Blythsome bridal, or, the lass wi' the gowden hair (1)/The Blythsome Bridal
_-_Headpiece.png)
THE BLYTHSOME BRIDAL.
FY let us a' to the Bridal,
for there will be lilting there.
for Jockey's to be marry'd to Maggy,
the laſs wi’ the gouden hair.
And there will be lang kail and porrage,
and bannocks o' barley-meal:
And there will be good fat herring,
to reliſh a cog o' good ale.
Fy let us a' to the Bridal &c.
And there will be Sandy the ſouter,
and Will wi' the meikle mou',
And there will be Tam the bluter,
with Andrew the tinker I trow:
And there will be bow'd legged Robbie,
with thumbleſs Katy's goodman;
And there will be blue-cheeked Dowbie,
and Lowrie the laird o' the lan'. Fy, &c.
And there will be ſow-libber Patie,
and plucky-fac'd Wat i' the mill,
Capper-nos'd Patie and Gibbie,
that wins in the brow o' the hill;
And there will be Alaſter Sibbie,
wha in wi' black Beſſie did mool,
With ſniveling Lilly, and Tibby,
the laſs that ſtands aft on the ſtool. &c.
And Madge that was buckled to Steenie,
and coſt him grey breeks to his arſe,
Wha after was hangit for ſtealing,
great mercy it happen'd na warſe;
And there will be gleed Geordy Janners,
and Kate wi' the lily-white leg,
Wha gade to the ſouth for manners,
and bang'd up her wame in Mons-Meg. &c.
And there will be Judan Maclawrie,
and blinking daft Barbara Macleg,
Wi' flae-lugged ſharney-fac'd Lawrie,
and ſhangy-mou'd haluket Meg.
And there will be happer-ars'd Nancy,
and fairy-fac'd Flowrie by name,
Wi’ Madie, and fat-hippet Girſy,
the laſs wi' the gouden wame. Fy let, &c.
And there will be girn-again Gibbie,
wi' his glaiket wife Jenny Bell,
And miſle-ſhin'd Mungo Macapie,
the lad that was ſkipper himſell.
There lads and laſſes in pearling,
will feaſt in the heart o' the ha',
On ſybows, and rifarts, and carlings,
that are baith ſodden and raw. Fy let, &c.
And there will be fadges and brochan,
wi' ſouth o' good gabbocks o' ſkate,
Powſowdy, and drumnock, and crowdy,
and caller nowt-feet in a plate,
And there will be partans and buckies,
and waytens, and ſpeldings enow,
Wi' ſing'd ſheep-heads, and a haggies,
and ſcadlips to ſup till ye ſpew. Fy let &c.
And there will be lapper'd-milk kebbocks,
and ſowens, and farls, and baps,
Wi’ ſwats and well ſcraped paunches,
and brandy in ſtoups and in caps
And there will be meal-kail and cuſtocks,
wi' ſkink to ſup till we rive,
And roaſts to roaſt on a brander,
of fleuks that were taken alive. Fy, &c.
Scrapt haddocks, wilks, dulſe and tangle,
and a mill of good ſniſhing to prie;
When weary with eating and drinking,
we'll riſe up and dance till we die.
Then fy let us a' to the Bridal,
for there will be lilting there
For Jockey's to be marry'd to Maggy,
the laſs wi' the gouden hair.
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse