Page:Laws of the Earliest English Kings.djvu/34

18

HLOTHHERE and EADRIC

Þis syndon þa domas ðe Hloþhære ⁊ Eadric, Cantwara cyningas, asetton.

Hloþhæere ⁊ Eadric, Cantwara cyningas, ecton þa ǽ, þa ðe heora aldoras ær geworhton, ðyssum domum þe hyr efter sægeþ.

1. Gif mannes esne eorlcundne mannan ofslæhð þane þe sio þreom hundum sell' gylde, se agend þone banan agefe ⁊ do þær þrio manwyrð to.

2. Gif se bane oþbyrste, feorþe manwyrð he to gedo ⁊ hine gecænne mid godum æwdum þæt he þane banan begeten ne mihte.

3. Gif mannes esne frigne mannan ofslæhð þane þe sie hund scillinga gelde, se agend þone banan agefe ⁊ oþer manwyrð þær to.

4. Gif bana oþbyrste, twam manwyrþum hine man forgelde ⁊ hine gecænne mid godum æwdum þæt he þane banan begeten ne mihte.

5. Gif frigman mannan forstele, gif he eft cuma stermelda, secge an andweardne. Gecænne hine, gif he mæge: hæbbe þare freora rim æwda manna ⁊ ænne mid in aþe, æghwilc man, æt þam tune þe he tohyre; gif he þæt ne mæge, gelde swa he genoh áge.^[1]

6. Gif ceorl acwyle be libbendum wife ⁊ bearne, riht is þæt hit, þæt bearn, medder folgige; ⁊ him mon an his fæderingmagum wilsumne berigean geselle,^[2] his feoh to healdenne, oþ þæt he X wintra sie.

7. Gif man oþrum mæn feoh forstele, ⁊ se agend hit eft ætfó, geteme to cynges sele, gif he mæge. ⁊ þone ætgebrenge þe him sealde; gif he þæt ne mæge, læte án, ⁊ fo se agend tó.

1. em. Wilkins. gono háge. H.
2. em. Hickes. gefelle. H.