'Twas on the morn of sweet May Day (1829)/Lovely Jean
LOVELY JEAN.
Tune—Miss Admiral Gordon's Strathspey.
Of a' the airts the wind can blaw,
I dearly like the west,
For there the bonnie lassie lives,
The lass that I loo best;
Tho' wild woods grow, and rivers row,
Wi' monie a hill between,
Baith day and night, my fancy's flight
Is ever wi' my Jean.
I see her in the dewy flow'r,
Sae lovely, sweet, and fair;
I hear her voice in ilka bird,
Wi' music charm the air;
There's not a bonnie flow'r that springs,
By fountain, shaw, or green,
Nor yet a bonnie bird that sings,
But minds me o' my Jean.
Upon the banks o' flowing Clyde
The lasses busk them braw;
But when their best they hae put on,
My Jeanie dings them a';
In hamely weeds she far exceeds
The fairest o' the town;
Baith sage and gay confess it say,
Tho' drest in russet gown.
The gamesome lamb, that sucks its dam,
Mair harmless canna be;
She has nae faut, (if sic ye ca't,)
Except her love for me:
The sparkling dew, o' clearest hue,
Is like her shining een;
In shape and air, wha can compare
Wi' my sweet lovely Jean?
O blaw, ye westlin winds, blaw saft
Among the leafy trees;
Wi' gentle gale, frae muir and dale,
Bring hame the laden bees,
And bring the lassie back to me
That's ay sae neat and clean;
Ae blink o' her wad banish care,
Sae lovely is my Jean.
What sighs and vows, amang the knowes
Hae past atween us twa!
How fain to meet, how wae to part
That day she gaed awa !
The powers aboon can only ken,
To whom the heart is seen,
That nane can be sae dear to me,
As my sweet lovely Jean.Burns.
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse