skι′n·ku·ts: “ta′x̣as, ta′x̣as qa·qasι′nu·, hιntsιłqatał’upła′pne·.” qake′ᵢne· nι′łse·k: “so′ᵤkᵤne; ta′x̣as hutsqa·qasknι′sᵢne·.” qakiłι′łne· skι′n·ku·ts: “ta′x̣a ł\A′n·a.” ta′x̣as qanałʼaqa‵t!oᵤx̣a′x̣e· skι′n·ku·ts. qake′ᵢne· skι′n·ku·ts: “hutsx̣ałkułnak!o′ᵤne·ts huts!ιknoquknała′ₐne·.” qake′ᵢne· nι′łse·k·: “so′ᵤkᵤne; huts!ιknoquknała′ₐne·. qa′psin koᵤtsι′ʼiknoqokna′ła?” qake′ᵢne· skι′n·ku·ts: “kq!a·wo′ᵤqa·ł hutsłʼιknoquknała′ₐne·.” qake′ᵢne· nι′łse·k: “at huqᵘa·ιknuqu′k_ne·. kq!awo′ᵤka·ł” qake′ᵢne· skι′n·ku·ts: “ta′x̣a qa′psin at kιnsιłιknoqo·′ko?”—“aₐʽkmoq!o·′ma·ł at husłʼιknuqu′kᵤne·.” qake′ᵢne· skι′n·ku·ts: “so′ᵤkᵤne·, ta′x̣a hutsłʼιknuqukᵤnała′ₐne·. naqa′ₐne· ka′min.” ta′x̣as kułnak!o′ᵤne·. ta′x̣as nʼιknuqu′kᵤne·. qake′ᵢne· skι′n·ku·ts: “na·sts at tsqaqa′ₐne·, tax̣ta′ neᵢs ktsyuna′qa aqłsma′kᵢnιk! saₐnι′łwiyna′ₐta·m at ts!ιknuqu′kᵤne· at ktsła′soᵤks aₐʽkιłwi·′ye·s.” qake′ᵢne· nι′łse·k: “so′ᵤkᵤne·. hutsx̣ałtsx̣an·atι′sᵢne· ya·qaqa′ₐke· ka′min. na· aₐʽkma′ₐna·m o′k!łe·etna′m·u at ko·łaqaha′k.łam·a′ła·k huwakałtiłι′łne·. nʼa′sne· katιłna′mu. hułahaya′x̣a katιłna′m·u at na·sts hułaqaskam·a′łne·ts at qa·wa·ka\x̯a‵łwa′x̣e· aqłsma′knιk!ts at hunʼυpiłι′łne·.” qake′ᵢne· skι′n·ku·ts: “ta′x̣as hιnts!ι′ne· ka′swu. huts!łats!ιnyax̣nała′ₐn·e· tιłnamu′ne·s.” tseᵢka′te· aₐʽkoqłe.ι′se·s swu′e·s skι′n·ku·tsts nʼume·tsιnq!ak.łe′ᵢse·. tsukᵘa′te· aₐʽktsama′łʼe·s łae·ta′x̣ₐne· ta′x̣as ła.ιsιnq!aqa′pse·. qakι′łne·: “ta′x̣as hułts!ιnax̣a′ₐła.” ta′x̣as qa:nakι′kᵢne· swυ′tᵢmu. ta′x̣as nʼu′px̣ₐne· aₐʽkιk.łuna′me·s. qakι′łne· skι′n·ku·ts swυ′e·s·: “ta′x̣as na hutsqaosaqa′ₐne·. łu′n·u·, łats!ιnya′x̣anʼ tιłnamu′ʼne·s.” ta′x̣as łats!ιnya′x̣ₐne· tιłnamu′ʼe·s nι′łse·k. ta′x̣as łatsukᵘa′te·. ta′x̣as wanaqna′łne·. łaqa·ox̣a′x̣e· nι′łse·k neᵢs ya·qaosaqa′ₐke· skι′n·ku·ts. ta′x̣as nawu′kᵤne· skι′n·ku·ts. nʼu′px̣ₐne· sł·awa′se·s swυ′e·s· ta′x̣as mιtya′x̣ₐne· skι′n·ku·ts neᵢs aqłsma′knιk!s. nʼupx̣a′łne· pał nʼa′sᵢne· ni′łse·k skι′n·ku·ts. nʼoᵤnełι′łne·ts ta′x̣as qa·qasknι′łne·. ta′x̣as ts!ι′n·akι′kᵢne· swυ′tᵢmu. ta′x̣as x̣aₐtsa′n·e·, ki·′as tι′tqa·t!ts ki·′as paₐ′łkeᵢ. qaox̣ałʼιtqa′ₐne·. tsx̣a′n·e· nι′łse·k; qakι′łne· skι′n·ku·ts·: “na ki·′as katιłna′mu tseᵢka′tenʼ, ka· hιnqa′łwiy hιntstsukᵘa′te· tsx̣ałʼι′n·e· tιłnamu′ʼne·s.” ta′x̣as skι′n·ku·ts tseᵢka′te·. qałwi′yne·: “na ki·′ιn ktsaqu′n·a naqants!ma′k!eᵢs ma′k!eᵢ. na ki·′ιn kwι′łqa naqa′ₐłsoᵤk. ta′x̣as na hułsιłtso′ᵤkat, naₐqa′ₐłsoᵤk.” qakι′łne· nι′łseks: “na hutsιłtsᵘkᵘa′te·.” qakiła′ʼmne·: “ta′x̣as hutsyanqa·tsała′ₐne·.” tsx̣amałktsała′mne·, ke′ᵢsoᵤk kiyu′kᵢyeᵢt. ta′x̣as yan·qa′ₐtse·. qa·nakι′kᵢne· tιłnamo′ᵤtᵢmu skιn·ku·ts. nʼu′px̣ₐne· suq!yułe.ι′t.se·. qakι′łne· tιłnamu′ʼe·s: “qoᵤ nak!amnaqałe.ι′tke· qo· hιntskana′x̣e·. ka′min hutsx̣ałʼuk!ena′x̣e·.” ta′x̣as ts!ιna′x̣e· neᵢ łu′kpo. ta′x̣as ts!ιnałʼo·k!ᵘina′x̣e· skι′n·ku·ts. ts!ιna′kᵢne·ts wa′sιł·ax̣a′x̣e· neᵢs tsx̣ałyaqana′ske· tιłnamu′ʼe·s. ta′x̣as łax̣a′x̣e·ts nʼιsaknu′n·e·. qawunekιt.se·ts łax̣a′x̣e· neᵢ łu′kpo·. qałwi′yne· skι′n·ku·ts:
