7. Ne mæg middaneard ēow hatigean; ac hē hatað mē, for þām ic cȳþe gewitnesse be him þæt his weorc synt yfele.[1]
8. Fare gē to þison frēolsdæge; ic ne fare tō þison frēolsdæge, for þām mīn tīd nis gȳt gefylled.[2]
9. Hē wunede on Galilea, þā hē þās þing sǣde.[3]
10. Eft þā his gebrōðru fōron, þā fōr hē ēac tō ðām freolsdæge, næs nā openlīce [ac dīgollīce].[4]
11. Đā Iudeas hyne sōhton on þām frēolsdæge, and cwǣdon, Hwār is hē?
12. And mycel gehlȳd wæs on þǣre menigeo be him. Sume cwǣdon, He is gōd; ōðre cwǣdon, Nese, ac he beswīcð þis folc.[5]
13. Þeah hwæþere ne spæc nān man openlīce be him for þǣra Iudea ege.[6]
Ðys [godspel] sceal on mydlengtenes wucan on tȳwesdæg.
14. Þā hit wæs mid dæg þæs frēolsdæges, þā ēode sē Hǣlend intō þām temple, and lǣrde.[7]
15. And þā Iudeas wundredon and cwǣdon, Hūmeta cann þēs stafas, þonne hē ne leornode?[8]
16. Sē Hǣlend him andswarode and cwæþ, Mīn lār nis nā mīn, ac þæs þe mē sende.[9]
