Page:Alloway Kirk or Tam o Shanter a tale and man was made to mourn a poem with a sketch of burnss life.pdf/16

16

Whiles glowring round wi' prudent cares,
Lest bogles catch him unawares;
KIRK-ALOWAY was drawing nigh,
Where ghaists and howlets nightly cry.—

⁠By this time he was cross the ford,
Whare in the snaw the chapman smoor’d
And past the birks and meikle stane,
Whare drunken Charlie brake’s neck bane;
And thro’ the whims, and by the cairn,
Whare hunter’s fan the murder’d bairn;
And near the thorn aboon the well,
Whare Mungo’s mither hang’d hersel’.
Before him Doon pours all his floods;
The doubling storm roars thro’ the woods:
The lightenings flash from pole to pole;
Near and more near the thunders roll:
Whan, glimmering thro’ the groaning trees
Kirk Aloway seem’d in a bleeze;
Thro’ ilka bore the beams were glancing,
And loud resounded mirth and dancing.

⁠Inspiring bauld John Barleycorn,
What danger thou canst make us scorn!
Wi’ Tipenny, we fear nae evil;
Wi’ Usquebae, we’ll face the Devil!
The swats sae ream’d in Tamie’s noddle,
Fair play, he car’d na deil’s a boddle;
But Maggy stood right sair astonish’d,
Till, by, the heel and hand admonish’d,
She ventur’d forward to the light,
And vow! Tam saw an unco sight!