The Book of Scottish Song/Native Caledonia

Native Caledonia.

[This popular strain was written by William Lockhart.—Tune, "The Dusky Glen."]

Sair, sair was my heart, when I parted frae my Jean,
An' sair, sair I sigh'd while the tear stood in my een,
For my daddie is but poor, and my fortune is sae sma',
It gars me leave my native Caledonia.
When I think on the days now gane, an' sae happy's I ha'e been,
While wand'ring wi' my dear, where the primrose blaws unseen,
I'm wae to leave my lassie, and my daddie's simple ha',
Or the hills an' healthfu' breeze o' Caledonia.

But wherever I wander, still happy be my Jean,
Nae care disturb her bosom, where peace has ever been;
Then tho' ills on ills befa' me, for her I'll bear them a',
Though aft I'll heave a sigh for Caledonia.
But should riches e'er be mine, and my Jeanie still prove true,
Then blaw ye fav'ring breezes, till my native land I view;
Then I'll kneel on Scotia's shore, while the heartfelt tear shall fa',
And never leave my Jean, nor Caledonia.

---