The fables of Aesop by William Caxton (Jacobs)/Vol. II/Liber Secundus/Fable 9
¶ The ix fable maketh mencyon of the wulf and of the kydde
Ood Children ought to obserue and kepe euer the comaundements of theyr good parents and frendes / wherof Esope reciteth to vs suche a fable / Of a gote whiche had made her yonge kyde / and honger toke her soo that she wold haue gone to the feldes for to ete some grasse / wherfore she sayd to her kyd / My child / beware wel / that yf the wulf come hyder to ete the / that thou opene not the dore to hym ¶ And whanne the gote was gone to the feldes / came the wulf to the dore / And saynynge the gotes voyce sayd to the kydde / My child opene to me the dore / And thenne the kydde ansuerd to hym / goo hens euylle and fals beste / For well I see the thurgh that hole / But for to haue me thow faynest the voyce of my moder / ¶ And therfore I shalle kepe me well fro openynge of ony dore of this hows / And thus the good children ought euer to kepe wel / and put in theyr hert & memory the doctryne and the techyng of theyr parentes / For many one is vndone and lost for faulte of obedyence