hyra lic bebyrian for hyra geleafleaste. Crist we seeolon lufian. ðe us alysde fram synnum. and we ne magon asecgean his wel dæda on us. ðe us ðurh his drihtenlican mihte fram gedwyldum alysde. and fram ecean deaðe us to life gelædde. We wæron unðancwurðe. and wendon us fram Criste. ac he us gesohte. swa ðæt he sylf nyðer astah of his heofenlican settle on swa mycelre eaðmodnysse. ðæt he man wearð for us on middan-earde akenned. and læg on cildclaðum. se ðe belycð on his handa ealle ðas eorðan swa swa Ælmihtig God. and se ðe heofenas gehealdeð næfde hamas on worulde. ne hwyder he ahyllde his heafod on life. And se wæs hafenleas for us. se ðe hæfð ealle ðing. ðæt he us gewelgode on his eceum welum. And him wæs gedemed fram unrihtwisum demum. ðam ðe on wolcnum cymð on ðysre worulde ende eallum to demenne ðe æfre kuce wæron. And se ðe is lifes wylle. he gewilnode wæteres æt ðam Samaritaniscean wife, swa swa us sægð ðæt godspell. And se ðe ealle ðing afedeð. se gefiredde hungor. ða ða he on ðam westene wæs gecostnod fram deofle. æfter ðam ðe he fæste feowertig daga on an. And ðam ðe englas ðeniað. he sylf ðenode mannum. and ðwoh his gingrena fet mid his fægerum handum. And se ðe fela wundra geworhte mid his handum. se geðafode for us. ðæt man gefæstnode his handa mid nægelum on rode, and eac his fotwylmas. And ða ða he drincan bæd. ða dydon ða earman Judeiscean geallan to his muðe. of ðam mannum becom seo godspellice lar mid his liflican bodunge. And se ðe nanum ne derede. him man dyde talu. and he wæs beswungen unscyldig eac for us. And se ða ða deadan ðurh his drihtenlican mihte arærde to life, se læt hine ahon on rode gealgan be his agenum willan. and swa deað geðrowode. and he syððan wæs bebyrged. ac he aras of deaðe on ðam ðriddan dæge. and he astah to heofenum to his halgan fæder. Eall ðis he geðrowode for ure alysednysse. ðæt he forgeafe
