Page:Ludus Coventriae (1841).djvu/119

          I xal these iij. here take;
Susanne the fyrst xal be,
Rebecca the secunde xal go with the,
Sephore the thrydde,—loke that ȝe thre
          This maydon nevyr ȝe forsake.

Susanne. Sere, I am redy att ȝour wylle,
  With this maydon for to wende.

Rebecca. ȝour byddyng, sere, xalle ffulffyl,
  And ffolwe this maydon ffayr and hende.

Sephor. To ffolwe hyre it is good skyl,
  And to ȝour byddynge wole I bende.

Joseph. Now, sere buschop, hens go I wyl,
  For now comyth onto my mende
          A matere that nedful is.

Episcopus. ffarewel, Joseph and Mary clere,
I pray God kepe ȝow alle infere,
And sende ȝow grace in good manere
          To serve the kynge of blysse.

Maria. ffadyr and modyr, ȝe knowe this cas,
  Whow that it doth now stonde with me;
With myn spowse I must forth passe,
  And wott nevyr whan I xal ȝow se;
Therfore I pray ȝow here in this plas,
  Of ȝour blyssynge for charyté;
And I xal spede the betyr and have more gras,
  In what place that evyr I be;
          On knes to ȝow I falle.
I pray ȝow, fadyr, and modyr dere,
To blysse ȝour owyn dere dowtere,
And pray ffor me in allemanere,
          And I ffor ȝow alle.

Joachym. Almyghty God, he mote the blysse,
  And my blyssynge thou have also;
In alle goodnesse ged the wysse,
  On londe or on watyr, wherevyr thou go.

Anna. Now God the kepe from every mysse,