Beowulf (Wyatt)/Beowulf 33
XXXIII.
Ðā se gæst ongan glēdum spīwan,
beorht hofu bærnan; bryne-lēoma stōd
eldum on andan; nō ðǣr āht cwices
2315lāð lyft-floga lǣfan *wolde.Fol. 181b.
Wæs þæs wyrmes wīg wīde gesȳne,
nearo-fāges nīð nēan ond feorran,
hū se gūð-sceaða Gēata lēode
hatode ond hȳnde. Hord eft gescēat,
2320dryht-sele dyrnne, ǣr dæges hwīle;
hæfde land-wara līge befangen,
bǣle ond bronde; beorges getrūwode,
wīges ond wealles; him sēo wēn gelēah.
Þā wæs Bīowulfe brōga gecȳðed
2325snūde tō sōðe, þæt his sylfes hām,[1]
bolda sēlest, bryne-wyhnum mealt,
gif-stōl Gēata. Þæt ðām gōdan wæs
hrēow on hreðre, hyge-sorga mǣst;
wēnde se wīsa, þæt hē Wealdende
2330ofer ealde riht, ēcean Dryhtne,
bitre gebulge; brēost innan wēoll
þēostrum geþoncum, swā him geþȳwe ne wæs.
Hæfde līg-draca lēoda fæsten,
ēa-lond ūtan, eorð-weard ðone,
2335glēdum forgrunden; him ðæs gūð-kyning,
Wedera þīoden, wræce leornode.
Heht him þā gewyrcean wīgendra hlēo
eall-īrenne, eorla dryhten,
wīg-bord wrætlīc; *wisse hē gearwe, Fol. 182a.
2340þæt him holt-wudu he[lpan][2] ne meahte,
lind wið līge. Sceolde lǣn-daga.[3]
æþeling ǣr-gōd ende gebīdan,
worulde līfes, ond se wyrm somod,
þēah ðe hord-welan hēolde lange.
2345Oferhogode ðā hringa fengel,
þæt hē þone wīd-flogan weorode gesōhte,
sīdan herge; nō hē him þā[4] sæcce ondrēd,
ne him þæs wyrmes wīg for wiht dyde,
eafoð ond ellen, forðon hē ǣr fela,
2350nearo nēðende, nīða gedīgde,
hilde-hlemma, syððan hē Hrōðgāres,
sigor-ēadig secg, sele fǣlsode,
ond æt gūðe forgrāp Grendeles mǣgum
lāðan cynnes. Nō þæt lǣsest wæs
2355hond-gemōt, þǣr mon Hygelāc slōh,
syððan Gēata cyning gūðe rǣsum,[5]
frēa-wine folca Frēs-londum on,
Hrēðles eafora, hioro-dryncum swealt
bille gebēaten; þonan Bīowulf cōm
2360sylfes cræfte, sund-nytte drēah;
hæfde him on earme *[āna][6] þrittigFol. 182b.
hilde-geatwa, þā hē tō holme [st]āg.
Nealles Hetware hrēmge þorf[t]on
fēðe-wīges, þe him foran ongēan
2365linde bǣron; lȳt eft becwōm
fram þām hild-frecan hāmes nīosan.
Oferswam ðā sioleða bigong sunu Ecgðēowes,
earm ān-haga, eft tō lēodum,
þǣr him Hygd gebēad hord ond rīce,
2370bēagas ond brego-stōl; bearne ne trūwode,
þæt hē wið æl-fylcum ēþel-stōlas
healdan cūðe, ðā w«s Hygelāc dēad.
Nō dȳ ǣr fēa-sceafte findan meahton
æt ðām æðelinge ǣnige ðinga,
2375þæt hē Heardrēde hlāford wǣre,
oððe þone cynedōm cīosan wolde;
hwæðre hē hine[7] on folce frēond-lārum hēold,
ēstum mid āre, oð ðæt hē yldra wearð,
Weder-Gēatum wēold. Hyne wræc-mæcgas
2380ofer sǣ sēhtan, suna Ōhteres;
hæfdon hȳ forhealden helm Scylfinga,
þone sēlestan sǣ-cyninga,
þāra ðe[8] in Swīo-rīce sinc brytnade,
mǣrne *þēoden. Him þæt tō mearce wearð;Fol. 183.a
2385hē þǣr orfeorme[9] feorh-wunde hlēat
sweordes swengum, sunu Hygelāces.
Ond him eft gewāt Ongenðīoes bearn
hāmes nīosan, syððan Heardrēd læg,
lēt ðone brego-stōl Bīowulf healdan,
2390Gēatum wealdan; þæt wæs gōd cyning.
- ↑ 2325. MS. ‘him’ (so Wülcker); Conybeare ‘hām.’
- ↑ 2340. MS. defective at corner.
- ↑ 2241. MS. ‘þend’; Kemble ‘lǣn.’ Cf. l. 2591.
- ↑ 2347. MS. ‘þa’ (= þām). Wūlcker retains the MS. reading and defends it in a note, which one can only suppose to be a misprint: “Da on mit dat. ebenso wie mit accus. verbunden wird.” Sæcc is fem. (Sievers § 258. 1).
- ↑ 2356. Zupitza ‘guðe-ræsum.’ Not one of the sixty odd compounds of gūð is formed in this way.
- ↑ 2361. MS. defective at corner, here and in two following lines. Zupitza ‘. . . xxx.’ Grein’s emendation.
- ↑ 2377. MS. ‘hi’ (= him); Thorpe ‘hine.’
- ↑ 2383. MS. “ðe ðe,’ the first at the end of a line, the second at the beginning of the next.
- ↑ 2385. Grein ‘on feorme’; Möller ‘for feorme’ (so Heyne 5).