26. Skunk and Panther
Qaosaqa′ₐne· x̣a′x̣as. qa.onι′łne· q!a′pe·s qa′psin. qa·na′x̣e·. nʼu′px̣ₐne· swaʼs. nʼonι′łne· x̣a′x̣as·. qałwi′yne·: "ksa′han· x̣a′x̣as; kłts!ι′płap x̣a′x̣as." nʼιtx̣o′ᵤmek. qa·na′x̣e· x̣a′x̣as, nʼu′px̣ₐne· swaʼs. tseᵢka′te·. qałwi′yne·: "kqasts!uʼmqa′qa swaʼ; qa′psins ksłι′płaps?" tsukᵘa′te· x̣a′x̣as swaʼs. nʼoqoᵤx̣akι′n·e yιtskιme′e·s. nʼałax̣o′ᵤne·. ts!ιna′x̣e·. qa·na′x̣e. qałwi′yne· swaʼ: "qa′psins nʼo′ne·ł x̣a′x̣as?" qake′ᵢne· x̣a′x̣as: "nʼok!we′ᵢne koo′nił aₐʽki‵ł·ukwax̣ni′yam." qa·na′x̣e·; pιskι′n·e·. skana′x̣e·. nu′x̣te·k x̣a′x̣as. qaosaqa′ₐne·. nał·ukwax̣niyamι′sᵢne·. nʼonι′łne· x̣a′x̣as. ts!ιna′x̣e· x̣a′x̣as. swaʼ nʼϋmitskι′n·e·[1] yιtskιmeι′se·s. ts!ιna′x̣e· swaʼ qałwi′yne· ma ksa′han x̣a′x̣as. ts!ιna′x̣e· swaʼ. nʼonι′łne· x̣a′x̣as. qa·na′x̣e· swaʼ. skikiłats!łaι′nse· neᵢs skana′x̣e·. nas łaqaka′x̣e·. neᵢs łaqana′x̣e·. łaqawaₐka′x̣e· yunaqa′pse· aₐʽk.łι′k!e·s. ts!ιna′x̣e· x̣a′x̣as. qałwi′yne· naqałsłι′tske· swaʼ. łqa′e·p. łats!ιna′x̣e·. ła·łax̣a′x̣e· yιtskιme′ʼe·s nʼϋmitse′ᵢse· yιtskι′me·s. nʼu′px̣ₐne· ło′ᵤse· swaʼs. nʼu′px̣ₐne· pa·ł qa.ι′pse·. nʼu′px̣ₐne· aₐʽk.łιk!ι′se·s. ts!ιna′x̣e· aₐʽk.łιk!ι′se·s. qa·na′x̣e· x̣a′x̣as yunaqa′pse· aₐʽk.łιk!ι′se·s. qa.u′px̣ₐne· kaₐs naₐqa′nas swaʼs. nʼitskι′łne· yunaqa′pse· aₐʽk.łιk!ι′se·s. nʼu′px̣ₐne· aₐʽk.łιk!ι′se·s. snałι′kse·. ts!ιna′x̣e·. ts!ena′k!ᵢne·. qałwi′yne·: "kots!u′pił swaʼs." łax̣a′x̣e· aₐʽkιnmi′tuks swaʼ. waₐq!nu′ne· aₐkιts!ła′ens. łax̣a′x̣e· x̣a′x̣as. nʼeku′łne·. nʼu′px̣ₐne· swaʼs aₐʽkιnmι′tuks saosaqa′pse·. mι′tx̣ₐne·. yunaqa′pse· k!a′ₐtsukp. łało′ᵤse· aₐq!ułu′kp!e·s. at łatsukᵘa′te· aₐʽq!ułu′kp!e·s, at nʼitkι′n·e· at łaatsu′kpₐne·. nuk.łu′kᵤne·, nʼitx̣o′ᵤmek. nʼu′px̣ₐne· swaʼs aₐʽkts!ιła′ens qaosaqa′pse·. mι′tx̣ₐne·. nʼιpι′łne· swaʼs x̣a′x̣as.
27. The Deluge
Qaₐt.łana′mne·. at yunaqa′ₐne· kałq!a′t!eᵢ ławi′yałs. naqa′pse· tιłnamu′ʼe·s ι′nła·k. nałq!at!e′ᵢse· ławi′yałs. ts!ιna′x̣e· ι′nła·k. nʼu′px̣ₐne· tιłnamu′ʼe·s. qa.u′px̣ₐne· tιłnamu′ʼe·s yawo·′nιk! tιłnamu′ʼe·s tsukᵘat.łι′sᵢne·. tsukᵘa′t.se· yawo·′nιk!s. sa·nιłwi′yne·. mι′tx̣ₐne·. nʼιsk!o′ᵘne·. nʼeku′łne· yawo·′nιk!. łało′ᵤne·. łatsukᵘa′te·. łało′ᵤne· q!a′pe· wu′u·. nʼeku′łne· yawo·′nιk!. łatsukᵘa′te· ι′nła·k a′ₐk!e·s. łakx̣a′mne· wu′u. nutsu′kᵤne·. q!a′pe· aₐʽqłsma′kᵢnιk! notsιnqa′ₐtse·. ta′x̣as łax̣a′x̣e· wu′u. qałwi′yne· q!a′pe· aₐʽqłsma′kᵢnιk! kιtsx̣a′łep. łukᵘι′n·e aₐʽkιnuq!mana′e·s ι′nła·k. nʼeyakι′n·e. qakeᵢ′ne·: "ła′łu aₐkιnuq!ma′ₐnam ta′x̣as hutsłał·unała′ₐne·." ta′x̣as x̣aₐtsanma‵q!łiłnoq!mana′ₐne·. ta′x̣as nʼuk!qape′ᵢse·. qake′ᵢne· "ła′łu kaₐko‵q!łiłnoq!ma′ₐna ta′x̣as q!a′pe· huts!upnała′ₐne·." ta′x̣as łax̣a′x̣e·. ts!ιnekι′me·k wu′u. ta′x̣as łakiłu′kᵤne·. ła.una′x̣e· aₐʽqłsma′kᵢnιk!.
- ↑ Or nʼumιtskι′n·e.
