the blessyd vyrgyne Marye at Jerusalem (who) sayd to hym, . . . Loo I am called of thy mayster and my God, . . . I have herde saye that the Jewes have made a counseyll and sayd, let us abyde brethren unto the tyme that she that bare Jhesu Crist be deed, and thenne incontynente we shall take her body and shall caste it in to the fyre and brenne it. Thou therefore take this palme and bere it tofore the bere whan ye shall bere my body to the sepulcre. Than sayd Johan, O wolde God that all my brethren the apostles were here that we myght make thyn exequyes covenable as it hoveth and is dygne and worthy. And as he sayd that, all the apostles were ravysshed with cloudes from the places where they preched and were brought tofore the dore of the blessyd vyrgyn Mary. . . . And aboute the thyrde houre of the nyght Jhesu Crist came with swete melodye and songe with the ordre of aungelles. . . . Fyrst Jhesu Crist began to saye, Come my chosen and I shall set thee in my sete . . . come fro Lybane my spouse. Come from Lybane. Come thou shalte be crowned. And she sayd I come, for in the begynnynge of the booke it is wryten of me that I sholde doo thy wyll, for my spyryte hath joyed in thee the God of helth; and thus in the mornynge the soule yssued out of the body and fledde up in the armes of her sone. . . . And than the apostles toke the body honourably and layde it on the bere.—And than Peter and Paule lyfte up the bere, and Peter began to synge and saye Israhell is yssued out of Egypt, and the other apostles folowed hym in the same songe, and our Lorde covered the bere and the apostles with a clowde, so that they were not seen but the voyce of them was onely herde, and the aungelles were with the apostles syngynge, and than all the people was moved with that swete melodye, and yssued out of the cyte and enquyred what it was.—And than there were some that sayd that Marye suche a woman was deed, and the dyscyples of her sone Jhesu Crist bare her, and made suche melodye. And thenne ranne they to armes and they warned eche other sayenge, Come and let us slee all the dysciples and let us brenne the body of her that bare this traytoure. And whan the prynce of prestes sawe that he was all abasshed and, full of angre and wrath sayd, Loo, here the tabernacle of hym that hath troubled us, and our lygnage, beholde what glorye he now receyveth, and in the saynge so he layde his hondes on the bere wyllynge to turne it and overthrowe it to the grounde. Than sodeynly bothe his hondes wexed drye and cleved to the bere so that he henge by the hondes on the bere and was sore tormented and wepte and brayed. And the aungelles . . . blynded all the other people that they sawe no thynge. And the prynce of prestes sayd, saynt Peter despyse not me in this trybulacyon, and I praye thee to
