yeue it to ye hauke .ij. days foꝛ to heete. and ſhe ſhall be hoott
A medecyne foꝛ an hawke that hath a ſekeneſſe the wich is called the aggreſteyne.
Whan ye ſe yowre hawke huꝛte his fete with his Beke. and pullyth heꝛ tayll. then ſhe hath the aggreſteyne. Foꝛ this ſekenneſe take Meꝛde of a dove. and of a ſhepe. and of an allow. and ſtronge vynegre. and do all ſoftely in a baſſyn of braſſe. ⁊ Medyll hem wele to gedeꝛ: to ſeꝛue .iij. days afteꝛ. and yeue hiꝛ fleſh of a colueꝛ with ony and with powdeꝛ of pepeꝛ. and ſet hiꝛ in a deꝛke place. and doo ſo .ix. days. and when ye ſee New federis in the tayll. waſh hiꝛ with eueroſe. and ſhe ſhall be hoole and ſaafe.
¶A medecyne foꝛ an hawke that hath the croampe in hir wynges and how it cummyth.
For this Croampe take a whyte looff of brede ſumwat coldeꝛ then it commyth owt of the oouen. and let holde the hawke ſooftely foꝛ huꝛtyng. and kut the loofe almooſt thorow owte. and diſplay the wynge eſely. and holde it betwene the .ij. paꝛtes of the loofe. and let it be hoolde ſo the ſpace of alfe a quaꝛteꝛ of an howre. and ſhe ſhall be hoole.
¶The Croampe commyth to an hawke with takyng of colode in hiꝛ yowthe. Theꝛfore it is goode foꝛ an hawke to kepe hiꝛ waꝛme: yonge and hoold. and this medycyne is good at all tymes foꝛ hiꝛ whetheꝛ ſhe be yonge oꝛ holde.
