17. Mynstres aldor hine cænne in preostes canne.
18. Preost hine clænsie sylfges soþe, in his halgum hrægle ætforan wiofode ðus cweþende "Veritatem dico in Christo, non mentior." Swylce diacon hine clænsie.
19. Cliroc feowra sum hine claensie his heafodgemacene ⁊ ane his hand on wiofode; oþre ætstanden, aþ abycgan.
20. Gest hine clænsie sylfes aþe on wiofode; swylce cyninges ðegn.[1]
21. Ceorlisc man hine feowra sum his heafodgemacene on weofode; ⁊ ðissa ealra að sie unlegnæ.
§ 1. Đanne is cirican canne riht::
22. Gif man biscopes esne tihte oþþe cyninges, cænne hine an gerefan hand; oþþe hine gerefa clensie oþþe sella to swinganne.
23. Gif man gedes þeuwne esne in heora gemange tihte, his dryhten hine his ane aþe geclænsie, gif he huslgenga sie; gif he huslgenga nis, hæbbe him in aþe oðirne æwdan godne oþþe gelde oþþe selle to swinganne.
24. Gif folcesmannes esne tihte ciricanmannes esne, oþþe ciricanmannes esne tihte folcesmannes esne, his dryhten hine ane his aþe geclensige.
25. Gif man leud ofslea an þeofðe, liege buton wyrgelde.
26. Gif man frigne man æt hæbbendre handa gefo, þanne wealde se cyning þreora anes; oþþe hine man cwelle oþþe ofer sæ selle oþþe hine his wergelde alese.
§ 1. Se þe hine gefo ⁊ gegange, healfne hine age; gif hine man cwelle, geselle heom man LXX scll'.
- ↑ em. Liebermann. ðeng. H.
