La carmelitana
La carmelitana
Sul pian da le Strie le se binaa coi strions. Aló le balaa, le tafiaa e le slapaa, dapò i jìa te lach de Dona a se lavar e le fajea n tan gran bordel, che l lach bugolaa. Dapò i nviaa n gran temporal, con tempesta. Chel pere monech da Mazin, a sentir, che ite de Dona l tona, l va sobit a sonar dal temp, ma l'é massa debol con so bronsina veia. Ma dapò sent la carmelitana l besegn, e la scomenza a sonar. Dapò vedé, sciampa tant strions che strie. I sauta par aria per no vegnir toché dal batilon de pagina:237 chela gran ciampana. Fra i strions l'era ence l veie Lobon. La carmelitana la l'à tocà te n'ama col batilon. L'é sutà jù anter zeche sfessura. L'à cognù chiamar l capo di diàoi, chel l lo porte sù. L'é vegnù sobito vestì da vert e l se à tout l Lobon a sènt cristofol e l'à portà sù ndò te so post. Ma l'é restà zot, parché contra colpes benedii no se pel far nia. E dapò l'é vegnù fora per Ciampai e Ponjin, co le strie a Ciampe e su per le Brujolades, a jir a ge far n gran dan a chi de Ciampedel. Ma chela veia dal monech, veia desche n corf e furba desche na veia bolp, la cognoscea l temp dal mal. La va sobit e la sona la iacobmaria. Le pere strie, che cardea de ge bater dut n toc chel mìngol de racolta, le à cognù zessar.