Seven excellent songs/Bonnie Doon

by Robert Burns

For other versions of this work, see The Banks O' Doon.

———

BONNIE DOON.

Ye banks and braes o’ bonnie Doon,
How can ye bloom sae fresh and fair;
How can ye chant ye little birds
And I sae weary fu’ o’ care!
Thou’ll break my heart thou warbling bird,
That wantons thro’ the flowering thorn:
That minds me o’ departed joys,
Departed never to return.

Oft hae I rov’d by bonnie Doon,
To see the rose and woodbine twine;
And ilk a bird sang o’ its luve,
And, fondly, sae did I o’ mine,
Wi’ lightsome heart I pu’d a rose
Fu’ sweet upon its thorny tree;
And my fause lover stole my rose,
But ah! he left the thorn wi’ me.