The fables of Aesop by William Caxton (Jacobs)/Vol. II/Liber Secundus/Fable 12
¶ The xij fable is of the balled man / and of the flye
F a lytyl euylle may wel come a gretter / Wherof Esope recyteth suche a fable / Of a flye / whiche pryked a man vpon his bald hede / And whanne he wold have smyte her / she flewgh awey / And thus he smote hym self / wherof the fly beganne to lawhe / And the bald man sayd to her / Ha a euylle beest thow demaundest wel thy dethe / yf I smote my self wherof thow lawhest and mocquest me / But yf I had hytte the / thow haddest be therof slayne / And therfore men sayen comynly that of the euylle of other / men ought not to lawhe ne scorne / But the Iniuryous mocquen and scornen the world / and geteth many enemyes / For the whiche cause oftyme it happeth that of a fewe wordes euyll sette / cometh a grete noyse and daunger