihte, þā metod nolde,
ganges getwǣman, nō ic him þæs georne ætfealh,
feorh‐genīðlan; wæs tō fore‐mihtig
fēond on fēðe. Hwæðere hē his folme forlēt  970
tō līf‐wraðe lāst weardian,
earm and eaxle; nō þǣr ǣnige swā þēah
fēa‐sceaft guma frōfre gebohte:
nō þȳ leng leofað lāð‐getēona
synnum geswenced, ac hyne sār hafað
in nȳd‐gripe nearwe befongen,
balwon bendum: þǣr ābīdan sceal
maga māne fāh miclan dōmes,
hū him scīr metod scrīfan wille."
Þā wæs swīgra secg, sunu Ecglāfes,  980
on gylp‐sprǣce gūð‐geweorca,
siððan æðelingas eorles cræfte
ofer hēahne hrōf hand scēawedon,
fēondes fingras, foran ǣghwylc;
wæs stēde nægla gehwylc, stȳle gelīcost,
hǣðenes hand‐sporu hilde‐rinces
egle unhēoru; ǣg‐hwylc gecwæð,
þæt him heardra nān hrīnan wolde
īren ǣr‐gōd, þæt þæs āhlǣcan
blōdge beadu‐folme onberan wolde.  990

THE BANQUET AND THE GIFTS.[edit]

Þā wæs hāten hreðe Heort innan‐weard
folmum gefrætwod: fela þǣra wæs
wera and wīfa, þē þæt wīn‐reced,
gest‐sele gyredon. Gold‐fāg scinon
web æfter wāgum, wundor‐sīona fela
secga gehwylcum þāra þe on swylc starað
Wæs þæt beorhte bold tōbrocen swīðe
eal inne‐weard īren‐bendum fæst,
heorras tōhlidene; hrōf āna genæs
ealles ansund, þā se āglǣca  1000
fyren‐dǣdum fāg on flēam gewand,
aldres or‐wēna. Nō þæt ȳðe byð
tō beflēonne (fremme sē þe wille!)
ac gesacan sceal sāwl‐berendra
nȳde genȳdde niðða bearna
grund‐būendra gearwe stōwe,
þǣr his līc‐homa leger‐bedde fæst
swefeð æfter symle. Þā wæs sǣl and mǣl,
þæt tō healle gang Healfdenes sunu;
wolde self cyning symbel þicgan.  1010
Ne gefrægen ic þā mǣgðe māran weorode
ymb hyra sinc‐gyfan sēl gebǣran.
Bugon þā tō bence blǣd‐āgende,
fylle gefǣgon. Fægere geþǣgon
medo‐ful manig māgas þāra
swīð‐hicgende on sele þām hēan,
Hrōðgār and Hrōðulf. Heorot innan wæs
frēondum āfylled; nalles fācen‐stafas
Þēod‐Scyldingas þenden fremedon.
Forgeaf þā Bēowulfe bearn Healfdenes  1020
segen gyldenne sigores tō lēane,
hroden hilte‐cumbor, helm and byrnan;
mǣre māððum‐sweord manige gesāwon
beforan beorn beran. Bēowulf geþah
ful on flette; nō hē þǣre feoh‐gyfte
for scēotendum scamigan þorfte,
ne gefrægn ic frēondlīcor fēower mādmas
golde gegyrede gum‐manna fela
in ealo‐bence ōðrum gesellan.
Ymb þæs helmes hrōf hēafod‐beorge  1030
wīrum bewunden walan ūtan hēold,
þæt him fēla lāfe frēcne ne meahton
scūr‐heard sceððan, þonne scyld‐freca
ongēan gramum gangan scolde.
Heht þā eorla hlēo eahta mēaras,
fǣted‐hlēore, on flet tēon
in under eoderas; þāra ānum stōd
sadol searwum fāh since gewurðad,
þæt wæs hilde‐setl hēah‐cyninges,
þonne sweorda gelāc sunu Healfdenes  1040
efnan wolde; nǣfre on ōre læg
wīd‐cūðes wīg, þonne walu fēollon.
And þā Bēowulfe bēga gehwæðres
eodor Ingwina onweald getēah,
wicga and wǣpna; hēt hine wēl brūcan.
Swā manlīce mǣre þēoden,
hord‐weard hæleða heaðo‐rǣsas geald
mēarum and mādmum, swā hȳ nǣfre man lyhð,
sē þe secgan wile sōð æfter rihte.

SONG OF HROTHGAR'S POET-THE LAY OF HNAEF AND HENGEST.[edit]

Þā gȳt ǣghwylcum eorla drihten  1050
þāra þe mid Bēowulfe brim‐lāde tēah,
on þǣre medu‐bence māððum gesealde,
yrfe‐lāfe, and þone ǣnne heht
golde forgyldan, þone þe Grendel ǣr
māne ācwealde, swā hē hyra mā wolde,
nefne him wītig god wyrd forstōde
and þæs mannes mōd: metod eallum wēold
gumena cynnes, swā hē nū gīt dēð;
forþan bið andgit ǣghwǣr sēlest,
ferhðes fore‐þanc! fela sceal gebīdan  1060
lēofes and lāðes, sē þe longe hēr
on þyssum win‐dagum worolde brūceð.
Þǣr wæs sang and swēg samod ætgædere
fore Healfdenes hilde‐wīsan,
gomen‐wudu grēted, gid oft wrecen,
þonne heal‐gamen Hrōðgāres scop
æfter medo‐bence mǣnan scolde
Finnes eaferum, þā hīe se fǣr begeat:
"Hæleð Healfdenes, Hnæf Scyldinga,
in Fr..es wæle feallan scolde.  1070
Nē hūru Hildeburh herian þorfte
Eotena trēowe: unsynnum wearð
beloren lēofum æt þām lind‐plegan
bearnum and brōðrum; hīe on gebyrd hruron
gāre wunde; þæt wæs geōmuru ides.
Nalles hōlinga Hōces dōhtor
meotod‐sceaft bemearn, syððan morgen cōm,
þā hēo under swegle gesēon meahte
morðor‐bealo māga, þǣr hēo ǣr mǣste hēold
worolde wynne: wīg ealle fornam  1080
Finnes þegnas, nemne fēaum ānum,
þæt hē ne mehte on þǣm meðel‐stede
wīg Hengeste wiht gefeohtan,
nē þā wēa‐lāfe wīge forþringan
þōodnes þegne;  ac hig him geþingo budon,
þæt hīe him ōðer flet eal gerȳmdon,
healle and hēah‐setl, þæt hīe healfre geweald
wið Eotena bearn āgan mōston,
and æt feoh‐gyftum Folcwaldan sunu
dōgra gehwylce Dene weorðode,  1090
Hengestes hēap hringum wenede,
efne swā swīðe sinc‐gestrēonum
fǣttan goldes, swā hē Frēsena cyn
on bēor‐sele byldan wolde.
Þā hīe getruwedon on twā healfa
fæste frioðu‐wǣre; Fin Hengeste
elne unflitme āðum benemde,
þæt hē þā wēa‐lāfe weotena dōme
ārum heolde, þæt þǣr ǣnig mon
wordum nē worcum wǣre ne brǣce,  1100
nē þurh inwit‐searo ǣfre gemǣnden,
þēah hīe hira bēag‐gyfan banan folgedon
þēoden‐lēase, þā him swā geþearfod wæs:
gyf þonne Frȳsna hwylc frēcnan sprǣce
þæs morðor‐hetes myndgiend wǣre,
þonne hit sweordes ecg syððan scolde.
Āð wæs geæfned and icge gold
āhæfen of horde. Here‐Scyldinga
betst beado‐rinca wæs on bǣl gearu;
æt þǣm āde wæs ēð‐gesȳne  1110
swāt‐fāh syrce, swȳn eal‐gylden,
eofer īren‐heard, æðeling manig
wundum āwyrded; sume on wæle crungon.
Hēt þā Hildeburh æt Hnæfes āde
hire selfre sunu sweoloðe befæstan,
bān‐fatu bærnan and on bǣl dōn.
Earme on eaxle ides gnornode,
geōmrode giddum; gūð‐rinc āstāh.
Wand tō wolcnum wæl‐fȳra mǣst,
hlynode for hlāwe; hafelan multon,  1120
ben‐geato burston, þonne blōd ætspranc
lāð‐bite līces. Līg ealle forswealg,
gǣsta gīfrost, þāra þe þǣr gūð fornam
bēga folces; wæs hira blǣd scacen.

THE GLEEMAN'S TALE IS ENDED.[edit]

"Gewiton him þā wīgend wīca nēosian,
frēondum befeallen Frȳsland gesēon,
hāmas and hēa‐burh. Hengest þā gȳt
wæl‐fāgne winter wunode mid Finne
ealles unhlitme; eard gemunde,
þēah þe hē ne meahte on mere drīfan  1130
hringed‐stefnan; holm storme wēol,
won wið winde; winter ȳðe belēac
īs‐gebinde oð þæt ōðer cōm
geār in geardas, swā nū gȳt dēð,
þā þe syngales sēle bewitiað,
wuldor‐torhtan weder. Þā wæs winter scacen,
fæger foldan bearm; fundode wrecca,
gist of geardum; hē tō gyrn‐wræce
swīðor þōhte, þonne tō sǣ‐lāde,
gif hē torn‐gemōt þurhtēon mihte,  1140
þæt hē Eotena bearn inne gemunde.
Swā hē ne forwyrnde worold‐rǣdenne,
þonne him Hūnlāfing hilde‐lēoman,
billa sēlest, on bearm dyde:
þæs wǣron mid Eotenum ecge cūðe.
Swylce ferhð‐frecan Fin eft begeat
sweord‐bealo slīðen æt his selfes hām,
siððan grimne gripe Gūðlaf ond Ōslāf
æfter sǣ‐siðe sorge mǣndon,
ætwiton wēana dǣl; ne meahte wǣfre mōd  1150
forhabban in hreðre. Þā wæs heal hroden
fēonda fēorum, swilce Fin slægen,
cyning on corðre, and sēo cwēn numen.
Scēotend Scyldinga tō scypum feredon
eal in‐gesteald eorð‐cyninges,
swylce hīe æt Finnes hām findan meahton
sigla searo‐gimma. Hīe on sǣ‐lāde
drihtlīce wīf tō Denum feredon,
lǣddon tō lēodum." Lēoð wæs āsungen,
glēo‐mannes gyd. Gamen eft āstāh,  1160
beorhtode benc‐swēg, byrelas sealdon
wīn of wunder‐fatum. Þā cwōm Wealhþēo forð
gān under gyldnum bēage, þǣr þā gōdan twēgen
sǣton suhter‐gefæderan; þā gȳt wæs hiera sib ætgædere
ǣghwylc ōðrum trȳwe. Swylce þǣr Unferð þyle
æt fōtum sæt frēan Scyldinga: gehwylc hiora his ferhðe trēowde,
þæt hē hæfde mōd micel, þēah þe hē his māgum nǣre
ārfæst æt ecga gelācum. Spræc þā ides Scyldinga:
"Onfōh þissum fulle, frēo‐drihten mīn,
sinces brytta; þū on sǣlum wes,  1170
gold‐wine gumena, and tō Gēatum sprec
mildum wordum! Swā sceal man dōn.
Bēo wið Gēatas glæd, geofena gemyndig;
nēan and feorran þū nū friðu hafast.
Mē man sægde, þæt þū þē for sunu wolde
here‐rinc habban. Heorot is gefǣlsod,
bēah‐sele beorhta; brūc þenden þū mōte
manigra mēda and þīnum māgum lǣf
folc and rīce, þonne þū forð scyle
metod‐sceaft sēon. Ic mīnne can  1180
glædne Hrōðulf, þæt hē þā geogoðe wile
ārum healdan, gyf þū ǣr þonne hē,
wine Scildinga, worold oflǣtest;
wēne ic, þæt hē mid gōde gyldan wille
uncran eaferan, gif hē þæt eal gemon,
hwæt wit tō willan and tō worð‐myndum
umbor wesendum ǣr ārna gefremedon."
Hwearf þā bī bence, þǣr hyre byre wǣron,
Hrēðrīc and Hrōðmund, and hæleða bearn,
giogoð ætgædere; þǣr se gōda sæt  1190
Bēowulf Gēata be þǣm gebrōðrum twǣm.

BĒOWULF'S JEWELLED COLLAR. THE HEROES REST.[edit]

Him wæs ful boren and frēond‐laðu
wordum bewægned and wunden gold
ēstum geēawed, earm‐hrēade twā,
hrægl and hringas, heals‐bēaga mǣst
þāra þe ic on foldan gefrægen hæbbe.
Nǣnigne ic under swegle sēlran hȳrde
hord‐māððum hæleða, syððan Hāma ætwæg
tō þǣre byrhtan byrig Brōsinga mene,
sigle and sinc‐fæt, searo‐nīðas fealh  1200
Eormenrīces, gecēas ēcne rǣd.
Þone hring hæfde Higelāc Gēata,
nefa Swertinges, nȳhstan sīðe,
siððan hē under segne sinc ealgode,
wæl‐rēaf werede; hyne Wyrd fornam,
syððan hē for wlenco wēan āhsode,
fǣhðe tō Frȳsum; hē þā frætwe wæg,
eorclan‐stānas ofer ȳða ful,
rīce þēoden, hē under rande gecranc;
gehwearf þā in Francna fæðm feorh cyninges,  1210
brēost‐gewǣdu and se bēah somod:
wyrsan wīg‐frecan wæl rēafedon
æfter gūð‐sceare, Gēata lēode
hreā‐wīc hēoldon. Heal swēge onfēng.
Wealhþēo maðelode, hēo fore þǣm werede spræc:
"Brūc þisses bēages, Bēowulf, lēofa
hyse, mid hǣle, and þisses hrægles nēot
þēod‐gestrēona, and geþēoh tela,
cen þec mid cræfte and þyssum cnyhtum wes
lāra līðe! ic þē þæs lēan geman.  1220
Hafast þū gefēred, þæt þē feor and nēah
ealne wīde‐ferhð weras ehtigað,
efne swā sīde swā sǣ bebūgeð
windige weallas. Wes, þenden þū lifige,
æðeling ēadig! ic þē an tela
sinc‐gestrēona. Bēo þū suna mīnum
dǣdum gedēfe drēam healdende!
Hēr is ǣghwylc eorl ōðrum getrȳwe,
mōdes milde, man‐drihtne hold,
þegnas syndon geþwǣre, þēod eal gearo:  1230
druncne dryht‐guman, dōð swā ic bidde!"
Ēode þā tō setle. Þǣr wæs symbla cyst,
druncon wīn weras: wyrd ne cūðon,
geō‐sceaft grimme, swā hit āgangen wearð
eorla manegum, syððan ǣfen cwōm
and him Hrōðgār gewāt tō hofe sīnum,
rīce tō ræste. Reced weardode
unrīm eorla, swā hīe oft ǣr dydon:
benc‐þelu beredon, hit geond‐brǣded wearð
beddum and bolstrum. Bēor‐scealca sum  1240
fūs and fǣge flet‐ræste gebēag.
Setton him tō hēafdum hilde‐randas,
bord‐wudu beorhtan; þǣr on bence wæs
ofer æðelinge ȳð‐gesēne
heaðo‐stēapa helm, hringed byrne,
þrec‐wudu þrymlīc. Wæs þēaw hyra,
þæt hīe oft wǣron an wīg gearwe,
gē æt hām gē on herge, gē gehwæðer þāra
efne swylce mǣla, swylce hira man‐dryhtne
þearf gesǣlde; wæs sēo þēod tilu.  1250

GRENDEL'S MOTHER ATTACKS THE RING-DANES.[edit]

Sigon þā tō slǣpe. Sum sāre angeald
ǣfen‐ræste, swā him ful‐oft gelamp,
siððan gold‐sele Grendel warode,
unriht æfnde, oð þæt ende becwōm,
swylt æfter synnum. Þæt gesȳne wearð,
wīd‐cūð werum, þætte wrecend þā gȳt
lifde æfter lāðum, lange þrāge
æfter gūð‐ceare; Grendles mōdor,
ides āglǣc‐wīf yrmðe gemunde,
sē þe wæter‐egesan wunian scolde,  1260
cealde strēamas, siððan Cain wearð
tō ecg‐banan āngan brēðer,
fæderen‐mǣge; hē þā fāg gewāt,
morðre gemearcod man‐drēam flēon,
wēsten warode. Þanon wōc fela
geōsceaft‐gāsta; wæs þǣra Grendel sum,
heoro‐wearh hetelīc, sē æt Heorote fand
wæccendne wer wīges bīdan,
þǣr him āglǣca æt‐grǣpe wearð;
hwæðre hē gemunde mægenes strenge,  1270
gim‐fæste gife, þē him god sealde,
and him tō anwaldan āre gelȳfde,
frōfre and fultum: þȳ hē þone fēond ofercwōm,
gehnǣgde helle gāst: þā hē hēan gewāt,
drēame bedǣled dēað‐wīc sēon,
man‐cynnes fēond. And his mōdor þā gȳt
gīfre and galg‐mōd gegān wolde
sorh‐fulne sīð, suna dēað wrecan.
Cōm þā tō Heorote, þǣr Hring‐Dene
geond þæt sæld swǣfun. Þā þǣr sōna wearð  1280
ed‐hwyrft eorlum, siððan inne fealh
Grendles mōdor; wæs se gryre lǣssa
efne swā micle, swā bið mægða cræft,
wīg‐gryre wīfes be wǣpned‐men,
þonne heoru bunden, hamere geþuren,
sweord swāte fāh swīn ofer helme,
ecgum dyhtig andweard scireð.
Þā wæs on healle heard‐ecg togen,
sweord ofer setlum, sīd‐rand manig
hafen handa fæst; helm ne gemunde,  1290
byrnan sīde, þe hine se brōga angeat.
Hēo wæs on ofste, wolde ūt þanon
fēore beorgan, þā hēo onfunden wæs;
hraðe hēo æðelinga ānne hæfde
fæste befangen, þā hēo tō fenne gang;
sē wæs Hrōðgāre hæleða lēofost
on gesīðes hād be sǣm tweonum,
rīce rand‐wiga, þone þe hēo on ræste ābrēat,
blǣd‐fæstne beorn. Næs Bēowulf þǣr,
ac wæs ōðer in ǣr geteohhod  1300
æfter māððum‐gife mǣrum Gēate.
Hrēam wearð on Heorote. Hēo under heolfre genam
cūðe folme; cearu wæs genīwod
geworden in wīcum: ne wæs þæt gewrixle til,
þæt hīe on bā healfa bicgan scoldon
frēonda fēorum. Þā wæs frōd cyning,
hār hilde‐rinc, on hrēon mōde,
syððan hē aldor‐þegn unlyfigendne,
þone dēorestan dēadne wisse.
Hraðe wæs tō būre Bēowulf fetod,  1310
sigor‐ēadig secg. Samod ǣr‐dæge
ēode eorla sum, æðele cempa
self mid gesīðum, þǣr se snottra bād,
hwæðre him al‐walda ǣfre wille
æfter wēa‐spelle wyrpe gefremman.
Gang þā æfter flōre fyrd‐wyrðe man
mid his hand‐scale (heal‐wudu dynede)
þæt hē þone wīsan wordum hnǣgde
frēan Ingwina; frægn gif him wǣre
æfter nēod‐laðu niht getǣse.  1320

SORROW AT HEOROT: AESCHERE'S DEATH[edit]

Hrōðgār maðelode, helm Scildinga:
"Ne frīn þū æfter sǣlum! Sorh is genīwod
Denigea lēodum. Dēad is Æsc‐here,
Yrmenlāfes yldra brōðor,
mīn rūn‐wita and mīn rǣd‐bora,
eaxl‐gestealla, þonne wē on orlege
hafelan weredon, þonne hniton fēðan,
eoferas cnysedan; swylc scolde eorl wesan
æðeling ǣr‐gōd, swylc Æsc‐here wæs.
Wearð him on Heorote tō hand‐banan  1330
wæl‐gǣst wǣfre; ic ne wāt hwæder
atol ǣse wlanc eft‐sīðas tēah,
fylle gefrǣgnod. Hēo þā fǣhðe wræc,
þē þū gystran niht Grendel cwealdest
þurh hǣstne hād heardum clammum,
forþan hē tō lange lēode mīne
wanode and wyrde. Hē æt wīge gecrang
ealdres scyldig, and nū ōðer cwōm
mihtig mān‐scaða, wolde hyre mǣg wrecan,
gē feor hafað fǣhðe gestǣled,  1340
þæs þe þincean mæg þegne monegum,
sē þe æfter sinc‐gyfan on sefan grēoteð,
hreðer‐bealo hearde; nū sēo hand ligeð,
sē þe ēow wēl‐hwylcra wilna dohte.
Ic þæt lond‐būend lēode mīne
sele‐rǣdende secgan hȳrde,
þæt hīe gesāwon swylce twēgen
micle mearc‐stapan mōras healdan,
ellor‐gǣstas: þǣra ōðer wæs,
þæs þe hīe gewislīcost gewitan meahton,  1350
idese onlīcnes, ōðer earm‐sceapen
on weres wæstmum wræc‐lāstas træd,
næfne hē wæs māra þonne ǣnig man ōðer,
þone on geār‐dagum Grendel nemdon
fold‐būende: nō hīe fæder cunnon,
hwæðer him ǣnig wæs ǣr ācenned
dyrnra gāsta. Hīe dȳgel lond
warigeað, wulf‐hleoðu, windige næssas,
frēcne fen‐gelād, þǣr fyrgen‐strēam
under næssa genipu niðer gewīteð,  1360
flōd under foldan; nis þæt feor heonon
mīl‐gemearces, þæt se mere standeð,
ofer þǣm hongiað hrīmge bearwas,
wudu wyrtum fæst, wæter oferhelmað.
Þǣr mæg nihta gehwǣm nīð‐wundor sēon,
fȳr on flōde; nō þæs frōd leofað
gumena bearna, þæt þone grund wite;
þēah þe hǣð‐stapa hundum geswenced,
heorot hornum trum holt‐wudu sēce,
feorran geflȳmed, ǣr hē feorh seleð,  1370
aldor on ōfre, ǣr hē in wille,
hafelan hȳdan. Nis þæt hēoru stōw:
þonon ȳð‐geblond up āstīgeð
won tō wolcnum, þonne wind styreð
lāð gewidru, oð þæt lyft drysmað,
roderas rēotað. Nū is rǣd gelang
eft æt þē ānum! Eard gīt ne const,
frēcne stōwe, þǣr þū findan miht
sinnigne secg: sēc gif þū dyrre!
Ic þē þā fǣhðe fēo lēanige,  1380
eald‐gestrēonum, swā ic ǣr dyde,
wundnum golde, gyf þū on weg cymest."

BĒOWULF SEEKS THE MONSTER IN THE HAUNTS OF THE NIXIES.[edit]

Bēowulf maðelode, bearn Ecgþēowes:
"Ne sorga, snotor guma! sēlre bið ǣghwǣm,
þæt hē his frēond wrece, þonne hē fela murne;
ūre ǣghwylc sceal ende gebīdan
worolde līfes; wyrce sē þe mōte
dōmes ǣr dēaðe! þæt bið driht‐guman
unlifgendum æfter sēlest.
Ārīs, rīces weard; uton hraðe fēran,  1390
Grendles māgan gang scēawigan!
Ic hit þē gehāte: nō hē on helm losað,
nē on foldan fæðm, nē on fyrgen‐holt,
nē on gyfenes grund, gā þǣr hē wille.
Þȳs dōgor þū geþyld hafa
wēana gehwylces, swā ic þē wēne tō!"
Āhlēop þā se gomela, gode þancode,
mihtigan drihtne, þæs se man gespræc.
Þā wæs Hrōðgāre hors gebǣted,
wicg wunden‐feax. Wīsa fengel  1400
geatolīc gengde; gum‐fēða stōp
lind‐hæbbendra. Lāstas wǣron
æfter wald‐swaðum wīde gesȳne,
gang ofer grundas; gegnum fōr þā
ofer myrcan mōr, mago‐þegna bær
þone sēlestan sāwol‐lēasne,
þāra þe mid Hrōðgāre hām eahtode.
Ofer‐ēode þā æðelinga bearn
stēap stān‐hliðo, stīge nearwe,
enge ān‐paðas, un‐cūð gelād,  1410
neowle næssas, nicor‐hūsa fela;
hē fēara sum beforan gengde
wīsra monna, wong scēawian,
oð þæt hē fǣringa fyrgen‐bēamas
ofer hārne stān hleonian funde,
wyn‐lēasne wudu; wæter under stōd
drēorig and gedrēfed. Denum eallum wæs,
winum Scyldinga, weorce on mōde,
tō geþolianne þegne monegum,
oncȳð eorla gehwǣm, syððan Æsc‐heres  1420
on þām holm‐clife hafelan mētton.
Flōd blōde wēol (folc tō sǣgon)
hātan heolfre. Horn stundum song
fūslīc fyrd‐lēoð. Fēða eal gesæt;
gesāwon þā æfter wætere wyrm‐cynnes fela,
sellīce sǣ‐dracan sund cunnian,
swylce on næs‐hleoðum nicras licgean,
þā on undern‐mǣl oft bewitigað
sorh‐fulne sīð on segl‐rāde,
wyrmas and wil‐dēor; hīe on weg hruron  1430
bitere and gebolgne, bearhtm ongeāton,
gūð‐horn galan. Sumne Gēata lēod
of flān‐bogan fēores getwǣfde,
ȳð‐gewinnes, þæt him on aldre stōd
here‐strǣl hearda; hē on holme wæs
sundes þē sǣnra, þē hyne swylt fornam.
Hræðe wearð on ȳðum mid eofer‐sprēotum
heoro‐hōcyhtum hearde genearwod,
nīða genǣged and on næs togen
wundorlīc wǣg‐bora; weras scēawedon  1440
gryrelīcne gist. Gyrede hine Bēowulf
eorl‐gewǣdum, nalles for ealdre mearn:
scolde here‐byrne hondum gebrōden,
sīd and searo‐fāh, sund cunnian,
sēo þe bān‐cofan beorgan cūðe,
þæt him hilde‐grāp hreðre ne mihte,
eorres inwit‐feng, aldre gesceððan;
ac se hwīta helm hafelan werede,
sē þe mere‐grundas mengan scolde,
sēcan sund‐gebland since geweorðad,  1450
befongen frēa‐wrāsnum, swā hine fyrn‐dagum
worhte wǣpna smið, wundrum tēode,
besette swīn‐līcum, þæt hine syððan nō
brond nē beado‐mēcas bītan ne meahton.
Næs þæt þonne mǣtost mægen‐fultuma,
þæt him on þearfe lāh þyle Hrōðgāres;
wæs þǣm hæft‐mēce Hrunting nama,
þæt wæs ān foran eald‐gestrēona;
ecg wæs īren āter‐tēarum fāh,
āhyrded heaðo‐swāte; nǣfre hit æt hilde ne swāc  1460
manna ǣngum þāra þe hit mid mundum bewand,
sē þe gryre‐sīðas gegān dorste,
folc‐stede fāra; næs þæt forma sīð,
þæt hit ellen‐weorc æfnan scolde.
Hūru ne gemunde mago Ecglāfes
eafoðes cræftig, þæt hē ǣr gespræc
wīne druncen, þā hē þæs wǣpnes onlāh
sēlran sweord‐frecan: selfa ne dorste
under ȳða gewin aldre genēðan,
driht‐scype drēogan; þǣr hē dōme forlēas,  1470
ellen‐mǣrðum. Ne wæs þǣm ōðrum swā,
syððan hē hine tō gūðe gegyred hæfde.

THE BATTLE WITH THE WATER-DRAKE.[edit]

Bēowulf maðelode, bearn Ecgþēowes:
"geþenc nū, se mǣra maga Healfdenes,
snottra fengel, nū ic eom sīðes fūs,
gold‐wine gumena, hwæt wit geō sprǣcon,
gif ic æt þearfe þīnre scolde
aldre linnan, þæt þū mē ā wǣre
forð‐gewitenum on fæder stǣle;
wes þū mund‐bora mīnum mago‐þegnum,  1480
hond‐gesellum, gif mec hild nime:
swylce þū þā mādmas, þē þū mē sealdest,
Hrōðgār lēofa, Higelāce onsend.
Mæg þonne on þǣm golde ongitan Gēata dryhten,
gesēon sunu Hrēðles, þonne hē on þæt sinc starað,
þæt ic gum‐cystum gōdne funde
bēaga bryttan, brēac þonne mōste.
And þū Unferð lǣt ealde lāfe,
wrǣtlīc wǣg‐sweord wīd‐cūðne man
heard‐ecg habban; ic mē mid Hruntinge  1490
dōm gewyrce, oððe mec dēað nimeð."
Æfter þǣm wordum Weder‐Gēata lēod
efste mid elne, nalas andsware
bīdan wolde; brim‐wylm onfēng
hilde‐rince. Þā wæs hwīl dæges,
ǣr hē þone grund‐wong ongytan mehte.
Sōna þæt onfunde, sē þe flōda begong
heoro‐gīfre behēold hund missēra,
grim and grǣdig, þæt þǣr gumena sum
æl‐wihta eard ufan cunnode.  1500
Grāp þā tōgēanes, gūð‐rinc gefēng
atolan clommum; nō þȳ ǣr in gescōd
hālan līce: hring ūtan ymb‐bearh,
þæt hēo þone fyrd‐hom þurh‐fōn ne mihte,
locene leoðo‐syrcan lāðan fingrum.
Bær þā sēo brim‐wylf, þā hēo tō botme cōm,
hringa þengel tō hofe sīnum,
swā hē ne mihte nō (hē þæs mōdig wæs)
wǣpna gewealdan, ac hine wundra þæs fela
swencte on sunde, sǣ‐dēor monig  1510
hilde‐tūxum here‐syrcan bræc,
ēhton āglǣcan. Þā se eorl ongeat,
þæt hē in nið‐sele nāt‐hwylcum wæs,
þǣr him nǣnig wæter wihte ne sceðede,
nē him for hrōf‐sele hrīnan ne mehte
fǣr‐gripe flōdes: fȳr‐lēoht geseah,
blācne lēoman beorhte scīnan.
Ongeat þā se gōda grund‐wyrgenne,
mere‐wīf mihtig; mægen‐rǣs forgeaf
hilde‐bille, hond swenge ne oftēah,  1520
þæt hire on hafelan hring‐mǣl āgōl
grǣdig gūð‐lēoð. Þā se gist onfand,
þæt se beado‐lēoma bītan nolde,
aldre sceððan, ac sēo ecg geswāc
þēodne æt þearfe: þolode ǣr fela
hond‐gemōta, helm oft gescær,
fǣges fyrd‐hrægl: þæt wæs forma sīð
dēorum māðme, þæt his dōm ālæg.
Eft wæs ān‐rǣd, nalas elnes læt,
mǣrða gemyndig mǣg Hygelāces;  1530
wearp þā wunden‐mǣl wrǣttum gebunden
yrre ōretta, þæt hit on eorðan læg,
stīð and stȳl‐ecg; strenge getruwode,
mund‐gripe mægenes. Swā sceal man dōn,
þonne hē æt gūðe gegān þenceð
longsumne lof, nā ymb his līf cearað.
Gefēng þā be eaxle (nalas for fǣhðe mearn)
Gūð‐Gēata lēod Grendles mōdor;
brægd þā beadwe heard, þā hē gebolgen wæs,
feorh‐genīðlan, þæt hēo on flet gebēah.  1540
Hēo him eft hraðe and‐lēan forgeald
grimman grāpum and him tōgēanes fēng;
oferwearp þā wērig‐mōd wigena strengest,
fēðe‐cempa, þæt hē on fylle wearð.
Ofsæt þā þone sele‐gyst and hyre seaxe getēah,
brād and brūn‐ecg wolde hire bearn wrecan,
āngan eaferan. Him on eaxle læg
brēost‐net brōden; þæt gebearh fēore,
wið ord and wið ecge ingang forstōd.
Hæfde þā forsīðod sunu Ecgþēowes  1550
under gynne grund, Gēata cempa,
nemne him heaðo‐byrne helpe gefremede,
here‐net hearde, and hālig god
gewēold wīg‐sigor, wītig drihten;
rodera rǣdend hit on ryht gescēd,
ȳðelīce syððan hē eft āstōd.

BĒOWULF SLAYS THE SPRITE.[edit]

Geseah þā on searwum sige‐ēadig bil,
eald sweord eotenisc ecgum þȳhtig,
wigena weorð‐mynd: þæt wæs wǣpna cyst,
būton hit wæs māre þonne ǣnig mon ōðer  1560
tō beadu‐lāce ætberan meahte
gōd and geatolīc gīganta geweorc.
Hē gefēng þā fetel‐hilt, freca Scildinga,
hrēoh and heoro‐grim hring‐mǣl gebrægd,
aldres orwēna, yrringa slōh,
þæt hire wið halse heard grāpode,
bān‐hringas bræc, bil eal þurh‐wōd
fǣgne flǣsc‐homan, hēo on flet gecrong;
sweord wæs swātig, secg weorce gefeh.
Līxte se lēoma, lēoht inne stōd,  1570
efne swā of hefene hādre scīneð
rodores candel. Hē æfter recede wlāt,
hwearf þā be wealle, wǣpen hafenade
heard be hiltum Higelāces þegn,
yrre and ān‐rǣd. Næs sēo ecg fracod
hilde‐rince, ac hē hraðe wolde
Grendle forgyldan gūð‐rǣsa fela
þāra þe hē geworhte tō West‐Denum
oftor micle þonne on ǣnne sīð,
þonne hē Hrōðgāres heorð‐genēatas  1580
slōh on sweofote, slǣpende fræt
folces Denigea fȳf‐tȳne men
and ōðer swylc ūt of‐ferede,
lāðlīcu lāc. Hē him þæs lēan forgeald,
rēðe cempa, tō þæs þe hē on ræste geseah
gūð‐wērigne Grendel licgan,
aldor‐lēasne, swā him ǣr gescōd
hild æt Heorote; hrā wīde sprong,
syððan hē æfter dēaðe drepe þrowade,
heoro‐sweng heardne, and hine þā hēafde becearf,  1590
Sōna þæt gesāwon snottre ceorlas,
þā þe mid Hrōðgāre on holm wliton,
þæt wæs ȳð‐geblond eal gemenged,
brim blōde fāh: blonden‐feaxe
gomele ymb gōdne ongeador sprǣcon,
þæt hig þæs æðelinges eft ne wēndon,
þæt hē sige‐hrēðig sēcean cōme
mǣrne þēoden; þā þæs monige gewearð,
þæt hine sēo brim‐wylf ābroten hæfde.
Þā cōm nōn dæges. Næs ofgēafon  1600
hwate Scyldingas; gewāt him hām þonon
gold‐wine gumena. Gistas sētan,
mōdes sēoce, and on mere staredon,
wiston and ne wēndon, þæt hīe heora wine‐drihten
selfne gesāwon. Þā þæt sweord ongan
æfter heaðo‐swāte hilde‐gicelum
wīg‐bil wanian; þæt wæs wundra sum,
þæt hit eal gemealt īse gelīcost,
þonne forstes bend fæder onlǣteð,
onwindeð wæl‐rāpas, sē þe geweald hafað  1610
sǣla and mǣla; þæt is sōð metod.
Ne nom hē in þǣm wīcum, Weder‐Gēata lēod,
māðm‐ǣhta mā, þēh hē þǣr monige geseah,
būton þone hafelan and þā hilt somod,
since fāge; sweord ǣr gemealt,
forbarn brōden mǣl: wæs þæt blōd tō þæs hāt,
ǣttren ellor‐gǣst, sē þǣr inne swealt.
Sōna wæs on sunde, sē þe ǣr æt sæcce gebād
wīg‐hryre wrāðra, wæter up þurh‐dēaf;
wǣron ȳð‐gebland eal gefǣlsod,  1620
ēacne eardas, þā se ellor‐gāst
oflēt līf‐dagas and þās lǣnan gesceaft.
Cōm þā tō lande lid‐manna helm
swīð‐mōd swymman, sǣ‐lāce gefeah,
mægen‐byrðenne þāra þe hē him mid hæfde.
Ēodon him þā tōgēanes, gode þancodon,
þrȳðlīc þegna hēap, þēodnes gefēgon,
þæs þe hī hyne gesundne gesēon mōston.
Þā wæs of þǣm hrōran helm and byrne
lungre ālȳsed: lagu drūsade,  1630
wæter under wolcnum, wæl‐drēore fāg.
Fērdon forð þonon fēðe‐lāstum
ferhðum fægne, fold‐weg mǣton,
cūðe strǣte; cyning‐balde men
from þǣm holm‐clife hafelan bǣron
earfoðlīce heora ǣghwæðrum
fela‐mōdigra: fēower scoldon
on ðæm wæl‐stenge weorcum geferian
tō þǣm gold‐sele Grendles hēafod,
oð þæt semninga tō sele cōmon  1640
frome fyrd‐hwate fēower‐tȳne
Gēata gongan; gum‐dryhten mid
mōdig on gemonge meodo‐wongas træd.
Þā cōm in gān ealdor þegna,
dǣd‐cēne mon dōme gewurðad,
hæle hilde‐dēor. Hrōðgār grētan:
Þā wæs be feaxe on flet boren
Grendles hēafod, þǣr guman druncon,
egeslīc for eorlum and þǣre idese mid:
wlite‐sēon wrǣtlīc weras onsāwon.  1650

HROTHGAR'S GRATITUDE: HE DISCOURSES.[edit]

Bēowulf maðelode, bearn Ecgþēowes:
"Hwæt! wē þē þās sǣ‐lāc, sunu Healfdenes,
lēod Scyldinga, lustum brōhton,
tīres tō tācne, þē þū hēr tō lōcast.
Ic þæt unsōfte ealdre gedīgde:
wigge under wætere weorc genēðde
earfoðlīce, æt‐rihte wæs
gūð getwǣfed, nymðe mec god scylde.
Ne meahte ic æt hilde mid Hruntinge
wiht gewyrcan, þēah þæt wǣpen duge,  1660
ac mē geūðe ylda waldend,
þæt ic on wāge geseah wlitig hangian
eald sweord ēacen (oftost wīsode
winigea lēasum) þæt ic þȳ wǣpne gebrǣ.
Ofslōh þā æt þǣre sæcce (þā mē sǣl āgeald)
hūses hyrdas. Þā þæt hilde‐bil
forbarn, brogden mǣl, swā þæt blōd gesprang,
hātost heaðo‐swāta: ic þæt hilt þanan
fēondum ætferede; fyren‐dǣda wræc,
dēað‐cwealm Denigea, swā hit gedēfe wæs.  1670
Ic hit þē þonne gehāte, þæt þū on Heorote mōst
sorh‐lēas swefan mid þīnra secga gedryht,
and þegna gehwylc þīnra lēoda,
duguðe and iogoðe, þæt þū him ondrǣdan ne þearft,
þēoden Scyldinga, on þā healfe,
aldor‐bealu eorlum, swā þū ǣr dydest."
Þā wæs gylden hilt gamelum rince.
hārum hild‐fruman, on hand gyfen,
enta ǣr‐geweorc, hit on ǣht gehwearf
æfter dēofla hryre Denigea frēan,  1680
wundor‐smiða geweorc, and þā þās worold ofgeaf
grom‐heort guma, godes andsaca,
morðres scyldig, and his mōdor ēac;
on geweald gehwearf worold‐cyninga
þǣm sēlestan be sǣm twēonum
þāra þe on Sceden‐igge sceattas dǣlde.
Hrōðgār maðelode, hylt scēawode,
ealde lāfe, on þǣm wæs ōr writen
fyrn‐gewinnes: syððan flōd ofslōh,
gifen gēotende, gīganta cyn,  1690
frēcne gefērdon: þæt wæs fremde þēod
ēcean dryhtne, him þæs ende‐lēan
þurh wæteres wylm waldend sealde.
Swā wæs on þǣm scennum scīran goldes
þurh rūn‐stafas rihte gemearcod,
geseted and gesǣd, hwām þæt sweord geworht,
īrena cyst ǣrest wǣre,
wreoðen‐hilt and wyrm‐fāh. þā se wīsa spræc
sunu Healfdenes (swīgedon ealle):
"Þæt lā mæg secgan, sē þe sōð and riht  1700
fremeð on folce, (feor eal gemon
eald ēðel‐weard), þæt þes eorl wǣre
geboren betera! Blǣd is ārǣred
geond wīd‐wegas, wine mīn Bēowulf,
þīn ofer þēoda gehwylce. Eal þū hit geþyldum healdest,
mægen mid mōdes snyttrum. Ic þē sceal mīne gelǣstan
frēode, swā wit furðum sprǣcon; þū scealt tō frōfre weorðan
eal lang‐twidig lēodum þīnum,
hæleðum tō helpe. Ne wearð Heremōd swā
eaforum Ecgwelan, Ār‐Scyldingum;  1710
ne gewēox hē him tō willan, ac tō wæl‐fealle
and tō dēað‐cwalum Deniga lēodum;
brēat bolgen‐mōd bēod‐genēatas,
eaxl‐gesteallan, oð þæt hē āna hwearf,
mǣre þēoden. mon‐drēamum from:
þēah þe hine mihtig god mægenes wynnum,
eafeðum stēpte, ofer ealle men
forð gefremede, hwæðere him on ferhðe grēow
brēost‐hord blōd‐rēow: nallas bēagas geaf
Denum æfter dōme; drēam‐lēas gebād,  1720
þæt hē þæs gewinnes weorc þrowade,
lēod‐bealo longsum. Þū þē lǣr be þon,
gum‐cyste ongit! ic þis gid be þē
āwræc wintrum frōd. Wundor is tō secganne,
hū mihtig god manna cynne
þurh sīdne sefan snyttru bryttað,
eard and eorl‐scipe, hē āh ealra geweald.
Hwīlum hē on lufan lǣteð hworfan
monnes mōd‐geþonc mǣran cynnes,
seleð him on ēðle eorðan wynne,  1730
tō healdanne hlēo‐burh wera,
gedēð him swā gewealdene worolde dǣlas,
sīde rīce, þæt hē his selfa ne mæg
for his un‐snyttrum ende geþencean;
wunað hē on wiste, nō hine wiht dweleð,
ādl nē yldo, nē him inwit‐sorh
on sefan sweorceð, nē gesacu ōhwǣr,
ecg‐hete ēoweð, ac him eal worold
wendeð on willan; hē þæt wyrse ne con,
oð þæt him on innan ofer‐hygda dǣl  1740
weaxeð and wridað, þonne se weard swefeð,
sāwele hyrde: bið se slǣp tō fæst,
bisgum gebunden, bona swīðe nēah,
sē þe of flān‐bogan fyrenum scēoteð.

THE DISCOURSE IS ENDED.-BĒOWULF PREPARES TO LEAVE.[edit]

"Þonne bið on hreðre under helm drepen
biteran strǣle: him bebeorgan ne con
wom wundor‐bebodum wergan gāstes;
þinceð him tō lȳtel, þæt hē tō lange hēold,
gȳtsað grom‐hȳdig, nallas on gylp seleð
fǣtte bēagas and hē þā forð‐gesceaft  1750
forgyteð and forgȳmeð, þæs þe him ǣr god sealde
wuldres waldend, weorð‐mynda dǣl.
Hit on ende‐stæf eft gelimpeð,
þæt se līc‐homa lǣne gedrēoseð,
fǣge gefealleð; fēhð ōðer tō,
sē þe unmurnlīce mādmas dǣleð,
eorles ǣr‐gestrēon, egesan ne gȳmeð.
Bebeorh þē þone bealo‐nīð, Bēowulf lēofa,
secg se betsta, and þē þæt sēlre gecēos,
ēce rǣdas; oferhȳda ne gȳm,  1760
mǣre cempa! Nū is þīnes mægnes blǣd
āne hwīle; eft sōna bið,
þæt þec ādl oððe ecg eafoðes getwǣfeð,
oððe fȳres feng oððe flōdes wylm,
oððe gripe mēces oððe gāres fliht,
oððe atol yldo, oððe ēagena bearhtm
forsiteð and forsworceð; semninga bið,
þæt þec, dryht‐guma, dēað oferswȳðeð.
Swā ic Hring‐Dena hund missēra
wēold under wolcnum, and hig wigge belēac  1770
manigum mǣgða geond þysne middan‐geard,
æscum and ecgum, þæt ic mē ǣnigne
under swegles begong gesacan ne tealde.
Hwæt! mē þæs on ēðle edwenden cwōm,
gyrn æfter gomene, seoððan Grendel wearð,
eald‐gewinna, in‐genga mīn:
ic þǣre sōcne singāles wæg
mōd‐ceare micle. Þæs sig metode þanc,
ēcean drihtne, þæs þe ic on aldre gebād,
þæt ic on þone hafelan heoro‐drēorigne  1780
ofer eald gewin ēagum starige!
Gā nū tō setle, symbel‐wynne drēoh
wīgge weorðad: unc sceal worn fela
māðma gemǣnra, siððan morgen bið."
Gēat wæs glæd‐mōd, gēong sōna tō,
setles nēosan, swā se snottra heht.
Þā wæs eft swā ǣr ellen‐rōfum,
flet‐sittendum fægere gereorded
nīowan stefne. Niht‐helm geswearc
deorc ofer dryht‐gumum. Duguð eal ārās;  1790
wolde blonden‐feax beddes nēosan,
gamela Scylding. Gēat ungemetes wēl,
rōfne rand‐wigan restan lyste:
sōna him sele‐þegn sīðes wērgum,
feorran‐cundum forð wīsade,
se for andrysnum ealle beweotede
þegnes þearfe, swylce þȳ dōgore
hēaðo‐līðende habban scoldon.
Reste hine þā rūm‐heort; reced hlīfade
gēap and gold‐fāh, gæst inne swæf,  1800
oð þæt hrefn blaca heofones wynne
blīð‐heort bodode. Þā cōm beorht sunne
scacan ofer grundas; scaðan ōnetton,
wǣron æðelingas eft tō lēodum
fūse tō farenne, wolde feor þanon
cuma collen‐ferhð cēoles nēosan.
Heht þā se hearda Hrunting beran,
sunu Ecglāfes, heht his sweord niman,
lēoflīc īren; sægde him þæs lēanes þanc,
cwæð hē þone gūð‐wine gōdne tealde,  1810
wīg‐cræftigne, nales wordum lōg
mēces ecge: þæt wæs mōdig secg.
And þā sīð‐frome searwum gearwe
wīgend wǣron, ēode weorð Denum
æðeling tō yppan, þǣr se ōðer wæs
hæle hilde‐dēor, Hrōðgār grētte.

THE PARTING WORDS.[edit]

Bēowulf maðelode, bearn Ecgþēowes:
"Nū wē sǣ‐līðend secgan wyllað
feorran cumene, þæt wē fundiað
Higelāc sēcan. Wǣron hēr tela  1820
willum bewenede; þū ūs wēl dohtest.
Gif ic þonne on eorðan ōwihte mæg
þīnre mōd‐lufan māran tilian,
gumena dryhten, þonne ic gȳt dyde,
gūð‐geweorca ic bēo gearo sōna.
Gif ic þæt gefricge ofer flōda begang,
þæt þec ymbe‐sittend egesan þȳwað,
swā þec hetende hwīlum dydon,
ic þē þūsenda þegna bringe,
hæleða tō helpe. Ic on Higelāce wāt,  1830
Gēata dryhten, þēah þe hē geong sȳ,
folces hyrde, þæt hē mec fremman wile
wordum and worcum, þæt ic þē wēl herige,
and þē tō gēoce gār‐holt bere
mægenes fultum, þǣr þē bið manna þearf;
gif him þonne Hrēðrīc tō hofum Gēata
geþingeð, þēodnes bearn, hē mæg þǣr fela
frēonda findan: feor‐cȳððe bēoð
sēlran gesōhte þǣm þe him selfa dēah."
Hrōðgār maðelode him on andsware:  1840
"Þē þā word‐cwydas wittig drihten
on sefan sende! ne hȳrde ic snotorlīcor
on swā geongum feore guman þingian:
þū eart mægenes strang and on mōde frōd,
wīs word‐cwida. Wēn ic talige,
gif þæt gegangeð, þæt þe gār nymeð,
hild heoru‐grimme Hrēðles eaferan,
ādl oððe īren ealdor þīnne,
folces hyrde, and þū þīn feorh hafast,
þæt þe Sǣ‐Gēatas sēlran næbben  1850
tō gecēosenne cyning ǣnigne,
hord‐weard hæleða, gif þū healdan wylt
māga rīce. Mē þīn mōd‐sefa
līcað leng swā wēl, lēofa Bēowulf:
hafast þū gefēred, þæt þām folcum sceal,
Gēata lēodum and Gār‐Denum
sib gemǣnum and sacu restan,
inwit‐nīðas, þē hīe ǣr drugon;
wesan, þenden ic wealde wīdan rīces,
māðmas gemǣne, manig ōðerne  1860
gōdum gegrētan ofer ganotes bæð;
sceal hring‐naca ofer hēaðu bringan
lāc and luf‐tācen. Ic þā lēode wāt
gē wið fēond gē wið frēond fæste geworhte
ǣghwæs untǣle ealde wīsan."
Þā gīt him eorla hlēo inne gesealde,
mago Healfdenes māðmas twelfe,
hēt hine mid þǣm lācum lēode swǣse
sēcean on gesyntum, snūde eft cuman.
Gecyste þā cyning æðelum gōd,  1870
þēoden Scildinga, þegen betstan
and be healse genam; hruron him tēaras,
blonden‐feaxum: him wæs bēga wēn,
ealdum infrōdum, ōðres swīðor,
þæt hī seoððan gesēon mōston
mōdige on meðle. Wæs him se man tō þon lēof,
þæt hē þone brēost‐wylm forberan ne mehte,
ac him on hreðre hyge‐bendum fæst
æfter dēorum men dyrne langað
beorn wið blōde. Him Bēowulf þanan,  1880
gūð‐rinc gold‐wlanc græs‐moldan træd,
since hrēmig: sǣ‐genga bād
āgend‐frēan, sē þe on ancre rād.
Þā wæs on gange gifu Hrōðgāres
oft geæhted: þæt wæs ān cyning
ǣghwæs orleahtre, oð þæt hine yldo benam
mægenes wynnum, sē þe oft manegum scōd.

BĒOWULF RETURNS TO GEATLAND.-THE QUEENS HYGD AND THRYTHO.[edit]

Cwōm þā tō flōde fela‐mōdigra
hæg‐stealdra hēap; hring‐net bǣron,
locene leoðo‐syrcan. Land‐weard onfand  1890
eft‐sīð eorla, swā hē ǣr dyde;
nō hē mid hearme of hlīðes nosan
gæstas grētte, ac him tōgēanes rād;
cwæð þæt wilcuman Wedera lēodum
scawan scīr‐hame tō scipe fōron.
Þā wæs on sande sǣ‐gēap naca
hladen here‐wǣdum, hringed‐stefna
mēarum and māðmum: mæst hlīfade
ofer Hrōðgāres hord‐gestrēonum.
Hē þǣm bāt‐wearde bunden golde  1900
swurd gesealde, þæt hē syððan wæs
on meodu‐bence māðme þȳ weorðra,
yrfe‐lāfe. Gewāt him on ȳð‐nacan,
drēfan dēop wæter, Dena land ofgeaf.
Þā wæs be mæste mere‐hrægla sum,
segl sāle fæst. Sund‐wudu þunede,
nō þǣr wēg‐flotan wind ofer ȳðum
sīðes getwǣfde; sǣ‐genga fōr,
flēat fāmig‐heals forð ofer ȳðe,
bunden‐stefna ofer brim‐strēamas,  1910
þæt hīe Gēata clifu ongitan meahton,
cūðe næssas. Cēol up geþrang,
lyft‐geswenced on lande stōd.
Hraðe wæs æt holme hȳð‐weard gearo,
sē þe ǣr lange tīd, lēofra manna
fūs, æt faroðe feor wlātode;
sǣlde tō sande sīd‐fæðme scip
oncer‐bendum fæst, þȳ lǣs hym ȳða þrym
wudu wynsuman forwrecan meahte.
Hēt þā up beran æðelinga gestrēon,  1920
frætwe and fǣt‐gold; næs him feor þanon
tō gesēcanne sinces bryttan:
Higelāc Hrēðling þǣr æt hām wunað,
selfa mid gesīðum sǣ‐wealle nēah;
bold wæs betlīc, brego‐rōf cyning,
hēa on healle, Hygd swīðe geong,
wīs, wēl‐þungen, þēah þe wintra lȳt
under burh‐locan gebiden hæbbe
Hæreðes dōhtor: næs hīo hnāh swā þēah,
nē tō gnēað gifa Gēata lēodum,  1930
māðm‐gestrēona. Mod Þrȳðo wæg,
fremu folces cwēn, firen ondrysne:
nǣnig þæt dorste dēor genēðan
swǣsra gesīða, nefne sin‐frēa,
þæt hire an dæges ēagum starede;
ac him wæl‐bende weotode tealde,
hand‐gewriðene: hraðe seoððan wæs
æfter mund‐gripe mēce geþinged,
þæt hit sceaðen‐mǣl scȳran mōste,
cwealm‐bealu cȳðan. Ne bið swylc cwēnlīc þēaw  1940
idese tō efnanne, þēah þe hīo ǣnlīcu sȳ,
þætte freoðu‐webbe fēores onsæce
æfter līge‐torne lēofne mannan.
Hūru þæt onhōhsnode Heminges mǣg;
ealo drincende ōðer sǣdan,
þæt hīo lēod‐bealewa lǣs gefremede,
inwit‐nīða, syððan ǣrest wearð
gyfen gold‐hroden geongum cempan,
æðelum dīore, syððan hīo Offan flet
ofer fealone flōd be fæder lāre  1950
sīðe gesōhte, þǣr hīo syððan wēl
in gum‐stōle, gōde mǣre,
līf‐gesceafta lifigende brēac,
hīold hēah‐lufan wið hæleða brego,
ealles mon‐cynnes mīne gefrǣge
þone sēlestan bī sǣm twēonum
eormen‐cynnes; forþām Offa wæs
geofum and gūðum gār‐cēne man,
wīde geweorðod; wīsdōme hēold
ēðel sīnne, þonon Ēomǣr wōc  1960
hæleðum tō helpe, Heminges mǣg,
nefa Gārmundes, nīða cræftig.

HIS ARRIVAL. HYGELAC'S RECEPTION.[edit]

Gewāt him þā se hearda mid his hond‐scole
sylf æfter sande sǣ‐wong tredan,
wīde waroðas. Woruld‐candel scān,
sigel sūðan fūs: hī sīð drugon,
elne geēodon, tō þæs þe eorla hlēo,
bonan Ongenþēowes burgum on innan,
geongne gūð‐cyning gōdne gefrūnon
hringas dǣlan. Higelāce wæs  1970
sīð Bēowulfes snūde gecȳðed,
þæt þǣr on worðig wīgendra hlēo,
lind‐gestealla lifigende cwōm,
heaðo‐lāces hāl tō hofe gongan.
Hraðe wæs gerȳmed, swā se rīca bebēad,
fēðe‐gestum flet innan‐weard.
Gesæt þā wið sylfne, sē þā sæcce genæs,
mǣg wið mǣge, syððan man‐dryhten
þurh hlēoðor‐cwyde holdne gegrētte
mēaglum wordum. Meodu‐scencum  1980
hwearf geond þæt reced Hæreðes dōhtor:
lufode þā lēode, līð‐wǣge bær
hǣlum tō handa. Higelāc ongan
sīnne geseldan in sele þām hēan
fægre fricgean, hyne fyrwet bræc,
hwylce Sǣ‐Gēata sīðas wǣron:
"Hū lomp ēow on lāde, lēofa Bīowulf,
þā þū fǣringa feorr gehogodest,
sæcce sēcean ofer sealt wæter,
hilde tō Hiorote? Ac þū Hrōðgāre  1990
wīd‐cūðne wēan wihte gebēttest,
mǣrum þēodne? Ic þæs mōd‐ceare
sorh‐wylmum sēað, sīðe ne truwode
lēofes mannes; ic þē lange bæd,
þæt þū þone wæl‐gǣst wihte ne grētte,
lēte Sūð‐Dene sylfe geweorðan
gūðe wið Grendel. Gode ic þanc secge,
þæs þe ic þē gesundne gesēon mōste."
Bīowulf maðelode, bearn Ecgþīowes:
"Þæt is undyrne, dryhten Higelāc,  2000
mǣre gemēting monegum fīra,
hwylc orleg‐hwīl uncer Grendles
wearð on þām wange, þǣr hē worna fela
Sige‐Scildingum sorge gefremede,
yrmðe tō aldre; ic þæt eal gewræc,
swā ne gylpan þearf Grendeles māga
ǣnig ofer eorðan ūht‐hlem þone,
sē þe lengest leofað lāðan cynnes,
fenne bifongen. Ic þǣr furðum cwōm,
tō þām hring‐sele Hrōðgār grētan:  2010
sōna mē se mǣra mago Healfdenes,
syððan hē mōd‐sefan mīnne cūðe,
wið his sylfes sunu setl getǣhte.
Weorod wæs on wynne; ne seah ic wīdan feorh
under heofenes hwealf heal‐sittendra
medu‐drēam māran. Hwīlum mǣru cwēn,
friðu‐sibb folca flet eall geond‐hwearf,
bǣdde byre geonge; oft hīo bēah‐wriðan
secge sealde, ǣr hīo tō setle gēong.
Hwīlum for duguðe dōhtor Hrōðgāres  2020
eorlum on ende ealu‐wǣge bær,
þā ic Frēaware flet‐sittende
nemnan hȳrde, þǣr hīo nægled sinc
hæleðum sealde: sīo gehāten wæs,
geong gold‐hroden, gladum suna Frōdan;
hafað þæs geworden wine Scyldinga
rīces hyrde and þæt rǣd talað,
þæt hē mid þȳ wīfe wæl‐fǣhða dǣl,
sæcca gesette. Oft nō seldan hwǣr
æfter lēod‐hryre lȳtle hwīle  2030
bon‐gār būgeð, þēah sēo brȳd duge!

BĒOWULF'S STORY OF THE SLAYINGS.[edit]

"Mæg þæs þonne ofþyncan þēoden Heaðobeardna
and þegna gehwām þāra lēoda,
þonne hē mid fǣmnan on flett gǣð,
dryht‐bearn Dena duguða biwenede:
on him gladiað gomelra lāfe
heard and hring‐mǣl, Heaðobeardna gestrēon,
þenden hīe þām wǣpnum wealdan mōston,
oð þæt hīe forlǣddan tō þām lind‐plegan
swǣse gesīðas ond hyra sylfra feorh.  2040
Þonne cwið æt bēore, sē þe bēah gesyhð,
eald æsc‐wiga, sē þe eall geman
gār‐cwealm gumena (him bið grim sefa),
onginneð geōmor‐mōd geongne cempan
þurh hreðra gehygd higes cunnian,
wīg‐bealu weccean and þæt word ācwyð:
'Meaht þū, mīn wine, mēce gecnāwan,
þone þin fæder tō gefeohte bær
under here‐grīman hindeman sīðe,
dȳre īren, þǣr hyne Dene slōgon,  2050
wēoldon wæl‐stōwe, syððan wiðer‐gyld læg,
æfter hæleða hryre, hwate Scyldungas?
Nu hēr þāra banena byre nāt‐hwylces,
frætwum hrēmig on flet gǣð,
morðres gylpeð and þone māððum byreð,
þone þe þū mid rihte rǣdan sceoldest!'
Manað swā and myndgað mǣla gehwylce
sārum wordum, oð þæt sǣl cymeð,
þæt se fǣmnan þegn fore fæder dǣdum
æfter billes bite blōd‐fāg swefeð,  2060
ealdres scyldig; him se ōðer þonan
losað lifigende, con him land geare.
Þonne bīoð brocene on bā healfe
āð‐sweord eorla; syððan Ingelde
weallað wæl‐nīðas and him wīf‐lufan
æfter cear‐wælmum cōlran weorðað.
Þȳ ic Heaðobeardna hyldo ne telge,
dryht‐sibbe dǣl Denum unfǣcne,
frēond‐scipe fæstne. Ic sceal forð sprecan
gēn ymbe Grendel, þæt þū geare cunne,  2070
sinces brytta, tō hwan syððan wearð
hond‐rǣs hæleða. Syððan heofones gim
glād ofer grundas, gæst yrre cwōm,
eatol ǣfen‐grom, ūser nēosan,
þǣr wē gesunde sæl weardodon;
þǣr wæs Hondscīo hild onsǣge,
feorh‐bealu fǣgum, hē fyrmest læg,
gyrded cempa; him Grendel wearð,
mǣrum magu‐þegne tō mūð‐bonan,
lēofes mannes līc eall forswealg.  2080
Nō þȳ ǣr ūt þā gēn īdel‐hende
bona blōdig‐tōð bealewa gemyndig,
of þām gold‐sele gongan wolde,
ac hē mægnes rōf mīn costode,
grāpode gearo‐folm. Glōf hangode
sīd and syllīc searo‐bendum fæst,
sīo wæs orþoncum eall gegyrwed
dēofles cræftum and dracan fellum:
hē mec þǣr on innan unsynnigne,
dīor dǣd‐fruma, gedōn wolde,  2090
manigra sumne: hyt ne mihte swā,
syððan ic on yrre upp‐riht āstōd.
Tō lang ys tō reccenne, hū ic þām lēod‐sceaðan
yfla gehwylces ond‐lēan forgeald;
þǣr ic, þēoden mīn, þīne lēode
weorðode weorcum. Hē on weg losade,
lȳtle hwīle līf‐wynna brēac;
hwæðre him sīo swīðre swaðe weardade
hand on Hiorte and hē hēan þonan,
mōdes geōmor mere‐grund gefēoll.  2100
Mē þone wæl‐rǣs wine Scildunga
fǣttan golde fela lēanode,
manegum māðmum, syððan mergen cōm
and wē tō symble geseten hæfdon.
Þǣr wæs gidd and glēo; gomela Scilding
fela fricgende feorran rehte;
hwīlum hilde‐dēor hearpan wynne,
gomen‐wudu grētte; hwīlum gyd āwræc
sōð and sārlīc; hwīlum syllīc spell
rehte æfter rihte rūm‐heort cyning.  2110
Hwīlum eft ongan eldo gebunden,
gomel gūð‐wiga gioguðe cwīðan
hilde‐strengo; hreðer inne wēoll,
þonne hē wintrum frōd worn gemunde.
Swā wē þǣr inne andlangne dæg
nīode nāman, oð þæt niht becwōm
ōðer tō yldum. Þā wæs eft hraðe
gearo gyrn‐wræce Grendeles mōdor,
sīðode sorh‐full; sunu dēað fornam,
wīg‐hete Wedra. Wīf unhȳre  2120
hyre bearn gewræc, beorn ācwealde
ellenlīce; þǣr wæs Æsc‐here,
frōdan fyrn‐witan, feorh ūðgenge;
nōðer hȳ hine ne mōston, syððan mergen cwōm,
dēað‐wērigne Denia lēode
bronde forbærnan, nē on bǣl hladan
lēofne mannan: hīo þæt līc ætbær
fēondes fæðmum under firgen‐strēam.
Þæt wæs Hrōðgāre hrēowa tornost
þāra þe lēod‐fruman lange begeāte;  2130
þā se þēoden mec þīne līfe
healsode hrēoh‐mōd, þæt ic on holma geþring
eorl‐scipe efnde, ealdre genēðde,
mǣrðo fremede: hē mē mēde gehēt.
Ic þā þæs wælmes, þē is wīde cūð,
grimne gryrelīcne grund‐hyrde fond.
Þǣr unc hwīle wæs hand gemǣne;
holm heolfre wēoll and ic hēafde becearf
in þām grund‐sele Grendeles mōdor
ēacnum ecgum, unsōfte þonan  2140
feorh oðferede; næs ic fǣge þā gȳt,
ac mē eorla hlēo eft gesealde
māðma menigeo, maga Healfdenes.

HE GIVES PRESENTS TO HYGELAC. HYGELAC REWARDS HIM. HYGELAC'S DEATH. BĒOWULF REIGNS.[edit]

"Swā se þēod‐kyning þēawum lyfde;
nealles ic þām lēanum forloren hæfde,
mægnes mēde, ac hē mē māðmas geaf,
sunu Healfdenes, on sīnne sylfes dōm;
þā ic þē, beorn‐cyning, bringan wylle,
ēstum geȳwan. Gēn is eall æt þē
lissa gelong: ic lȳt hafo  2150
hēafod‐māga, nefne Hygelāc þec!"
Hēt þā in beran eafor, hēafod‐segn,
heaðo‐stēapne helm, hāre byrnan,
gūð‐sweord geatolīc, gyd æfter wræc:
"Mē þis hilde‐sceorp Hrōðgār sealde,
snotra fengel, sume worde hēt,
þæt ic his ǣrest þē eft gesægde,
cwæð þæt hyt hæfde Hiorogār cyning,
lēod Scyldunga lange hwīle:
nō þȳ ǣr suna sīnum syllan wolde,  2160
hwatum Heorowearde, þēah hē him hold wǣre,
brēost‐gewǣdu. Brūc ealles well!"
Hȳrde ic þæt þām frætwum fēower mēaras
lungre gelīce lāst weardode,
æppel‐fealuwe; hē him ēst getēah
mēara and māðma. Swā sceal mǣg dōn,
nealles inwit‐net ōðrum bregdan,
dyrnum cræfte dēað rēnian
hond‐gesteallan. Hygelāce wæs,
nīða heardum, nefa swȳðe hold  2170
and gehwæðer ōðrum hrōðra gemyndig.
Hȳrde ic þæt hē þone heals‐bēah Hygde gesealde,
wrǣtlīcne wundur‐māððum, þone þe him Wealhþēo geaf,
þēodnes dōhtor, þrīo wicg somod
swancor and sadol‐beorht; hyre syððan wæs
æfter bēah‐þege brēost geweorðod.
Swā bealdode bearn Ecgþēowes,
guma gūðum cūð, gōdum dǣdum,
drēah æfter dōme, nealles druncne slōg
heorð‐genēatas; næs him hrēoh sefa,  2180
ac hē man‐cynnes mǣste cræfte
gin‐fæstan gife, þē him god sealde,
hēold hilde‐dēor. Hēan wæs lange,
swā hyne Gēata bearn gōdne ne tealdon,
nē hyne on medo‐bence micles wyrðne
drihten wereda gedōn wolde;
swȳðe oft sægdon, þæt hē slēac wǣre,
æðeling unfrom: edwenden cwōm
tīr‐ēadigum menn torna gehwylces.
Hēt þā eorla hlēo in gefetian,  2190
heaðo‐rōf cyning, Hrēðles lāfe,
golde gegyrede; næs mid Gēatum þā
sinc‐māððum sēlra on sweordes hād;
þæt hē on Bīowulfes bearm ālegde,
and him gesealde seofan þūsendo,
bold and brego‐stōl. Him wæs bām samod
on þām lēod‐scipe lond gecynde,
eard ēðel‐riht, ōðrum swīðor
sīde rīce, þām þǣr sēlra wæs.
Eft þæt geīode ufaran dōgrum  2200
hilde‐hlæmmum, syððan Hygelāc læg
and Heardrēde hilde‐mēceas
under bord‐hrēoðan tō bonan wurdon,
þā hyne gesōhtan on sige‐þēode
hearde hilde‐frecan, Heaðo‐Scilfingas,
nīða genǣgdan nefan Hererīces.
Syððan Bēowulfe brāde rīce
on hand gehwearf: hē gehēold tela
fīftig wintru (wæs þā frōd cyning,
eald ēðel‐weard), oð þæt ān ongan  2210
deorcum nihtum draca rīcsian,
sē þe on hēare hǣðe hord beweotode,
stān‐beorh stēapne: stīg under læg,
eldum uncūð. Þǣr on innan gīong
niða nāt‐hwylces nēode gefēng
hǣðnum horde hond . d . . geþ . . hwylc
since fāhne, hē þæt syððan . . . . .
. . . þ . . . lð . þ . . l . g
slǣpende be fȳre, fyrena hyrde
þēofes cræfte, þæt sie . . . . ðioð . . . . .  2220
. idh . folc‐beorn, þæt hē gebolgen wæs.

THE FIRE-DRAKE. THE HOARD.[edit]

Nealles mid geweoldum wyrm‐horda . . . cræft
sōhte sylfes willum, sē þe him sāre gesceōd,
ac for þrēa‐nēdlan þēow nāt‐hwylces
hæleða bearna hete‐swengeas flēah,
for ofer‐þearfe and þǣr inne fealh
secg syn‐bysig. Sōna in þā tīde
þæt . . . . . þām gyste . . . . br . g . stōd,
hwæðre earm‐sceapen . . . . . . .
. . ð . . . sceapen o . . . . i r . . e se fǣs begeat,  2230
sinc‐fæt geseah: þǣr wæs swylcra fela
in þām eorð‐scræfe ǣr‐gestrēona,
swā hȳ on geār‐dagum gumena nāt‐hwylc
eormen‐lāfe æðelan cynnes
þanc‐hycgende þǣr gehȳdde,
dēore māðmas. Ealle hīe dēað fornam
ǣrran mǣlum, and se ān þā gēn
lēoda duguðe, sē þǣr lengest hwearf,
weard wine‐geōmor wīscte þæs yldan,
þæt hē lȳtel fæc long‐gestrēona  2240
brūcan mōste. Beorh eal gearo
wunode on wonge wæter‐ȳðum nēah,
nīwe be næsse nearo‐cræftum fæst:
þǣr on innan bær eorl‐gestrēona
hringa hyrde hard‐fyrdne dǣl
fǣttan goldes, fēa worda cwæð:
"Heald þū nū, hrūse, nū hæleð ne mōston,
eorla ǣhte. Hwæt! hit ǣr on þē
gōde begeāton; gūð‐dēað fornam,
feorh‐bealo frēcne fȳra gehwylcne,  2250
lēoda mīnra, þāra þe þis līf ofgeaf,
gesāwon sele‐drēam. Nāh hwā sweord wege
oððe fetige fǣted wǣge,
drync‐fæt dēore: duguð ellor scōc.
Sceal se hearda helm hyrsted golde
fǣtum befeallen: feormiend swefað,
þā þe beado‐grīman bȳwan sceoldon,
gē swylce sēo here‐pād, sīo æt hilde gebād
ofer borda gebræc bite īrena,
brosnað æfter beorne. Ne mæg byrnan hring  2260
æfter wīg‐fruman wīde fēran
hæleðum be healfe; næs hearpan wyn,
gomen glēo‐bēames, nē gōd hafoc
geond sæl swingeð, nē se swifta mearh
burh‐stede bēateð. Bealo‐cwealm hafað
fela feorh‐cynna feorr onsended!"
Swā giōmor‐mōd giohðo mǣnde,
ān æfter eallum unblīðe hwēop,
dæges and nihtes, oð þæt dēaðes wylm
hrān æt heortan. Hord‐wynne fond  2270
eald ūht‐sceaða opene standan,
sē þe byrnende biorgas sēceð
nacod nīð‐draca, nihtes flēogeð
fȳre befangen; hyne fold‐būend
wīde gesāwon. Hē gēwunian sceall
hlāw under hrūsan, þǣr hē hǣðen gold
warað wintrum frōd; ne byð him wihte þē sēl.
Swā se þēod‐sceaða þrēo hund wintra
hēold on hrūsan hord‐ærna sum
ēacen‐cræftig, oð þæt hyne ān ābealh  2280
mon on mōde: man‐dryhtne bær
fǣted wǣge, frioðo‐wǣre bæd
hlāford sīnne. Þā wæs hord rāsod,
onboren bēaga hord, bēne getīðad
fēa‐sceaftum men. Frēa scēawode
fīra fyrn‐geweorc forman sīðe.
Þā se wyrm onwōc, wrōht wæs genīwad;
stonc þā æfter stāne, stearc‐heort onfand
fēondes fōt‐lāst; hē tō forð gestōp,
dyrnan cræfte, dracan hēafde nēah.  2290
Swā mæg unfǣge ēaðe gedīgan
wēan and wræc‐sīð, sē þe waldendes
hyldo gehealdeð. Hord‐weard sōhte
georne æfter grunde, wolde guman findan,
þone þe him on sweofote sāre getēode:
hāt and hrēoh‐mōd hlǣw oft ymbe hwearf,
ealne ūtan‐weardne; nē þǣr ǣnig mon
wæs on þǣre wēstenne. Hwæðre hilde gefeh,
beado‐weorces: hwīlum on beorh æthwearf,
sinc‐fæt sōhte; hē þæt sōna onfand,  2300
þæt hæfde gumena sum goldes gefandod
hēah‐gestrēona. Hord‐weard onbād
earfoðlīce, oð þæt ǣfen cwōm;
wæs þā gebolgen beorges hyrde,
wolde se lāða līge forgyldan
drinc‐fæt dȳre. Þā wæs dæg sceacen
wyrme on willan, nō on wealle leng
bīdan wolde, ac mid bǣle fōr,
fȳre gefȳsed. Wæs se fruma egeslīc
lēodum on lande, swā hyt lungre wearð  2310
on hyra sinc‐gifan sāre geendod.

BEOWULF RESOLVES TO KILL THE FIRE-DRAKE.[edit]

Þā se gæst ongan glēdum spīwan,
beorht hofu bærnan; bryne‐lēoma stōd
eldum on andan; nō þǣr āht cwices
lāð lyft‐floga lǣfan wolde.
Wæs þæs wyrmes wīg wīde gesȳne,
nearo‐fāges nīð nēan and feorran,
hū se gūð‐sceaða Gēata lēode
hatode and hȳnde: hord eft gescēat,
dryht‐sele dyrnne ǣr dæges hwīle.  2320
Hæfde land‐wara līge befangen,
bǣle and bronde; beorges getruwode,
wīges and wealles: him sēo wēn gelēah.
Þā wæs Bīowulfe brōga gecȳðed
snūde tō sōðe, þæt his sylfes him
bolda sēlest bryne‐wylmum mealt,
gif‐stōl Gēata. Þæt þām gōdan wæs
hrēow on hreðre, hyge‐sorga mǣst:
wēnde se wīsa, þæt hē wealdende,
ofer ealde riht, ēcean dryhtne  2330
bitre gebulge: brēost innan wēoll
þēostrum geþoncum, swā him geþȳwe ne wæs.
Hæfde līg‐draca lēoda fæsten,
ēa‐lond ūtan, eorð‐weard þone
glēdum forgrunden. Him þæs gūð‐cyning,
Wedera þīoden, wræce leornode.
Heht him þā gewyrcean wīgendra hlēo
eall‐īrenne, eorla dryhten
wīg‐bord wrǣtlīc; wisse hē gearwe,
þæt him holt‐wudu helpan ne meahte,  2340
lind wið līge. Sceolde lǣn‐daga
æðeling ǣr‐gōd ende gebīdan
worulde līfes and se wyrm somod;
þēah þe hord‐welan hēolde lange.
Oferhogode þā hringa fengel,
þæt hē þone wīd‐flogan weorode gesōhte,
sīdan herge; nō hē him þā sæcce ondrēd,
nē him þæs wyrmes wīg for wiht dyde,
eafoð and ellen; forþon hē ǣr fela
nearo nēðende nīða gedīgde,  2350
hilde‐hlemma, syððan hē Hrōðgāres,
sigor‐ēadig secg, sele fǣlsode
and æt gūðe forgrāp Grendeles mǣgum,
lāðan cynnes. Nō þæt lǣsest wæs
hond‐gemota, þǣr mon Hygelāc slōh,
syððan Gēata cyning gūðe rǣsum,
frēa‐wine folces Frēslondum on,
Hrēðles eafora hioro‐dryncum swealt,
bille gebēaten; þonan Bīowulf cōm
sylfes cræfte, sund‐nytte drēah;  2360
hæfde him on earme ... XXX
hilde‐geatwa, þā hē tō holme stāg.
Nealles Hetware hrēmge þorfton
fēðe‐wīges, þē him foran ongēan
linde bǣron: lȳt eft becwōm
fram þām hild‐frecan hāmes nīosan.
Oferswam þā sioleða bigong sunu Ecgþēowes,
earm ān‐haga eft tō lēodum,
þǣr him Hygd gebēad hord and rīce,
bēagas and brego‐stōl: bearne ne truwode,  2370
þæt hē wið æl‐fylcum ēðel‐stōlas
healdan cūðe, þā wæs Hygelāc dēad.
Nō þȳ ǣr fēa‐sceafte findan meahton
æt þām æðelinge ǣnige þinga,
þæt hē Heardrēde hlāford wǣre,
oððe þone cyne‐dōm cīosan wolde;
hwæðre hē him on folce frēond‐lārum hēold,
ēstum mid āre, oð þæt hē yldra wearð,
Weder‐Gēatum wēold. Hyne wræc‐mæcgas
ofer sǣ sōhtan, suna Ōhteres:  2380
hæfdon hȳ forhealden helm Scylfinga,
þone sēlestan sǣ‐cyninga,
þāra þe in Swīo‐rīce sinc brytnade,
mǣrne þēoden. Him þæt tō mearce wearð;
hē þǣr orfeorme feorh‐wunde hlēat
sweordes swengum, sunu Hygelāces;
and him eft gewāt Ongenþīowes bearn
hāmes nīosan, syððan Heardrēd læg;
lēt þone brego‐stōl Bīowulf healdan,
Gēatum wealdan: þæt wæs gōd cyning.  2390

RETROSPECT OF BĒOWULF.--STRIFE BETWEEN SWEONAS AND GEATAS.[edit]

Sē þæs lēod‐hryres lēan gemunde
uferan dōgrum, Ēadgilse wearð
fēa‐sceaftum fēond. Folce gestepte
ofer sǣ sīde sunu Ōhteres
wigum and wǣpnum: hē gewræc syððan
cealdum cear‐sīðum, cyning ealdre binēat.
Swā hē nīða gehwane genesen hæfde,
slīðra geslyhta, sunu Ecgþīowes,
ellen‐weorca, oð þone ānne dæg,
þē hē wið þām wyrme gewegan sceolde.  2400
Gewāt þā twelfa sum torne gebolgen
dryhten Gēata dracan scēawian;
hæfde þā gefrūnen, hwanan sīo fǣhð ārās,
bealo‐nīð biorna; him tō bearme cwōm
māððum‐fæt mǣre þurh þæs meldan hond,
Sē wæs on þām þrēate þreotteoða secg,
sē þæs orleges ōr onstealde,
hæft hyge‐giōmor, sceolde hēan þonon
wong wīsian: hē ofer willan gīong
tō þæs þe hē eorð‐sele ānne wisse,  2410
hlǣw under hrūsan holm‐wylme nēh,
ȳð‐gewinne, sē wæs innan full
wrǣtta and wīra: weard unhīore,
gearo gūð‐freca, gold‐māðmas hēold,
eald under eorðan; næs þæt ȳðe cēap,
tō gegangenne gumena ǣnigum.
Gesæt þā on næsse nīð‐heard cyning,
þenden hǣlo ābēad heorð‐genēatum
gold‐wine Gēata: him wæs geōmor sefa,
wǣfre and wæl‐fūs, Wyrd ungemete nēah,  2420
sē þone gomelan grētan sceolde,
sēcean sāwle hord, sundur gedǣlan
līf wið līce: nō þon lange wæs
feorh æðelinges flǣsce bewunden.
Bīowulf maðelade, bearn Ecgþēowes:
"Fela ic on giogoðe guð‐rǣsa genæs,
orleg‐hwīla: ic þæt eall gemon.
Ic wæs syfan‐wintre, þā mec sinca baldor,
frēa‐wine folca æt mīnum fæder genam,
hēold mec and hæfde Hrēðel cyning,  2430
geaf mē sinc and symbel, sibbe gemunde;
næs ic him tō līfe lāðra ōwihte
beorn in burgum, þonne his bearna hwylc,
Herebeald and Hæðcyn, oððe Hygelāc mīn.
Wæs þām yldestan ungedēfelīce
mǣges dǣdum morðor‐bed strēd,
syððan hyne Hæðcyn of horn‐bogan,
his frēa‐wine flāne geswencte,
miste mercelses and his mǣg ofscēt,
brōðor ōðerne, blōdigan gāre:  2440
þæt wæs feoh‐lēas gefeoht, fyrenum gesyngad
hreðre hyge‐mēðe; sceolde hwæðre swā þēah
æðeling unwrecen ealdres linnan.
Swā bið geōmorlīc gomelum ceorle
tō gebīdanne, þæt his byre rīde
giong on galgan, þonne hē gyd wrece,
sārigne sang, þonne his sunu hangað
hrefne tō hrōðre and hē him helpe ne mæg,
eald and in‐frōd, ǣnige gefremman.
Symble bið gemyndgad morna gehwylce  2450
eaforan ellor‐sīð; ōðres ne gȳmeð
tō gebīdanne burgum on innan
yrfe‐weardes, þonne se ān hafað
þurh dēaðes nȳd dǣda gefondad.
Gesyhð sorh‐cearig on his suna būre
wīn‐sele wēstne, wind‐gereste,
rēote berofene; rīdend swefað
hæleð in hoðman; nis þǣr hearpan swēg,
gomen in geardum, swylce þǣr iū wǣron.

MEMORIES OF PAST TIME.-THE FEUD WITH THE FIRE-DRAKE.[edit]

"Gewīteð þonne on sealman, sorh‐lēoð gæleð  2460
ān æfter ānum: þūhte him eall tō rūm,
wongas and wīc‐stede. Swā Wedra helm
æfter Herebealde heortan sorge
weallende wæg, wihte ne meahte
on þām feorh‐bonan fǣhðe gebētan:
nō þȳ ǣr hē þone heaðo‐rinc hatian ne meahte
lāðum dǣdum, þēah him lēof ne wæs.
Hē þā mid þǣre sorge, þē him sīo sār belamp,
gum‐drēam ofgeaf, godes lēoht gecēas;
eaferum lǣfde, swā dēð ēadig mon,  2470
lond and lēod‐byrig, þā hē of līfe gewāt.
Þā wæs synn and sacu Swēona and Gēata,
ofer wīd wæter wrōht gemǣne,
here‐nīð hearda, syððan Hrēðel swealt,
oððe him Ongenþēowes eaferan wǣran
frome fyrd‐hwate, frēode ne woldon
ofer heafo healdan, ac ymb Hrēosna‐beorh
eatolne inwit‐scear oft gefremedon.
Þæt mǣg‐wine mīne gewrǣcan,
fǣhðe and fyrene, swā hyt gefrǣge wæs,  2480
þēah þe ōðer hit ealdre gebohte,
heardan cēape: Hæðcynne wearð,
Gēata dryhtne, gūð onsǣge.
Þā ic on morgne gefrægn mǣg ōðerne
billes ecgum on bonan stǣlan,
þǣr Ongenþēow Eofores nīosade:
gūð‐helm tōglād, gomela Scylfing
hrēas heoro‐blāc; hond gemunde
fǣhðo genōge, feorh‐sweng ne oftēah.
Ic him þā māðmas, þē hē mē sealde,  2490
geald æt gūðe, swā mē gifeðe wæs,
lēohtan sweorde: hē mē lond forgeaf,
eard ēðel‐wyn. Næs him ǣnig þearf,
þæt hē tō Gifðum oððe tō Gār‐Denum
oððe in Swīo‐rīce sēcean þurfe
wyrsan wīg‐frecan, weorðe gecȳpan;
symle ic him on fēðan beforan wolde,
āna on orde, and swā tō aldre sceall
sæcce fremman, þenden þis sweord þolað,
þæt mec ǣr and sīð oft gelǣste,  2500
syððan ic for dugeðum Dæghrefne wearð
tō hand‐bonan, Hūga cempan:
nalles hē þā frætwe Frēs‐cyninge,
brēost‐weorðunge bringan mōste,
ac in campe gecrong cumbles hyrde,
æðeling on elne. Ne wæs ecg bona,
ac him hilde‐grāp heortan wylmas,
bān‐hūs gebræc. Nū sceall billes ecg,
hond and heard sweord ymb hord wīgan."
Bēowulf maðelode, bēot‐wordum spræc  2510
nīehstan sīðe: "Ic genēðde fela
gūða on geogoðe; gȳt ic wylle,
frōd folces weard, fǣhðe sēcan,
mǣrðum fremman, gif mec se mān‐sceaða
of eorð‐sele ūt gesēceð!"
Gegrētte þā gumena gehwylcne,
hwate helm‐berend hindeman sīðe,
swǣse gesīðas: "Nolde ic sweord beran,
wǣpen tō wyrme, gif ic wiste hū
wið þām āglǣcean elles meahte  2520
gylpe wiðgrīpan, swā ic giō wið Grendle dyde;
ac ic þǣr heaðu‐fȳres hātes wēne,
rēðes and‐hāttres: forþon ic mē on hafu
bord and byrnan. Nelle ic beorges weard
oferflēon fōtes trem, fēond unhȳre,
ac unc sceal weorðan æt wealle, swā unc Wyrd getēoð,
metod manna gehwæs. Ic eom on mōde from,
þæt ic wið þone gūð‐flogan gylp ofersitte.
Gebīde gē on beorge byrnum werede,
secgas on searwum, hwæðer sēl mǣge  2530
æfter wæl‐rǣse wunde gedȳgan
uncer twēga. Nis þæt ēower sīð,
nē gemet mannes, nefne mīn ānes,
þæt hē wið āglǣcean eofoðo dǣle,
eorl‐scype efne. Ic mid elne sceall
gold gegangan oððe gūð nimeð,
feorh‐bealu frēcne, frēan ēowerne!"
Ārās þā bī ronde rōf ōretta,
heard under helm, hioro‐sercean bær
under stān‐cleofu, strengo getruwode  2540
ānes mannes: ne bið swylc earges sīð.
Geseah þā be wealle, sē þe worna fela,
gum‐cystum gōd, gūða gedīgde,
hilde‐hlemma, þonne hnitan fēðan,
(stōd on stān‐bogan) strēam ūt þonan
brecan of beorge; wæs þǣre burnan wælm
heaðo‐fȳrum hāt: ne meahte horde nēah
unbyrnende ǣnige hwīle
dēop gedȳgan for dracan lēge.
Lēt þā of brēostum, þā hē gebolgen wæs,  2550
Weder‐Gēata lēod word ūt faran,
stearc‐heort styrmde; stefn in becōm
heaðo‐torht hlynnan under hārne stān.
Hete wæs onhrēred, hord‐weard oncnīow
mannes reorde; næs þǣr māra fyrst,
frēode tō friclan. From ǣrest cwōm
oruð āglǣcean ūt of stāne,
hāt hilde‐swāt; hrūse dynede.
Biorn under beorge bord‐rand onswāf
wið þām gryre‐gieste, Gēata dryhten:  2560
þā wæs hring‐bogan heorte gefȳsed
sæcce tō sēceanne. Sweord ǣr gebrǣ
gōd gūð‐cyning gomele lāfe,
ecgum unglēaw, ǣghwæðrum wæs
bealo‐hycgendra brōga fram ōðrum.
Stīð‐mōd gestōd wið stēapne rond
winia bealdor, þā se wyrm gebēah
snūde tōsomne: hē on searwum bād.
Gewāt þā byrnende gebogen scrīðan tō,
gescīfe scyndan. Scyld wēl gebearg  2570
līfe and līce lǣssan hwīle
mǣrum þēodne, þonne his myne sōhte,
þǣr hē þȳ fyrste forman dōgore
wealdan mōste, swā him Wyrd ne gescrāf
hrēð æt hilde. Hond up ābræd
Gēata dryhten, gryre‐fāhne slōh
incge lāfe, þæt sīo ecg gewāc
brūn on bāne, bāt unswīðor,
þonne his þīod‐cyning þearfe hæfde,
bysigum gebǣded. Þā wæs beorges weard  2580
æfter heaðu‐swenge on hrēoum mōde,
wearp wæl‐fȳre, wīde sprungon
hilde‐lēoman: hrēð‐sigora ne gealp
gold‐wine Gēata, gūð‐bill geswāc
nacod æt nīðe, swā hyt nō sceolde,
īren ǣr‐gōd. Ne wæs þæt ēðe sīð,
þæt se mǣra maga Ecgþēowes
grund‐wong þone ofgyfan wolde;
sceolde wyrmes willan wīc eardian
elles hwergen, swā sceal ǣghwylc mon  2590
ālǣtan lǣn‐dagas. Næs þā long tō þon,
þæt þā āglǣcean hȳ eft gemētton.
Hyrte hyne hord‐weard, hreðer ǣðme wēoll,
nīwan stefne: nearo þrowode
fȳre befongen sē þe ǣr folce wēold.
Nealles him on hēape hand‐gesteallan,
æðelinga bearn ymbe gestōdon
hilde‐cystum, ac hȳ on holt bugon,
ealdre burgan. Hiora in ānum wēoll
sefa wið sorgum: sibb ǣfre ne mæg  2600
wiht onwendan, þām þe wēl þenceð.

WIGLAF HELPS BĒOWULF IN THE FEUD[edit]

Wīglāf wæs hāten Wēoxstānes sunu,
lēoflīc lind‐wiga, lēod Scylfinga,
mǣg Ælfheres: geseah his mon‐dryhten
under here‐grīman hāt þrowian.
Gemunde þā þā āre, þē hē him ǣr forgeaf
wīc‐stede weligne Wǣgmundinga,
folc‐rihta gehwylc, swā his fæder āhte;
ne mihte þā forhabban, hond rond gefēng,
geolwe linde, gomel swyrd getēah,  2610
þæt wæs mid eldum Ēanmundes lāf,
suna Ōhteres, þām æt sæcce wearð
wracu wine‐lēasum Wēohstānes bana
mēces ecgum, and his māgum ætbær
brūn‐fāgne helm, hringde byrnan,
eald sweord eotonisc, þæt him Onela forgeaf,
his gædelinges gūð‐gewǣdu,
fyrd‐searo fūslīc: nō ymbe þā fǣhðe spræc,
þēah þe hē his brōðor bearn ābredwade.
Hē frætwe gehēold fela missēra,  2620
bill and byrnan, oð þæt his byre mihte
eorl‐scipe efnan, swā his ǣr‐fæder;
geaf him þā mid Gēatum gūð‐gewǣda
ǣghwæs unrīm; þā hē of ealdre gewāt,
frōd on forð‐weg. Þā wæs forma sīð
geongan cempan, þæt hē gūðe rǣs
mid his frēo‐dryhtne fremman sceolde;
ne gemealt him se mōd‐sefa, nē his mǣges lāf
gewāc æt wīge: þæt se wyrm onfand,
syððan hīe tōgædre gegān hæfdon.  2630
Wīglāf maðelode word‐rihta fela,
sægde gesīðum, him wæs sefa geōmor:
"Ic þæt mǣl geman, þǣr wē medu þēgun,
þonne wē gehēton ūssum hlāforde
in bīor‐sele, þē ūs þās bēagas geaf,
þæt wē him þā gūð‐geatwa gyldan woldon,
gif him þyslīcu þearf gelumpe,
helmas and heard sweord: þē hē ūsic on herge gecēas
tō þyssum sīð‐fate sylfes willum,
onmunde ūsic mǣrða and mē þās māðmas geaf,  2640
þē hē ūsic gār‐wīgend gōde tealde,
hwate helm‐berend, þēah þe hlāford ūs
þis ellen‐weorc āna āþōhte
tō gefremmanne, folces hyrde,
forþām hē manna mǣst mǣrða gefremede,
dǣda dollīcra. Nū is sē dæg cumen,
þæt ūre man‐dryhten mægenes behōfað
gōdra gūð‐rinca: wutun gangan tō,
helpan hild‐fruman, þenden hyt sȳ,
glēd‐egesa grim! God wāt on mec,  2650
þæt mē is micle lēofre, þæt mīnne līc‐haman
mid mīnne gold‐gyfan glēd fæðmie.
Ne þynceð mē gerysne, þæt wē rondas beren
eft tō earde, nemne wē ǣror mǣgen
fāne gefyllan, feorh ealgian
Wedra þīodnes. Ic wāt geare,
þæt nǣron eald‐gewyrht, þæt hē āna scyle
Gēata duguðe gnorn þrowian,
gesīgan æt sæcce: sceal ūrum þæt sweord and helm,
byrne and byrdu‐scrūd bām gemǣne."  2660
Wōd þā þurh þone wæl‐rēc, wīg‐heafolan bær
frēan on fultum, fēa worda cwæð:
"Lēofa Bīowulf, lǣst eall tela,
swā þū on geoguð‐fēore geāra gecwǣde,
þæt þū ne ālǣte be þē lifigendum
dōm gedrēosan: scealt nū dǣdum rōf,
æðeling ān‐hȳdig, ealle mægene
feorh ealgian; ic þē fullǣstu!"
Æfter þām wordum wyrm yrre cwōm,
atol inwit‐gæst ōðre sīðe,  2670
fȳr‐wylmum fāh fīonda nīosan,
lāðra manna; līg‐ȳðum forborn
bord wið ronde: byrne ne meahte
geongum gār‐wigan gēoce gefremman:
ac se maga geonga under his mǣges scyld
elne geēode, þā his āgen wæs
glēdum forgrunden. Þā gēn gūð‐cyning
mǣrða gemunde, mægen‐strengo,
slōh hilde‐bille, þæt hyt on heafolan stōd
nīðe genȳded: Nægling forbærst,  2680
geswāc æt sæcce sweord Bīowulfes
gomol and grǣg‐mǣl. Him þæt gifeðe ne wæs,
þæt him īrenna ecge mihton
helpan æt hilde; wæs sīo hond tō strong,
sē þe mēca gehwane mīne gefrǣge
swenge ofersōhte, þonne hē tō sæcce bær
wǣpen wundrum heard, næs him wihte þē sēl.
Þā wæs þēod‐sceaða þriddan sīðe,
frēcne fȳr‐draca fǣhða gemyndig,
rǣsde on þone rōfan, þā him rūm āgeald,  2690
hāt and heaðo‐grim, heals ealne ymbefēng
biteran bānum; hē geblōdegod wearð
sāwul‐drīore; swāt ȳðum wēoll.

BĒOWULF WOUNDED TO DEATH.[edit]

Þā ic æt þearfe gefrægn þēod‐cyninges
and‐longne eorl ellen cȳðan,
cræft and cēnðu, swā him gecynde wæs;
ne hēdde hē þæs heafolan, ac sīo hand gebarn
mōdiges mannes, þǣr hē his mǣges healp,
þæt hē þone nīð‐gæst nioðor hwēne slōh,
secg on searwum, þæt þæt sweord gedēaf  2700
fāh and fǣted, þæt þæt fȳr ongon
sweðrian syððan. Þā gēn sylf cyning
gewēold his gewitte, wæll‐seaxe gebrǣ,
biter and beadu‐scearp, þæt hē on byrnan wæg:
forwrāt Wedra helm  wyrm on middan.
Fēond gefyldan (ferh ellen wræc),
and hī hyne þā bēgen ābroten hæfdon,
sib‐æðelingas: swylc sceolde secg wesan,
þegn æt þearfe. Þæt þām þēodne wæs
sīðast sīge‐hwīle sylfes dǣdum,  2710
worlde geweorces. Þā sīo wund ongon,
þē him se eorð‐draca ǣr geworhte,
swelan and swellan. Hē þæt sōna onfand,
þæt him on brēostum bealo‐nīð wēoll,
attor on innan. Þā se æðeling gīong,
þæt hē bī wealle, wīs‐hycgende,
gesæt on sesse; seah on enta geweorc,
hū þā stān‐bogan stapulum fæste
ēce eorð‐reced innan hēoldon.
Hyne þā mid handa heoro‐drēorigne  2720
þēoden mǣrne þegn ungemete till,
wine‐dryhten his wætere gelafede,
hilde‐sædne and his helm onspēon.
Bīowulf maðelode, hē ofer benne spræc,
wunde wæl‐blēate (wisse hē gearwe,
þæt hē dæg‐hwīla gedrogen hæfde
eorðan wynne; þā wæs eall sceacen
dōgor‐gerīmes, dēað ungemete nēah):
"Nū ic suna mīnum syllan wolde
gūð‐gewǣdu, þǣr mē gifeðe swā  2730
ǣnig yrfe‐weard æfter wurde,
līce gelenge. Ic þās lēode hēold
fīftig wintra: næs se folc‐cyning
ymbe‐sittendra ǣnig þāra,
þē mec gūð‐winum grētan dorste,
egesan þēon. Ic on earde bād
mǣl‐gesceafta, hēold mīn tela,
ne sōhte searo‐nīðas, nē mē swōr fela
āða on unriht. Ic þæs ealles mæg,
feorh‐bennum sēoc, gefēan habban:  2740
forþām mē wītan ne þearf waldend fīra
morðor‐bealo māga, þonne mīn sceaceð
līf of līce. Nū þū lungre
geong, hord scēawian under hārne stān,
Wīglāf lēofa, nū se wyrm ligeð,
swefeð sāre wund, since berēafod.
Bīo nū on ofoste, þæt ic ǣr‐welan,
gold‐ǣht ongite, gearo scēawige
swegle searo‐gimmas, þæt ic þȳ sēft mǣge
æfter māððum‐welan mīn ālǣtan  2750
līf and lēod‐scipe, þone ic longe hēold."

THE JEWEL-HOARD. THE PASSING OF BEOWULF.[edit]

Þā ic snūde gefrægn sunu Wīhstānes
æfter word‐cwydum wundum dryhtne
hȳran heaðo‐sīocum, hring‐net beran,
brogdne beadu‐sercean under beorges hrōf.
Geseah þā sige‐hrēðig, þā hē bī sesse gēong,
mago‐þegn mōdig māððum‐sigla fela,
gold glitinian grunde getenge,
wundur on wealle and þæs wyrmes denn,
ealdes ūht‐flogan, orcas stondan,  2760
fyrn‐manna fatu feormend‐lēase,
hyrstum behrorene: þǣr wæs helm monig,
eald and ōmig, earm‐bēaga fela,
searwum gesǣled. Sinc ēaðe mæg,
gold on grunde, gumena cynnes
gehwone ofer‐hīgian, hȳde sē þe wylle!
Swylce hē siomian geseah segn eall‐gylden
hēah ofer horde, hond‐wundra mǣst,
gelocen leoðo‐cræftum: of þām lēoma stōd,
þæt hē þone grund‐wong ongitan meahte,  2770
wrǣte giond‐wlītan. Næs þæs wyrmes þǣr
onsȳn ǣnig, ac hyne ecg fornam.
Þā ic on hlǣwe gefrægn hord rēafian,
eald enta geweorc ānne mannan,
him on bearm hladan bunan and discas
sylfes dōme, segn ēac genom,
bēacna beorhtost; bill ǣr‐gescōd
(ecg wæs īren) eald‐hlāfordes
þām þāra māðma mund‐bora wæs
longe hwīle, līg‐egesan wæg  2780
hātne for horde, hioro‐weallende,
middel‐nihtum, oð þæt hē morðre swealt.
Ār wæs on ofoste eft‐sīðes georn,
frætwum gefyrðred: hyne fyrwet bræc,
hwæðer collen‐ferð cwicne gemētte
in þām wong‐stede Wedra þēoden,
ellen‐sīocne, þǣr hē hine ǣr forlēt.
Hē þā mid þām māðmum mǣrne þīoden,
dryhten sīnne drīorigne fand
ealdres æt ende: hē hine eft ongon  2790
wæteres weorpan, oð þæt wordes ord
brēost‐hord þurhbræc. Bēowulf maðelode,
gomel on giohðe (gold scēawode):
"Ic þāra frætwa frēan ealles þanc
wuldur‐cyninge wordum secge,
ēcum dryhtne, þē ic hēr on starie,
þæs þe ic mōste mīnum lēodum
ǣr swylt‐dæge swylc gestrȳnan.
Nū ic on māðma hord mīne bebohte
frōde feorh‐lege, fremmað gē nū  2800
lēoda þearfe; ne mæg ic hēr leng wesan.
Hātað heaðo‐mǣre hlǣw gewyrcean,
beorhtne æfter bǣle æt brimes nosan;
se scel tō gemyndum mīnum lēodum
hēah hlīfian on Hrones næsse,
þæt hit sǣ‐līðend syððan hātan
Bīowulfes biorh, þā þe brentingas
ofer flōda genipu feorran drīfað."
Dyde him of healse hring gyldenne
þīoden þrīst‐hȳdig, þegne gesealde,  2810
geongum gār‐wigan, gold‐fāhne helm,
bēah and byrnan, hēt hyne brūcan well:
"Þū eart ende‐lāf ūsses cynnes,
Wǣgmundinga; ealle Wyrd forswēof,
mīne māgas tō metod‐sceafte,
eorlas on elne: ic him æfter sceal."
Þæt wæs þām gomelan gingeste word
brēost‐gehygdum, ǣr hē bǣl cure,
hāte heaðo‐wylmas: him of hreðre gewāt
sāwol sēcean sōð‐fæstra dōm.  2820

THE COWARD-THANES.[edit]

Þā wæs gegongen guman unfrōdum
earfoðlīce, þæt hē on eorðan geseah
þone lēofestan līfes æt ende
blēate gebǣran. Bona swylce læg,
egeslīc eorð‐draca, ealdre berēafod,
bealwe gebǣded: bēah‐hordum leng
wyrm wōh‐bogen wealdan ne mōste,
ac him īrenna ecga fornāmon,
hearde heaðo‐scearpe homera lāfe,
þæt se wīd‐floga wundum stille  2830
hrēas on hrūsan hord‐ærne nēah,
nalles æfter lyfte lācende hwearf
middel‐nihtum, māðm‐ǣhta wlonc
ansȳn ȳwde: ac hē eorðan gefēoll
for þæs hild‐fruman hond‐geweorce.
Hūru þæt on lande lȳt manna þāh
mægen‐āgendra mīne gefrǣge,
þēah þe hē dǣda gehwæs dyrstig wǣre,
þæt hē wið attor‐sceaðan oreðe gerǣsde,
oððe hring‐sele hondum styrede,  2840
gif hē wæccende weard onfunde
būan on beorge. Bīowulfe wearð
dryht‐māðma dǣl dēaðe forgolden;
hæfde ǣghwæðer ende gefēred
lǣnan līfes. Næs þā lang tō þon,
þæt þā hild‐latan holt ofgēfan,
tȳdre trēow‐logan tȳne ætsomne,
þā ne dorston ǣr dareðum lācan
on hyra man‐dryhtnes miclan þearfe;
ac hȳ scamiende scyldas bǣran,  2850
gūð‐gewǣdu, þǣr se gomela læg:
wlitan on Wīglāf. Hē gewērgad sæt,
fēðe‐cempa frēan eaxlum nēah,
wehte hyne wætre; him wiht ne spēow;
ne meahte hē on eorðan, þēah hē ūðe wēl,
on þām frum‐gāre feorh gehealdan,
nē þæs wealdendes willan wiht oncirran;
wolde dōm godes dǣdum rǣdan
gumena gehwylcum, swā hē nū gēn dēð.
Þā wæs æt þām geongan grim andswaru  2860
ēð‐begēte þām þe ǣr his elne forlēas.
Wīglāf maðelode, Wēohstānes sunu,
secg sārig‐ferð seah on unlēofe:
"Þæt lā mæg secgan, sē þe wyle sōð sprecan,
þæt se mon‐dryhten, se ēow þā māðmas geaf,
ēored‐geatwe, þē gē þǣr on standað,
þonne hē on ealu‐bence oft gesealde
heal‐sittendum helm and byrnan,
þēoden his þegnum, swylce hē þrȳðlīcost
ōhwǣr feor oððe nēah findan meahte,  2870
þæt hē gēnunga gūð‐gewǣdu
wrāðe forwurpe. Þā hyne wīg beget,
nealles folc‐cyning fyrd‐gesteallum
gylpan þorfte; hwæðre him god ūðe,
sigora waldend, þæt hē hyne sylfne gewræc
āna mid ecge, þā him wæs elnes þearf,
Ic him līf‐wraðe lȳtle meahte
ætgifan æt gūðe and ongan swā þēah
ofer mīn gemet mǣges helpan:
symle wæs þȳ sǣmra, þonne ic sweorde drep  2880
ferhð‐genīðlan, fȳr unswīðor
wēoll of gewitte. Wergendra tō lȳt
þrong ymbe þēoden, þā hyne sīo þrāg becwōm.
Nū sceal sinc‐þego and swyrd‐gifu
eall ēðel‐wyn ēowrum cynne,
lufen ālicgean: lond‐rihtes mōt
þǣre mǣg‐burge monna ǣghwylc
īdel hweorfan, syððan æðelingas
feorran gefricgean flēam ēowerne,
dōm‐lēasan dǣd. Dēað bið sēlla  2890
eorla gehwylcum þonne edwīt‐līf!"

THE SOLDIER'S DIRGE AND PROPHECY.[edit]

Heht þā þæt heaðo‐weorc tō hagan bīodan
up ofer ēg‐clif, þǣr þæt eorl‐weorod
morgen‐longne dæg mōd‐giōmor sæt,
bord‐hæbbende, bēga on wēnum
ende‐dōgores and eft‐cymes
lēofes monnes. Lȳt swīgode
nīwra spella, sē þe næs gerād,
ac hē sōðlīce sægde ofer ealle;
"Nū is wil‐geofa Wedra lēoda,  2900
dryhten Gēata dēað‐bedde fæst,
wunað wæl‐reste wyrmes dǣdum;
him on efn ligeð ealdor‐gewinna,
siex‐bennum sēoc: sweorde ne meahte
on þām āglǣcean ǣnige þinga
wunde gewyrcean. Wīglāf siteð
ofer Bīowulfe, byre Wīhstānes,
eorl ofer ōðrum unlifigendum,
healdeð hige‐mēðum hēafod‐wearde
lēofes and lāðes. Nū ys lēodum wēn  2910
orleg‐hwīle, syððan underne
Froncum and Frȳsum fyll cyninges
wīde weorðeð. Wæs sīo wrōht scepen
heard wið Hūgas, syððan Higelāc cwōm
faran flot‐herge on Frēsna land,
þǣr hyne Hetware hilde gehnǣgdon,
elne geēodon mid ofer‐mægene,
þæt se byrn‐wiga būgan sceolde,
fēoll on fēðan: nalles frætwe geaf
ealdor dugoðe; ūs wæs ā syððan  2920
Merewīoinga milts ungyfeðe.
Nē ic tō Swēo‐þēode sibbe oððe trēowe
wihte ne wēne; ac wæs wīde cūð,
þætte Ongenþīo ealdre besnyðede
Hæðcyn Hrēðling wið Hrefna‐wudu,
þā for on‐mēdlan ǣrest gesōhton
Gēata lēode Gūð‐scilfingas.
Sōna him se frōda fæder Ōhtheres,
eald and eges‐full ond‐slyht āgeaf,
ābrēot brim‐wīsan, brȳd āhēorde,  2930
gomela īo‐meowlan golde berofene,
Onelan mōdor and Ōhtheres,
and þā folgode feorh‐genīðlan
oð þæt hī oðēodon earfoðlīce
in Hrefnes‐holt hlāford‐lēase.
Besæt þā sin‐herge sweorda lāfe
wundum wērge, wēan oft gehēt
earmre teohhe andlonge niht:
cwæð hē on mergenne mēces ecgum
gētan wolde, sume on galg‐trēowum  2940
fuglum tō gamene. Frōfor eft gelamp
sārig‐mōdum somod ǣr‐dæge,
syððan hīe Hygelāces horn and bȳman
gealdor ongeāton. Þā se gōda cōm
lēoda dugoðe on lāst faran.

HE TELLS OF THE SWEDES AND THE GEATAS[edit]

"Wæs sīo swāt‐swaðu Swēona and Gēata,
wæl‐rǣs wera wīde gesȳne,
hū þā folc mid him fǣhðe tōwehton.
Gewāt him þā se gōda mid his gædelingum,
frōd fela geōmor fæsten sēcean,  2950
eorl Ongenþīo ufor oncirde;
hæfde Higelāces hilde gefrūnen,
wlonces wīg‐cræft, wiðres ne truwode,
þæt hē sǣ‐mannum onsacan mihte,
hēaðo‐līðendum hord forstandan,
bearn and brȳde; bēah eft þonan
eald under eorð‐weall. Þā wæs ǣht boden
Swēona lēodum, segn Higelāce.
Freoðo‐wong þone forð oferēodon,
syððan Hrēðlingas tō hagan þrungon.  2960
Þǣr wearð Ongenþīo ecgum sweorda,
blonden‐fexa on bīd wrecen,
þæt se þēod‐cyning þafian sceolde
Eofores ānne dōm: hyne yrringa
Wulf Wonrēding wǣpne gerǣhte,
þæt him for swenge swāt ǣdrum sprong
forð under fexe. Næs hē forht swā þēh,
gomela Scilfing, ac forgeald hraðe
wyrsan wrixle wæl‐hlem þone,
syððan þēod‐cyning þyder oncirde:  2970
ne meahte se snella sunu Wonrēdes
ealdum ceorle ond‐slyht giofan,
ac hē him on hēafde helm ǣr gescer,
þæt hē blōde fāh būgan sceolde,
fēoll on foldan; næs hē fǣge þā gīt,
ac hē hyne gewyrpte, þēah þe him wund hrīne,
Lēt se hearda Higelāces þegn
brādne mēce, þā his brōðor læg,
eald sweord eotonisc, entiscne helm,
brecan ofer bord‐weal: þā gebēah cyning,  2980
folces hyrde, wæs in feorh dropen.
Þā wǣron monige, þē his mǣg wriðon,
ricone ārǣrdon, þā him gerȳmed wearð,
þæt hīe wæl‐stōwe wealdan mōston.
Þenden rēafode rinc ōðerne,
nam on Ongenþīo īren‐byrnan,
heard swyrd hilted and his helm somod;
hāres hyrste Higelāce bær.
Hē þām frætwum fēng and him fægre gehēt
lēana fore lēodum and gelǣste swā:  2990
geald þone gūð‐rǣs Gēata dryhten,
Hrēðles eafora, þā hē tō hām becōm,
Jofore and Wulfe mid ofer‐māðmum,
sealde hiora gehwæðrum hund þūsenda
landes and locenra bēaga; ne þorfte him þā lēan oðwītan
mon on middan‐gearde, syððan hīe þā mǣrða geslōgon;
and þā Jofore forgeaf āngan dōhtor,
hām‐weorðunge, hyldo tō wedde.
Þæt ys sīo fǣhðo and se fēond‐scipe,
wæl‐nīð wera, þæs þe ic wēn hafo,  3000
þē ūs sēceað tō Swēona lēode,
syððan hīe gefricgeað frēan ūserne
ealdor‐lēasne, þone þe ǣr gehēold
wið hettendum hord and rīce,
æfter hæleða hryre hwate Scylfingas,
folc‐rǣd fremede oððe furður gēn
eorl‐scipe efnde. Nū is ofost betost,
þæt wē þēod‐cyning þǣr scēawian
and þone gebringan, þē ūs bēagas geaf,
on ād‐fære. Ne scel ānes hwæt  3010
meltan mid þām mōdigan, ac þǣr is māðma hord.
gold unrīme grimme gecēapod
and nū æt sīðestan sylfes fēore
bēagas gebohte; þā sceal brond fretan,
ǣled þeccean, nalles eorl wegan
māððum tō gemyndum, nē mægð scȳne
habban on healse hring‐weorðunge,
ac sceall geōmor‐mōd golde berēafod
oft nalles ǣne el‐land tredan,
nū se here‐wīsa hleahtor ālegde,  3020
gamen and glēo‐drēam. Forþon sceall gār wesan
monig morgen‐ceald mundum bewunden,
hæfen on handa, nalles hearpan swēg
wīgend weccean, ac se wonna hrefn
fūs ofer fǣgum, fela reordian,
earne secgan, hū him æt ǣte spēow,
þenden hē wið wulf wæl rēafode."
Swā se secg hwata secgende wæs
lāðra spella; hē ne lēag fela
wyrda nē worda. Weorod eall ārās,  3030
ēodon unblīðe under Earna næs
wollen‐tēare wundur scēawian.
Fundon þā on sande sāwul‐lēasne
hlim‐bed healdan, þone þe him hringas geaf
ǣrran mǣlum: þā wæs ende‐dæg
gōdum gegongen, þæt se gūð‐cyning,
Wedra þēoden, wundor‐dēaðe swealt.
Ǣr hī gesēgan syllīcran wiht,
wyrm on wonge wiðer‐ræhtes þǣr
lāðne licgean: wæs se lēg‐draca,  3040
grimlīc gryre‐gæst, glēdum beswǣled,
sē wæs fīftiges fōt‐gemearces.
lang on legere, lyft‐wynne hēold
nihtes hwīlum, nyðer eft gewāt
dennes nīosian; wæs þā dēaðe fæst,
hæfde eorð‐scrafa ende genyttod.
Him big stōdan bunan and orcas,
discas lāgon and dȳre swyrd,
ōmige þurh‐etone, swā hīe wið eorðan fæðm
þūsend wintra þǣr eardodon:  3050
þonne wæs þæt yrfe ēacen‐cræftig,
iū‐monna gold galdre bewunden,
þæt þām hring‐sele hrīnan ne mōste
gumena ǣnig, nefne god sylfa,
sigora sōð‐cyning, sealde þām þe hē wolde
(hē is manna gehyld) hord openian,
efne swā hwylcum manna, swā him gemet þūhte.

WĪGLAF SPEAKS. THE BUILDING OF THE BALE-FIRE.[edit]

Þā wæs gesȳne, þæt se sīð ne þāh
þām þe unrihte inne gehȳdde
wrǣte under wealle. Weard ǣr ofslōh  3060
fēara sumne; þā sīo fǣhð gewearð
gewrecen wrāðlīce. Wundur hwār, þonne
eorl ellen‐rōf ende gefēre
līf‐gesceafta, þonne leng ne mæg
mon mid his māgum medu‐seld būan.
Swā wæs Bīowulfe, þā hē biorges weard
sōhte, searo‐nīðas: seolfa ne cūðe,
þurh hwæt his worulde gedāl weorðan sceolde;
swā hit oð dōmes dæg dīope benemdon
þēodnas mǣre, þā þæt þǣr dydon,  3070
þæt se secg wǣre synnum scildig,
hergum geheaðerod, hell‐bendum fæst,
wommum gewītnad, sē þone wong strāde.
Næs hē gold‐hwæt: gearwor hæfde
āgendes ēst ǣr gescēawod.
Wīglāf maðelode, Wīhstānes sunu:
"Oft sceall eorl monig ānes willan
wrǣc ādrēogan, swā ūs geworden is.
Ne meahton wē gelǣran lēofne þēoden,
rīces hyrde rǣd ǣnigne,  3080
þæt hē ne grētte gold‐weard þone,
lēte hyne licgean, þǣr hē longe wæs,
wīcum wunian oð woruld‐ende.
Hēoldon hēah gesceap: hord ys gescēawod,
grimme gegongen; wæs þæt gifeðe tō swīð,
þē þone þēoden þyder ontyhte.
Ic wæs þǣr inne and þæt eall geond‐seh,
recedes geatwa, þā mē gerȳmed wæs,
nealles swǣslīce sīð ālȳfed
inn under eorð‐weall. Ic on ofoste gefēng  3090
micle mid mundum mægen‐byrðenne
hord‐gestrēona, hider ūt ætbær
cyninge mīnum: cwico wæs þā gēna,
wīs and gewittig; worn eall gespræc
gomol on gehðo and ēowic grētan hēt,
bæd þæt gē geworhton æfter wines dǣdum
in bǣl‐stede beorh þone hēan
micelne and mǣrne, swā hē manna wæs
wīgend weorð‐fullost wīde geond eorðan,
þenden hē burh‐welan brūcan mōste.  3100
Uton nū efstan ōðre sīðe
sēon and sēcean searo‐geþræc,
wundur under wealle! ic ēow wīsige,
þæt gē genōge nēan scēawiað
bēagas and brād gold. Sīe sīo bǣr gearo
ǣdre geæfned, þonne wē ūt cymen,
and þonne geferian frēan ūserne,
lēofne mannan, þǣr hē longe sceal
on þæs waldendes wǣre geþolian."
Hēt þā gebēodan byre Wīhstānes,  3110
hæle hilde‐dīor, hæleða monegum
bold‐āgendra, þæt hīe bǣl‐wudu
feorran feredon, folc‐āgende
gōdum tōgēnes: "Nū sceal glēd fretan
(weaxan wonna lēg) wigena strengel,
þone þe oft gebād īsern‐scūre,
þonne strǣla storm, strengum gebǣded,
scōc ofer scild‐weall, sceft nytte hēold,
feðer‐gearwum fūs flāne full‐ēode."
Hūru se snotra sunu Wīhstānes  3120
ācīgde of corðre cyninges þegnas
syfone tōsomne þā sēlestan,
ēode eahta sum under inwit‐hrōf;
hilde‐rinc sum on handa bær
ǣled‐lēoman, sē þe on orde gēong.
Næs þā on hlytme, hwā þæt hord strude,
syððan or‐wearde ǣnigne dǣl
secgas gesēgon on sele wunian,
lǣne licgan: lȳt ǣnig mearn,
þæt hī ofostlice ūt geferedon  3130
dȳre māðmas; dracan ēc scufun,
wyrm ofer weall‐clif, lēton wǣg niman,
flōd fæðmian frætwa hyrde.
Þǣr wæs wunden gold on wǣn hladen,
ǣghwæs unrīm, æðeling boren,
hār hilde‐rinc tō Hrones næsse.

BĒOWULF'S FUNERAL PYRE.[edit]

Him þā gegiredan Gēata lēode
ād on eorðan un-wāclīcne,
helmum behongen, hilde-bordum,  3140
beorhtum byrnum, swā hē bēna wæs;
ālegdon þā tō-middes mǣrne þēoden
hæleð hīofende, hlāford lēofne.
Ongunnon þā on beorge bǣl-fȳra mǣst
wīgend weccan: wudu-rēc āstāh
sweart ofer swioðole, swōgende lēg,
wōpe bewunden (wind-blond gelæg)
oð þæt hē þā bān-hūs gebrocen hæfde,
hāt on hreðre. Higum unrōte
mōd-ceare mǣndon mon-dryhtnes cwealm;  3150
swylce giōmor-gyd lat . con meowle
. . . . . wunden heorde . . .
serg (?) cearig sǣlde geneahhe
þæt hīo hyre . . . . gas hearde
. . . . . ede wælfylla wonn . .
hildes egesan hyðo
haf mid heofon rēce swealh (?)
Geworhton þā Wedra lēode
hlǣw on hlīðe, sē wæs hēah and brād,
wǣg-līðendum wīde gesȳne,  3160
and betimbredon on tȳn dagum
beadu-rōfes bēcn: bronda betost
wealle beworhton, swā hyt weorðlīcost
fore-snotre men findan mihton.
Hī on beorg dydon bēg and siglu,
eall swylce hyrsta, swylce on horde ǣr
nīð-hȳdige men genumen hæfdon;
forlēton eorla gestrēon eorðan healdan,
gold on grēote, þǣr hit nū gēn lifað
eldum swā unnyt, swā hit ǣror wæs.  3170
Þā ymbe hlǣw riodan hilde-dēore,
æðelinga bearn ealra twelfa,
woldon ceare cwīðan, kyning mǣnan,
word-gyd wrecan and ymb wer sprecan,
eahtodan eorl-scipe and his ellen-weorc
duguðum dēmdon, swā hit ge-dēfe bið,
þæt mon his wine-dryhten wordum herge,
ferhðum frēoge, þonne hē forð scile
of līc-haman lǣne weorðan.
Swā begnornodon Gēata lēode  3180
hlāfordes hryre, heorð-genēatas,
cwǣdon þæt hē wǣre woruld-cyning
mannum mildust and mon-þwǣrust,
lēodum līðost and lof-geornost.

Appendix[edit]

This work was published before January 1, 1923, and is in the public domain worldwide because the author died at least 100 years ago.