Excellent new song, called, Wonderful admiration!/Jenny's bawbee

Jenny's Bawbee,

I met four chaps yon birks amang,
Wi' hanging lugs and faces lang,
I speer'd at nei'bour Bauldy Strang,
⁠What are they these we see?
Qouth he "Ilk cream fac'd pauky chiel,
"Thinks himsell cunning as the deil,
"And here they cam', awa to steal
⁠Jenny's Bawbee."

The first, a Captain to his trade,
Wi' ill-lin'd scull, and back weel clad,
March'd round the barn and by the shed,
⁠And papped on his knee;
Quoth he, "My goddess, nymph, and queen,
"Your beauty's dazzl'd baith my een;"
But deil a beauty he had seen,
⁠But Jenny's Bawbee.

A Norlin' Laird next trotted up,
Wi' bassen'd nag and filler whip,
Cry'd "Here's my beast, lad had the grup,
⁠"Or tie him to a tree;
"What's gow'd to me, I've wealth o' lan'
"Bestow on ane o' worth your han';
He thought to pay what he was awn,
⁠Wi' Jenny's Bawbee.

A Lawyer neist wi' blatherin' gab,
Wi' speeches wove like ony web;
In ilk anes corn he took a dab,
⁠And a' for a fee;
Accounts he owed through a' the town,
And tradesmen's tongues nae mair cou'd drown;
But now he thought to clout his gown,
⁠Wi' Jenny's Bawbee.

Quite spruce, just frae the washing tubs.
A Fool came neist, but life has rubs,
Foul were the roads, and fu' the dubs,
⁠And fair besmear'd was he;
He danc'd up squinting thro' a glass,
And grinn'd, "I, saith a bonny lass;"
He thought to win wi' front o' brass.
⁠Jenny's Bawbee.

She bade the Laird gie kaim his wig;
The Soldier not to strut sae big,
The Lawyer not to be a prig,
⁠The fool he cry'd: "tee, hee,
"I kend that I could never fail;"
But she prinn'd the dish-clout to his tail,
And cool'd him wi' a water-pail.
⁠And kept her Bawbee:

Then Johnny cam', a lad o' sense,
Altho' he had na mony pence,
He took young Jenny to the spence,
⁠Wi' her to crack a wee;
Now, Johnny was a clever chiel,
And here his suit he press'd sae weel,
That Jenny's heart grew fast as jeel,
⁠And she birl'd her Bawbee.