Page:Gospel of Saint John in West-Saxon.djvu/54

18. Đā andswaredon him þā Iudeas and cwǣdon, Hwylc tācn ætȳwst þū ūs, for ðām þe þū ðās ðing dēst?^[1]

19. Sē Hǣlend him andswarude and cwæð, Tōwurpað þis tempel, and ic hit ārǣre binnan þrīm dagon.^[2]

20. Đā Iudeas cwǣdon tō him, Þis tempel wæs getimbrod on six and fēowertigon wintron, and ārǣrst þū hit on þrȳm dagon?^[3]

21. Sōðlīce hē hyt cwæð be hys līchaman temple.

22. Đā hē of dēaðe ārās, þā gemundon his leorningcnihtas þæt hē hit be him sylfum cwæð; and hī gelȳfdon hālegum gewrite and þǣre sprǣce þe sē Hǣlend spræc.^[4]

23. Đā hē wæs on Ierusalem on ēastron ōn frēolsdæge, manega gelȳfdon on his naman, þā hī gesāwon ðā tācna þe hē worhte.^[5]

24. Sē Hǣlend ne geswutelode hine sylfne him, for ðām hē cūðe hī ealle,^[6]

25. and for þām him næs nān þearf þæt ǣnig man sǣde gewitnesse be men; hē wiste witodlīce hwat wæs on men.

1. C, tacen.
2. A, andswarode; A, toweorpað; A, dagum.
3. B, C, templ; A, getimbred; A, -tygum wyntrum; A, dagum.
4. B, C, sylfon; Corp., cw̄ð, A, B, C, cwæð; A, halgum; B, C, spæce.
5. A, hierusalem.
6. adds na after geswutelode.