The Rhyming Poem

From Wikisource
Jump to: navigation, search


Me līfes onlāh  se þis lēoht onƿrāh,
ond þæt torhte ȝetēoh,  tillīce onƿrāh.
Glæd ƿæs ic ȝlīƿum,  ȝlenȝed hīƿum,
blissa blēoum,  blōstma hīƿum.
Secȝas mec sēȝon,  symbel ne alēȝon,
feorhȝiefe ȝefēȝon;  frætƿed ƿǣȝon
ƿicȝ ofer ƿonȝum  ƿennan ȝonȝum,
lisse mid lonȝum  lēoma ȝehonȝum.
Þā ƿæs ƿæstmum aƿeaht,  ƿorld onspreht,
under roderum areaht,  rǣdmæȝne oferþeaht.
Giestas ȝenȝdon,  ȝērscype menȝdon,
lisse lenȝdon,  lustum ȝlenȝdon.
Scrifen scrād ȝlād  þurh ȝescād in brād,
ƿæs on laȝustrēame lād,  þǣr me leoþu ne biȝlād.
Hæfde ic hēanne hād,  ne ƿæs me in healle ȝād,
þæt þǣr rōf ƿeord rād.  Oft þǣr rinc ȝebād,
þæt hē in sele sǣȝe  sincȝeƿǣȝe,
þeȝnum ȝeþyhte.  Þenden ƿæs me mæȝen,
horsce mec heredon,  hilde ȝeneredon,
fæȝre feredon,  feondon biƿeredon.
Sƿā mec hyhtȝiefu heold,  hyȝedryht befeold,
staþol ǣhtum steald,  stepeȝonȝum ƿēold
sƿylce eorþe ōl,  āhte ic ealdorstōl,
ȝaldorƿordum ȝōl.  Gomel sibbe ne ofōll,
āc ƿæs ȝefest ȝēar,  ȝellende snēr,
ƿuniendo ƿǣr  ƿilbec bescǣr.
Scealcas ƿǣron scearpe,  scyl ƿæs hearpe,
hlūde hlynede,  hlēoþor dynede,
sƿeȝlrād sƿinsade,  sƿīþe ne minsade.
Burȝsele beofode,  beorht hlifade,
ellen ēacnade,  ēad bēacnade,
frēaum frōdade,  fromum ȝōdade,
mōd mæȝnade,  mine fæȝnade,
trēoƿ telȝade,  tīr ƿelȝade,
blæd blissade,  
ȝold ȝearƿade,  ȝim hƿearfade,
sinc searƿade,  sib nearƿade.
From ic ƿæs in frætƿum,  frēolic in ȝeatƿum;
ƿæs mīn drēam dryhtlic,  drohtað hyhtlic.
Foldan ic freoþode,  folcum ic lēoþode,
līf ƿæs mīn lonȝe,  lēodum inȝemonȝe,
tīrum ȝetonȝe,  teala ȝehonȝe.
Nū mīn hreþer is hrēoh,  hēofsīþum scēoh,
nȳdbysȝum nēah;  ȝeƿīteð nihtes in flēah
se ǣr in dæȝe ƿæs dȳre.  Scrīþeð nū dēop in fēore
brondhord ȝeblōƿen,  brēostum in forȝrōƿen,
flyhtum tōflōƿen.  Flāh is ȝeblōƿen
miclum in ȝemynde;  mōdes ȝecynde
ȝrēteð unȝrynde  ȝrorn efen ƿynde,
bealofūs byrneð,  bittre tōyrneð.
Ƿeriȝ ƿinneð,  ƿīdsīð onȝinneð,
sār ne sinniþ,  sorȝum cinnið,
blæd his blinnið,  blisse linnið,
listum linneð,  lustum ne tinneð.
Dreamas sƿa her ȝedreosað,  dryhtscype ȝehreosað,
lif her men forleosað,  leahtras oft ȝeceosað;
treoƿþraȝ is to traȝ,  seo untrume ȝenaȝ,
steapum eatole misþah,  ond eal stund ȝenaȝ.
Sƿa nu ƿorld ƿendeþ,  ƿyrde sendeþ,
ond hetes henteð,  hæleþe scyndeð.
Ƿercyn ȝeƿiteð,  ƿælȝar sliteð,
flahmah fliteþ,  flan mon hƿiteð,
borȝsorȝ biteð,  bald ald þƿiteþ,
ƿræcfæc ƿriþað,  ƿraþ að smiteþ,
sinȝryn sidað,  searofearo ȝlideþ,
ȝromtorn ȝræfeþ,  ȝræft hafað,
searohƿit solaþ,  sumurhat colað,
foldƿela fealleð,  feondscipe ƿealleð,
eorðmæȝen ealdaþ,  ellen colað.
Me þæt ƿyrd ȝeƿæf,  ond ȝeƿyrht forȝeaf,
þæt ic ȝrofe ȝræf,  ond þæt ȝrimme ȝræf
flean flæsce ne mæȝ,  þonne flanhred dæȝ
nydȝrapum nimeþ,  þonne seo neaht becymeð
seo me eðles ofonn  ond mec her eardes onconn.
Þonne lichoma liȝeð,  lima ƿyrm friteþ,
ac him ƿenne ȝeƿiȝeð  ond þa ƿist ȝeþyȝeð,
oþþæt beoþ þa ban  an,
ond æt nyhstan nan  nefne se neda tan
balaƿun her ȝehloten.  Ne biþ se hlisa adroren.
Ær þæt eadiȝ ȝeþenceð,  he hine þe oftor sƿenceð,
byrȝeð him þa bitran synne,  hoȝaþ to þære betran ƿynne,
ȝemon morþa lisse,  þær sindon miltsa blisse
hyhtlice in heofona rice.  Uton nu halȝum ȝelice
scyldum biscyrede  scyndan ȝenerede,
ƿommum biƿerede,  ƿuldre ȝenerede,
þær moncyn mot  for meotude rot
soðne ȝod ȝeseon,  ond aa in sibbe ȝefean.



This work was published before January 1, 1923, and is in the public domain worldwide because the author died at least 100 years ago.