Page:Ludus Coventriae (1841).djvu/29

Secundus vexillator.

The grettest meracle that evyr Jhesus
  In erthe wrouth beforn his passyon,
In xxij.^{ti} pagent we purpose us
  To shewe in dede the declaracion.
That pagent xal be of Lazarus,
  In whos place and habytacion
Cryst was logyd, the Gospel seyth thus,
  And ofte tymes toke ther consolacion.
          But ȝyt
Lazarus, as I ȝow say,
Was iiij. days ded and beryed in clay,
ffrom deth to lyve the iiij.^te day,
          Cryst reysed hym ffrom that pyt.

Tertius vexillator.

In the xxiij.^{ti} pagent, Palme Sunday,
  In pley we purpose ffor to shewe,
How chylderyn of Ebrew with ffloures ful gay,
  The wey that Cryst went thei gun to strewe.

Primus vexillator.

In the xxiiij.^{ti} pagent, as that we may,
  Cryst and his apostelys alle on rewe,
The mawnde of God ther xal they play,
  And sone declare it with wordys ffewe.
          And than
Judas that fals traytour,
ffor xxx.^{ti} platys of werdly tresour,
Xal betray oure Savyour
          To the Jewys certan.

Secundus vexillator.

ffor grevous peyn, this is no les,
In the xxv.^{ti} pagent, Cryst xal pray