Page:Gospel of Saint John in West-Saxon.djvu/109

45. Manega þāra Iudea þe cōmon tō Marian and gesāwon ðā þing þe hē dyde gelȳfdon on hine.^[1]

46. Hī sume fōron tō þām Phariseon, and sǣdon him þā ðing þe sē Hǣlend dyde.

Ðys [godspel] sceal twām dagum ǣr palmsunnandæge.

47. Witodlīce þā bisceopas and þā Pharisei gaderydon gemōt, and cwǣdun, Hwæt dō wē? for þām þēs man wyrcð mycel tācn.^[2]

48. Gif wē hine forlǣtaþ, ealle gelȳfað on hine; and Romane cumað and nimað ūre land and ūrne þēodscipe.

49. Hyra ān wæs genemned Caiphas, sē wæs ðā on gēre bisceop, and cwæð tō him, Gē nyton nān þing,^[3]

50. nē ne geþenceað þæt ūs ys betere þæt ān man swelte for folce, and eall þēod ne forwurde.^[4]

51. Ne cwæð hē þæt of him sylfum; ac þā hē wæs þæt gēr bisceop, hē wītgode þæt sē Hǣlend sceolde sweltan for ðǣre þēode;^[5]

52. and nā synderlīce for þǣre dēode, ac þæt hē wolde gesomnian tōgædere Godes bearn þe tōdrifene wǣron.

1. A, þæra.
2. B, C, biscopas; A, gaderodon; A, cwædon; A, mycele tacna.
3. A, heora; A, eare (for gere); A, bysceop, B, C, biscop.
4. A, geþencað; A, forweorðe.
5. A, ear (for ger); A, bysceop, B, C, biscop; A, wytegode.