Louden's bonny woods and braes/Last May a Braw Wooer

From Wikisource
Jump to navigation Jump to search
3324372Louden's bonny woods and braes — Last May a Braw Wooer


LAST MAY A BRAW WOOER.

Tune—The Lothian Lassie.

Last May a braw wooer cam down the lang glen,
And sair wi‘ his love he did deave me;
I said there was naething I hated like men,

The deuce tak him to believe me believe me,
The deuce tak him to believe me.

He spak o‘ the darts o‘ my bonnie black een,
And vow’d for my love he was diein;
I said he might die when he liket for Jean,
The Lord forgie me for liein, for liein,
The Lord forgie me for liein!

A weel stocket mailen, himsel for the laird,
And marriage aff-hand was the proffer:
I never loot on that I kent it, or car‘d,
But thought I might get a waur offer, waur offer,
But thought I might get a waur offer.

But what do ye think? in a fortnight or less,
(The deil‘s in his taste to gang near her!)
He up the lang loan to my black cousin Bess;
Guess ye how, the jad! I could bear her could bear her,
Guess ye how, the jad! I could bear her.

Sae at the niest week as I fretted wi' care,
I gaed to the tryst o‘ Dalgarnock,
And wha but my braw fickle wooer was there,
I glowr‘d as I‘d seen a warlock, a warlock,
I glowr‘d as I'd seen a warlock.

But owre my left shouther I gied him a blink,
Lest neibours might say I was saucy;
My wooer he caper‘d as he‘d been in drink,
And vow'd I was his dear lassie, dear lassie,
And vow‘d I was his dear lassie.

I spier'd for my cousin, fu‘ couthie and sweet,
Gin she had recover'd her hearin,
And how my auld shoon fitted her shachel‘d feet,
But, heavens! how he fell a swearin, a swearin,
But, heavens! how he fell a swearin.

He begged for gudesake! I wad be his wife,
Or else I wad kill him wi‘ sorrow;
So e'en to preserve the poor body in life,
I think I maun wed him to morrow, to-morrow,
I think I maun wed him to morrow.




This work was published before January 1, 1929, and is in the public domain worldwide because the author died at least 100 years ago.

Public domainPublic domainfalsefalse