Davyd Rex.
I am David, of Jesse rote,
The fresche kyng by naturalle successyon,
And of my blood xal sprynge oure bote,
As God hymself hath mad promyssyon;
Of regalle lyff xal come suche foyson,
That a clene mayde modyr xal be,
Ageyns the devellys fals illusyon,
With regalle power to make man fre.
Jeremias propheta.
I am the prophete Jeremye,
And fulliche acorde in alle sentence
With kyng David and with Ysaie,
Affermynge pleynly beforn this audyens,
That God of his highe benyvolens,
Of prest and kynge wylle take lynage,
And bye us alle ffrom oure offens,
In hevyn to have his herytage.
Salamon Rex.
I am Salamon the secunde kynge,
And that wurthy temple for sothe made I,
Whiche that is fygure of that mayde ȝynge,
That xal be modyr of grett Messy.
Ezechiel propheta.
A vysion of this, fful veryly,
I Eȝechiel have had also,
Of a gate that sperd was trewly,
And no man but a prince myght therin go.
Roboas Rex.
The iij.^{de} kynge of the jentylle Jesse,
My name is knowe, kyng Roboas,
Of oure kynrede ȝitt men xul se
A clene mayde trede downe foule Sathanas.
Micheas propheta.
And I am a prophete calde Mycheas,
I telle ȝou pleynly that thus it is,
