The Banks O'Doon
From Wikisource
Ye flowery banks o' bonie Doon,
How can ye blume sae fair;
How can ye chant, ye little birds,
And I sae fu' o' care!
Thou'll break my heart, thou bonie bird
That sings upon the bough;
Thou minds me o' the happy days
When my fause luve was true.
Thou'll break my heart, thou bonie bird
That sings beside thy mate;
For sae I sat, and sae I sang,
And wist na o' my fate.
Aft hae I rov'd by bonie Doon,
To see the wood-bine twine,
And ilka bird sang o' its love,
And sae did I o' mine.
Wi' lightsome heart I pu'd a rose
Frae aff its thorny tree,
And my fause luver staw the rose,
But left the thorn wi' me.
Wi' lightsome heart I pu'd a rose,
Upon a morn in June:
And sae I flourish'd on the morn,
And sae was pu'd or noon!
 |
This work published before January 1, 1923 is in the public domain worldwide because the author died at least 100 years ago. |
