Se Wīfman

From Wikisource
Jump to navigation Jump to search
Se wífman, se hire cild āfēdan ne mæg, gange tō gewitenes mannes birgenne and stæppe
þonne þríwa ofer þā byrgenne and cweþe þonne þríwa þās word:
þis mē tō bōte þǣre lāþan lætbyrde,
þis mē tō bōte þǣre swǣran swǣrbyrde,
þis mē tō bōte þǣre lāðan lambyrde.
And þonne þæt wíf sēo mid bearne and hēo tō hyre hlāforde on reste gā, þonne cweþe hēo:
Up ic gonge, ofer þē stæppe
mid cwican cilde, nalæs mid cwellendum,
mid fulborenum, nalæs mid fǣgan.
And þonne sēo mōdor gefēle þæt þæt bearn sí cwic, gā þonne tō cyrican, and þonne hēo tōforan þān wēofode cume, cweþe þonne:
Críste, ic sǣde, þis gecȳþed!
Se wífmon, se hyre bearn āfēdan ne mæge, genime hēo sylf hyre āgenes cildes gebyrgenne
dǣl, wrȳ æfter þonne on blace wulle and bebicge tō cēpemannum and cweþe þonne:
Ic hit bebicge, gē hit bebicgan,
þās sweartan wulle and þysse sorge corn.
Se wífman, se ne mæge bearn āfēdan, nime þonne ānes blēos cū meoluc on hyre handæ and
gesūpe þonne mid hyre mūþe and gange þonne tō yrnendum wætere and spíwe þǣr in þā
meolc and hlade þonne mid þǣre ylcan hand þæs wæteres mūð fulne and forswelge. Cweþe
þonne þās word:
Gehwēr fērde ic mē þone mǣran maga þihtan,
mid þysse mǣran mete þihtan;
þonne ic mē wille habban and hām gān.
Þonne hēo tō þān brōce gā, þonne ne besēo hēo, nō ne eft þonne hēo þanan gā, and þonne
gā hēo in ōþer hūs ōþer hēo ūt ofēode and þǣr gebyrge mētes.