glosses or explanatory notes in the text. They are usually introduced by the words 'That is to say,' and most of them were derived from the Latin manuscript which Chaucer had before him.
Boethius, Book iii, metr. 2.
It likeþ me to shewe by subtil songe wiþ slakke and delitable soun of strenges how þat nature myȝty enclineþ and flitteþ gouernementȝ of þinges, and by whiche lawes she purueiable kepiþ þe grete woride, and how she bindynge restreineþ alle þingus by a bonde þat may nat be vnbounden. Al be it so þat þe liouns of þe contree of pene beren þe faire cheines, and taken metes of þe handes of folk þat ȝeuen it hem, and dreden her sturdy maystres of which þei ben wont to suffren betinges, yif þat hir horrible mouþes ben bibled (þat is to sein of bestes devoured), hir corage of tyme passeþ þat haþ ben ydel and rested, repaireþ aȝein, þat þei roren greuously and remembren on hir nature, and slaken hir nekkes from hir cheins vnbounden, and hir maistre first to-teren wiþ blody toþe assaieþ þe woode wraþþes of hem, (þis is to sein þei freten hir maister). And þe iangland brid þat syngiþ on þe heye braunches, (þis is to sein in þe wode), and after is inclosed in a streit cage al þouȝ þat þe pleiyng besines of men ȝeueþ hem honiende drinkes and large metes wiþ swete studie, ȝit naþeles yif þilke brid skippynge oute of hir streite cage seeþ þe agreable shadewes of þe wodes, she defouleþ wiþ hir fete hir metes yshad, and sekeþ mournyng oonly þe wode, and twitriþ desirynge þe wode wiþ hir swete voys. Þe ȝerde of a tree þat is haled adoun by myȝty strengþe bowiþ redely þe croppe adoun, but yif þat þe hande of hym þat it bent lat it gon aȝein, an oon þe crop lokeþ vp ryȝt to heuene. Þe sonne phebus þat failleþ at euene in þe westrene wawes retorniþ aȝein eftsones his cart by a priue paþe þere as it is wont aryse. Alle þinges seken aȝein to hir nature, ne noon ordinaunce nis bytaken to þinges but þat þat haþ ioignynge þe endynge to þe bygynnynge, and haþ
