How ye ſhall fede yowre hawke and to knawe hir infirmiteis ⁊ ther bene mony diueris of them
If yowre hawke be a ſpare hawke: euer fede hiꝛ with vnwaſſh meet and looke that hiꝛ caſtyng be plumage, than looke that it be cleyn vndeꝛ the peꝛch, and in the morow knowe whether the hawke be clene oꝛ noo, for ſum gobbit will be yolow and ſum grene, and ſum glaymous, and ſum cleere. And if itt be yolow ſhe engenderith the frounce, the wych is an euell that will rieſe in the mowothe oꝛ in the cheke. And if it be grene ſhe engenderith the Ry. The condicion of this euell is this, it wil ariſe in the hede and make the hede to ſwell, ⁊ the iyen all glaymous, and dyrke, and bot it haue helpe: it will downe in to the legges, and maake the legges to rancle, and if it goo fro the legges in to the hede a gayne, thi hawke is bot looſt. And if it be glaymous and roping ſhe engenderith an euell callid the Cray, that is whan an hawke may not muteyſe
Merke wele yowre medicines here folowyng
¶A medicine foꝛ the frounce ī the mowth
Take a ſilueꝛ ſpoone and put the ſmall ende in the fyre till it be hoote. Then let holde the hawke and oppyn hiꝛ beke and bꝛin
