Page:Ludus Coventriae (1841).djvu/30

To the fadyr of hevyn that peyn for to ses,
  His shamful deth to put away.
Judas that traytour, befor gret pres,
  Xal kys his mouthe and hym betray,
Alle his dyscyples than do dyscres,
  And forsake Cryst, the sothe to say,
          ffor doute thei do hem hede.
Hese dyscyplys alle everychone
Do renne awey and leve hym alone,
They lete hym stondyn amonge his ffon,
          And ronne away ffor drede.

Tertius vexillator.

Than in the xxvj.^{ti} pagent,
  To Cayphas Cryst xal be brouth,
Tho Jewys fful redy ther xul be bent,
  Cryst to acuse with worde and thouth.
Seynt Petyr doth folwe with good intent,
  To se with Cryst what xuld be wrouth;
ffor Crystes dyscyple whan he is hent,
  Thryes he doth swere he knew hym nowth,—
          A kok xal crowe and crye;
Than doth Petyr gret sorwe make,
ffor he his lord thus dede forsake,
But God to grace hym sone doth take,
          Whan he doth aske mercye.

Primus vexillator.

In the xxvij. pagent, sere Pylat
  Is sett in sete as hy justyce;
Whan he is set in his astat,
  Thre thevys be brout of synful gyse,
And Cryst that lovyd nevyr stryff nor bat,
  But trewthe and goodnesse on every wyse,