Page:Gospel of Saint John in West-Saxon.djvu/111

2. Hig wrohton him þǣr bēorscipe; and Marða þēnode. Ladzarus wæs ān þǣra þe mid him sæt.^[1]

3. Maria nam ān pund dēorwyrðre sealfe mid þām wyrtgemange þe hig nardus hātað, and smyrede ðæs Hǣlendes fēt and drīgde mid hyre loccon; and þæt hūs was gefylled of ðǣre sealfe swæcce.^[2]

4. Þā cwæð ān his leorningcnihta, Iudas Scarioð þe hine belǣwde,

5. Hwī ne sealde hēo þās sealfe wiþ þrīm hundred penegon, þæt man mihte syllan þearfon?^[3]

6. Ne cwæð hē nā þæt for þig þe him gebyrode tō þām þearfon, ac for þām þe hē wæs þēof, and hæfde scrīn, and bær þā ðing þe man sende.^[4]

7. Đā cwæð sē Hǣlend, Lǣt hig þæt hēo healde þā oð þone dæg þe man mē bebyrge.^[5]

8. Gē habbað symle þearfan mid ēow; ac gē nabbað mē symle.

9. Micel menio þāra Iudea gecnēow þæt hē wæs ðǣr; and hig cōmon, næs nā for þæs Hǣlendes þingon syndorlīce, ac þæt hig woldon gesēon Ladzarum þe hē āwehte of dēaðe.^[6]

1. A, worhton hym þar; A, B, C, gebeorscipe; A, lazarus.
2. A, loccum.
3. B, C, sielfe; B, C, hundryd; A, þearfum.
4. A, gebyrede; A, þearfan.
5. Corp., B, C, of þæne, A, oð þone; A, B, C, bebyrige.
6. A, mænigeo þæra; A, þar; A, þyngon synderlice; A, B, C, lazarum.