¶ The tenthe fable is of the man and of the ſerpent
E that leneth and helpeth the euylle
men / ſynneth / ſor after that men
have doo to them ſome good /
they hurte them afterward / For
as men ſayen comynly / yf ye
kepe a man fro the galhows / he ſhalle neuer
loue yow after / wherof Eſope reherceth ſuche
a fable / ¶ A man was ſom tyme whiche fond a
ſerpent within a Vyne / and for the grete wynter
and frost the ſerpent was hard / and almoſt dede
for cold wherof the good man had pyte and toke
and bare her in to his hows and leyd her before
the fyre / and ſo moche he dyd that that ſhe
came ageyne in to her ſtrengthe and vygour /
She beganne thynne to crye and whyſtled about
the hows and troubled the good wyf / and the
children / wherfor this good man wold haue her
oute of his hows / And whanne he thoughte to
have take her ſhe ſprange after his neck for to
have ſtrangled hym / And thus hit is of the
euyll folk whiche for the good done to them /
they yeld ageyne euyll and deceyuen them whiche
have had pyte on them / And alſo theyre felauſhip
is not good ne vtyle /
