Bon-Accord Sangster/Bon-Accord
BON-ACCORD.
Tune—"For a’ that an' a' that."
Again we've waur'd December cauld,
The New-Year hail'd an' a' that;
Now blythe we meet baith young an' auld,
In friendship's glow, for a' that:
For a' that an' a' that,
Be wisely gay an' a' that,
Nor madly waught the poison'd draught,
But daur abstain frae a' that.
Nor daized in brain, nor bruis’d in limb,
We hail our frien's an' a' that,
Tho' aft the social cup we brim,
It leaves nae stang for a' that;
For a' that an' a' that,
Nae faimin' caup we blaw that,
The cauler burn aye sairs our turn,
To slock our drouth an' a' that.
How can we pray "give us this day
Our daily bread" an' a' that,
Then frae the plain bear halesome grain,
An' poison mak' o' a' that?
For a' that an' a' that,
Our Statesmen wink at a' that,
Tho' murder's hand pollutes the land—
The tax will cover a' that.
The Drunkard wields the tyrant's rod
O'er wife an' weans, an' a' that,
Regard to man or fear of God,
His words an' works ne'er shaw that;
For a' that an' a' that,
An equal yoke we draw that,
An' train our youth to do the truth,
An' walk in love an' a' that.
The Pauper's fauld, the Felon's hauld,
The Tipler's howff an' a' that;
Driuk fills the hive wi' drones that thrive
On labour's fruits for a' that:
For a' that an' a' that,
Now Self-defence maun law, that
The Ship that fails in helm and sails,
Permissive Tug maun draw that.
Then Temp'rance' Sons unfurl your flag,
Whatever blast may blaw that,
Till Scotland rise an' crush the cag
That dribbles death an' a' that.
For a' that an' a' that,
Tak' steady aim at a' that,
And let the word be BON-ACCORD,
That binds our ranks an' a' that.