and beswicende besmát . Ða þa seo symbelnyss becom þære halgan deorwurðan rode . úp-ahefennysse ; Ic fore-geode þa geongan swá swá ǽr on þæt grin forspillednysse teonde . þa geseah ic soðlice on ærne mergen hi ealle anmodlice to þære cyrcan yrnan . þa ongan ic yrnan mid þam yrnendum . and samod mid heom teolode toforan þam temple becuman . þa þa seo tíd becom þa halgan rode to wurþigenne . þa ongan ic nydwræclice gemang þam folce wið þæs folces þringan . and swá mid micclum geswince ic ungesælige to þæs temples dura becom mid þam þe þǽr in-eodon . þa ic sceolde in on þa dura gangen . þa ongunnon hi butan ælcere lættinge ingangan . mé witodlice þæt godcunda mægen þæs ganges bewerede . and ic sona wæs ut aþrungen fram eallum þam folce . oððe ic ænlipigu on þam cafertune to læfe oþstód . þa ongan ic þencan þæt me þæt gelumpe for þære wiflican unmihte . and ic me þa eft ongan mæncgan to oþrum . þæt ic wolde on sume wisan inn geþringan . ac ic swanc ón ídel . mid þam þe ic þone erscwold þæra dura gehrán . and hí ealle þyder inn onfangene wæron butan ælcere lettinge . þa wæs ic ána ut asceofen ; Ac swilce me hwilc strang meniu ongean stode . þæt me þone ingang beluce . swa me seo færlice godes wracu þa duru bewerede ; Oððe ic eft standende on þæs temples cafertune wæs . þus ic þrywa . oþþe feower siþum þrowode minne willan to geseonne . and eác to fremanne . and þa ða ic naht ne gefremode . þa ongan ic ofer þæt geor[n]e wénan and mín lichama wæs swiðe geswenced for þam nyde þæs geþringes ; Ða gewát ic witodlice þanone . and mé ána gestód on sumum hwomme þæs cafertunes . and on minum mode geornlice þohte and smeade for hwilcum intingu[m] me wære forwyrned þæs liffæstan treowes ansyn . þa onhran soðlice mín mód and þa eagan minre heortan hælo andgit mid me sylfre þencende þæt me þone ingang belucen þa onfeormeganda (sic) minra misdæda . Ða ongan ic biterlice wepan . and swiðe gedrefed mine breost cnyssan . and of inneweardre heortan heofonde forðbringan . þa geomorlican siccetunga ; Ða geseah ic of þære stówe
